ISAIA 13
13
God ki page hagaitangia i Babilone
1God ki hagamarutea o Isaia, karena o Amose, renia na hagaitangiha tanga i Babilone.
2Na Araha ki vi:
“Igê na harena na hungana
hagarari igê tanga na hearihatana.
Hagaramonira na mane ni me.
Tagere rima, na girarana,
vi ngaira ka taharigi
na mani para i Babilone.
3Inê nga na Araha kê bêngenira
na mane ni me iaku igê na hearihatana.
Ngaira ka ageage ma ka ramoramo.
Inê kê bonasira, ka hagaitangira
na enoni, gê mangariaga tangara.”
4Rongo! Na ngerengereha igê na hungani.
Rako teha vê na enoni. Na mane ni me.
Rongo! Na heakuruhinga!
Na maneraha i maveta ka haku me
henira na mane ni me iata.
Na Araha raramohaga hunia
ki hagarêra na mane ni me iana,
ka ura harahara.
5Ngaira ka râ me tenigi na agua hagatê,
tenigi na akereni na maveta.
Igê na mangariganiha iana
na Araha ki hakura me,
hanana i hagaerasia ngavê na agua hagenani.
6Gegege!
I hagarangi me noga na tangiana ni hagaitangiha,
i page arâ me igê na Araha raramohaga hunia.
7Vikê na enoni hato ka page rumakaka,
ma ka page bagahagêguri ma ka page anumanuma.
8Ngaira hato ka page bubununuga.
Ngaira ka page gasuga ni haharaniha,
manga na gete i riki na gerina.
Ngaira ka page heborete,
suria ga magu ma ka tatata
ma ka page ape ni makiha.
9Bâ, na tangiana iana na Araha ki râ me noga.
Na tangiana ni mamasiganiha,
i page rakaraka igê na mangariaganiha iana.
Na agua ki page voravora re na bagamanihê raha.
Ngaia ki page hagamagahurura ngavê na enoni era.
10Na higu ma na higu angapopo ki hato, vige mave.
Na arito ki page roto, naka i raboa me.
Ma na hageha ki page roto nogana.
11Na Araha ki vi:
“Inê be migirâ na hagaitangiha tanga na maveta,
tangara na enoni era meni na tasi iata.
Inê be hagamakira na enoni paroparo
ma be hagavotarira na ani, ga hagarahasira mareta
ma ka hagamamasiagara na enoni getera.
12Na enoni ki asa, vige page rako,
manga na golo matarotaro
i bara, vige tarahua rako;
ki asa vige page rako,
manga na golo ni Ofiri.
13Igê na tangiana ngekana
inê, na Araha raramohaga huniê,
inê kê page ngingigi igê na marâ i vavearo
ma na maveta ki page gisigisi
ma ki page guruguru tenia na atohana.
14Na ai mahuara, ga oga i Babilone,
ka page gava vê tanga i pasita,
mangara na goti, ga gavatenira na mane, ga hagavasi,
se mangara na sipi i mareha na avanuta.
15Na me ka ahura tarasira ka meme na enoni, ga taura.
16Hagenago ngaira ka bâsira na me,
ga rahutenira na kare gari iata i maata
ma ka rurugugi na ruma iata
ma ka tugurira na gete iata,
ka tanu era henira.”
17Na Araha ki vi:
“Inê kê hagaramonira na ai ni Metia,
hanana ga taharia i Babilone.
Ngaira ka pe tenigi na siliva
ma ka pe vanasigi na golo.
18Ngaira ka page hanasira ka meme na mane haoru.
Ngaira ka page nahuira nikâ na kare gari ma na kere kare.
19I Babilone ki bâkoro teharigi na hinua hato.
Na ai ni Babilone ka agegagesia ngavê.
Ma inê nga na Araha be hagamakaka i Babilone,
mangarerua i Sotome me Gomora.
20Babilone ki page hihiruga tare, ki bê ki arâ.
Na ai ni Arabia ki asa, vige page taunga i ngekana.
Ma na avanu ni sipi ki asa nikâ,
vige page hagamamarora na totoha ni sipi iana i ngekana.
21Nga noga ma na marâ vasiga i bemu ka page oga i ngekana.
Ma na ko makukuni ka page beabea igê.
Na auvê ma ka page sikosiko igê.
Ma na goti vasiga ka page hahane
igê na ruma, ga aruhuruhu.
22Na ringeta na o vasiga ma na marâ vigana
ka page tagitagi igê na bebetehe ma na ruma raha.
I ata me noga na matena tanga i Babilone,
i hatohato igê!”
Currently Selected:
ISAIA 13: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
