HEBEREO 8

O Jesu ki na mane ni vogasiha iaka i teha

1Ikê nga na tarana igia ka tamasi renia: na mane ni vogasiha iaka i teha ki na ani, i oga so henia God, na Araha raha teha, igê na atohana. 2Ngaia ki tagara manga na mane ni vogasiha i teha igê na morana na agua apuna teha ngavê, i vi mareha vi na ruma na gahu, na enoni ga torea, ma na Araha hete. 3Na ara ni mane ni vogasiha ga teha ka atera, hanana ga tagarenigi na votovoto ma na vogasiha tanga God. Tahema na mane ni vogasiha iaka i teha ki tuguhia, i tagarenia nogana ta na marâ. 4Manga vi ngaia, ma ke oga i maveta ikê, ngaia ki asa, vi ge vora re na mane ni vogasiha, suria ga oga na mane ni vogasiha, ga tagarenigi na votovoto surigi na Ramata iata na Siu. 5Na tagaraha, ga katoa na mane ni vogasiha ngegana, ki na nununa râ ma, ma ki hagamamarugania râ ma na marâ i pasina God. Na marâ ngekana God ki bani visia tanga o Moise, matena i sugi torea na ruma na gahu. Renia God ki vi tanga, ki vi, “Go hagatogo suria, hanana go katogi na ara ni marâ suria na tarana, go bâsia igê na hungana.” 6Ma kamu bâ, God ki atea o Jesu tanga na tagaraha manga na mane ni vogasiha. Ma na tagaraha ngekana ki teharia na tagaraha iata na mane ni vogasiha getera, tagenana manga na suruheri haoru, o Jesu i naka i berarogata God ma na enoni, ki koro teharia na bani suruheri, suria i surigi na marâ, ga koro teharigi na marâ i na bani suruheri.

7Hoi, manga i mareha ta na marâ, vi ge era igê na ani hagenago na suruheri, tanu hega kani viga obania me nikâ na ruata? 8Ma God ki ramonira na kariana, ki vi:

“Inê na Araha, kê vi vikê:

I page arâ me na bevoana,

matena inê kê page naka igê na suruheri haoru,

henira na Isiraelita,

henira na raraha iana o Juta.

9Ngaia ki page totora hegitigi tenia na suruheri,

gê bani naka henira na êvarita,

matena gê bêngenira hura tenia i Esipito.

Ngaira ka pe râ surigi na suruheri,

gê nakagi henira.

Tahema inê kê pe gagêmaga renira.

Inê na Araha kê vi.

10Hoi, na suruheri,

gê page naka henira na Isiraelita

i na matena i muri me,

ki manga ikê:

Inê na Araha kê tamasi, kê vi:

Inê be nakagi na ramata iaku igê na aitangihata,

ma be segegi i obata.

Inê nga ki na God iata,

ma ngaira nga ka na kariaku.

11Ma na enoni ki hato,

vi ge page hagesuria na tamana so i hinua.

Ma ki hato,

vi ge page vi tanga na goana, ke vi,

‘Gu hagesuringenia na Araha.’

Suria na ara ni enoni hato ka page aitangisiê,

na kare, na enoni purua ma na enoni raha.

12Matena ga aharê igê na ramata,

inê be hagatogo surira,

ma be bonotenigi na tasi iata.”

13Suria God ki tamasi renia na suruheri haoru, ngaia ki visia vi na ani hagenago na suruheri ki êvariga, ma na ara ni bani marâ hato ga êvariga, ka page magahuru rêrê.

Currently Selected:

HEBEREO 8: KCB

Highlight

Copy

Compare