ISAIA 15
15
God ki page hagamutea i Moaba
1Ikê na tamasinga renia na hagaitangiha tanga i Moaba.
Na hinua gi rua i Ara me Kire
ka ruhuruhurerua igê na bungiana gi tage togo
ma i Moaba ki mamangu raha.
2Na ai ni Tiboni ka tagere tanga na ngêsu,
hanana ga angiangi igê.
Na ai ni Moaba ka angiangi maramara
renirerua na hinua i Nebo me Meteba.
Ngaira ka goro bê hurira ma na taboturita nikâ.
3Na enoni, ga arârâ i tara,
ka hagesuru renigi na kakagani.
Na enoni ka gegege ma ka angiangi maramara
igê na mahera na hinua
ma igê na gerini na ruma aberabera.
4Na ai ni Hesibone me Eleale ka angiangi raha.
Na ringeta ka rongo raha ngavê.
Na ai ni Jahase ka rongora me,
naka ma i hagatê.
Na mane ni me ngaira nikâ
ka tatata ma ka bubununuga.
5Inê kê mesia ngavê i Moaba!
Na enoni ka bani gava tanga na hinua i Soara
ma tanga i Egelata Selesia.
Tani ka tagere suria na tara tanga i Luhiti,
ma ka angiangi gogogo igê.
Tani ka gava tanga i Horonaimi
ma ka angiangi raha gogogo igê.
6Na ve i Nimirimi ki mamata.
Na go i akerena ka mêgu.
Na ara ni marâ hato ki maria.
7Na enoni ka tarêhia na maruguna na Maniao.
Ngaira ka migigava na nahuninga hato iata.
8Na enoni ka angiangi
surigi na ara ni hinua hato i Moaba.
Ma na enangita nikâ
i hinua i Egelaimi me Berelimi.
9Na ve i hinua i Tibone ki gagapuga.
Ma God ki bani naka na tarana, i era ngavê,
tangara na enoni i ngekana.
Na marâ vasiga ka page ohera
na enoni hato, ga hita so i Moaba.
Currently Selected:
ISAIA 15: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
