HEBEREO 9

Na hagarahenga i maveta ma i pasina God

1Na suruheri i nago ki nahunigi na ramata tanga na hagarahenga, ma na agua tanga na hagarahenga, na enoni i maveta ga tagarahia. 2Ngaira ka torea na ruma na gahu, garu oga na kiboru gi rua i rarona. Na ani hagenago me na kiboru ka hêtana vi na Agua Apuna. Igê na kiboru ngekana ka oga igê na laiti igê na atohani, ma na bea henigi na bereti, ga bani tagarenigi tanga God. 3I murina na ruata na gahu ki oga igê na kiboru, ga hêtana vi na Agua Apuna Ngavê. 4I rarona ki oga igê na bea na golo, tanga ga sungia igê na marâ, i sigini koro. Ma i rarona ki oga igê nikâ na bokesi na suruheri, ga aba hagenani renia na golo. I rarona na bokesi ki oga igê na pi na golo henigi na bereti na mana, ma na vato iana o Aroni, i bani hisi i nago, ma na hê gi rua, ga bani segegi igê na tamasinga na suruheri. 5I avorana na bokesi karu oga igê na angelo iana God. Na girarana vi God ki oga i ngekana. Renigi na gagahaterua ngairerua karu mamarusia na agua, God i bonotenigi igê na tasi. Ma ki pe araria, vi ge visigi na ara ni marâ i na matena i ngekê.

6Na marâ hato ka tâ vigana. Na ara ni tangiana na mane ni vogasiha ka bêbanu igê na ani i hagenago me na kiboru, hanana ga katogi igê na tagaraha iata. 7Nga noga ma na mane ni vogasiha i teha kani bêbanu igê na kiboru i murina na ruata na gahu. Ngaia ki bêbanu igê na kiboru ngekana hagetage togo ma i na ara ni harisi. Ngaia ki migibanu na gapu, i tagarenigi tanga God renigi na tasi iana marena, ma renigi na tasi iata na enoni, na tasi na ani ngaira ka pe girara, vi ngaira ka katogi. 8Igê na tarani ngegana na Higona Apu ki hagagiraragia, renia vi na tara banu tanga na Agua Apuna Ngavê ki mamênga, vi ge tahataha, matena i gâga mênga na ani hagenago me na kiboru. 9Na tarana ngekana ki na girarana na matena i ngekê. Na tarana ngekê ki vi, vi na votovoto na marâ getigi, ma na puruka, na sipi, ma na marâ vigana, ga susu renigi tanga God, ki asa, vi ge katogi na aitangihata na enoni, ga vogasi, ke matarotaro. 10Na marâ ngegana ka na marâ tangagi ma na ngauha, na tonoha, ma na tananiha renigi na marâ, ga râ surigi na ramata igê na rotu. Ngaigi ka na ramata iata ma na enoni, ma ka pe tananigi râ hete na aitangihata, ma ka tananigi ma na marâ i metara. Na ramata ngegana ka gâga ma mataro me na matena, God i page urusigi igê na ara ni marâ hato.

11Mu bâ, o Kirisito ki bani râ me manga na mane ni vogasiha i teha i migirâ me na ara ni marâ koro hato, ga bani goga. Na ruma na gahu, i tagara igê, ki raha teha, ma ki koro teha. Na ruma na gahu ngekana na enoni ka pe tagarahia. I vi, vi na ruma na gahu ngekana ngaia ki mareha vi na marâ ni maveta ikê. 12Matena o Kirisito ki banu igê na ani hagenago me na kiboru, ma hagetage togo ma ngaia ki ritare banu tanga na Agua Apuna Ngavê, ngaia ki pe migibanu na gaputa na goti, se vi na puruka, hanana vi ge susu renigi. Ngaia ki mebanu hete na gapuna marena, ma ki vuria tangagia na tahinga, i tâtâ tare. 13Manga vi na gaputa na goti, se vi na puruka, ma na rahugata na kareta na puruka, ga kamusira na enoni renigi, ma ka girara, ga tananira na enoni, ga pe matarotaro surigi na ramata na rotu, hanana viga matarotaro surigi, 14na gapuna ma o Kirisito hete ki teha ngavê! Igê na raramohana na Higona Apu, i gâga tare, o Kirisito ki tagarenia marena manga na vogasiha koro teha ngavê tanga God. Na gapuna ki page hagamatarotarogi na aitangihaka, hanana igia ka kasigi râ na parongaka, ga hagatasigia tanga na hagaitangiha, i oga tare, ma ka voravora re na kariana God, i mauri tare.

15Tahema renigi na tagaraha iana o Kirisito kani vora me na suruheri haoru, hanana vi na enoni, God i bani atera, ka girara, ga page nahunia na ogaha koro, i asa, vi ge page hato, God i bani surua. Renia na mera iana ki bani rupasira na enoni hato tenigi na tasi iata, matena i gâga mênga na ani i nago na suruheri.

16Na enoni, i votogi na nahuninga, ki vivi, vi na matena i meme, na enoni ka page nahunigi na nahuninga iana. Na enoni ngegana ki tuguhira, vi ga hagatanga monari renia na mane ngekana, vi ngaia ki me, hanana ga nahunigi na nahuninga iana. 17Renia na suruha iana na mane ngekana ki vora re na marâ purua ma, matena na mane ki mauri mênga, nga noga ma na matena i meme, na suruha iana ki kahu haganega ki gatagata. 18Tahema na bani suruheri nikâ ki gatagata renia ma na gapu. 19Hagenago o Moise ki hagarongora na enoni renigi na ara ni ramata hato igê na Buka ni Ramata. Ma hemuri ngaia ki têgi na gaputa na karena puruka, i torarigi henia na ve, ma ki têa na apinige na hisopo, i oga igê varehuna rotorotoaga memera na sipi, ma ki kamusira na Buka ni Ramata ma na enoni hato renia. 20Ngaia ki vi, “Ikê ki na gapu, i hagagatagatania na suruheri, God i bani bonasigamu, vigamu arâ suria.” 21O Moise ki kamusigi nikâ na ruma na gahu, ma na ara ni marâ hato tanga na hagarahenga. 22I monari, surigi na Ramata, ka tananigi renia na gapu hagarangia vi na ara ni marâ. Na bonoteniha na tasi ki asa vige akê me, manga vi i mareha na gapu.

Na vogasiha iana o Kirisito ki tananigi râ na tasi

23Na marâ ngegê ka na nunuta na marâ monari i pasina God. Ma ki tuguhira, viga tananigi na nunuta ngegana renigi na vogasiha ngegana. Ma na marâ monari i pasina God ngaira ka obanigi na vogasiha, na ani ga koro ngavê. 24Suria o Kirisito ki pe banu igê na agua apuna, na agua ga tagarahia na enoni, na ani ga nununia na ani i monari. Ngaia ki banu i pasina God marena, ma i ngekana i maana God ngaia ki nungia igê God tangagia. 25Na mane ni vogasiha iata na Siu i teha ki bêbanu i na Agua Apuna igê na ara ni harisi, hanana i vogasi renia na gapuna na puruka, se na sipi. Ma o Kirisito ki pe banu vê, hanana vi ge vogasi hagarako renia ngaia so marena. 26Manga vi ge vogasi hagarako renia ngaia so marena vikana, ke araria, vi ge bani hatamigi na mamasiaganiha, haganega me tenia na matena, God i hagavora igê na maveta. Ma ngaia ki bani vora me hagetage togo ma hete, igê na matena na hatongina na maveta, hanana i tananigi râ na tasi, suria ngaia ki vogasi renia ngaia so marena. 27Na ara ni enoni ki tuguhia, i meme hagetage togo ma, ma God ki kahu suria. 28I tagenana ma henia o Kirisito. Ngaia nikâ ki me hagetage togo ma, matena i tagarenia ngaia so marena igê na vogasiha, hanana i tananigi râ na tasi iata na enoni hato. Ngaia ki page arâ me nikâ, mareha vi tangagi na tasi, ma tanga hete na tahinga tangara na enoni, ga naasia.

Currently Selected:

HEBEREO 9: KCB

Highlight

Copy

Compare