HEBEREO 2

Ga taua gatagata na taroha na tahinga

1Tahema i tuguhigia, vi ga taua gatagata ngavê na taroha monari, ga bani rongoa, hanana siana ka ahaharê. 2Na taroha, na angelo ka torea me tenia God, ki tuguhira na enoni hato. Tahema na ara ni enoni, ga pe arâ suria, se ga aharê igê, ki tarahura na hagaitangiha, na ani i ararira. 3Manga i he igia ka girara, vi ga tahitahi tenigi na hagaitangiha, manga vi igia ma ka pe karinga maninga na taroha na tahinga, na ani i teha ngekana? Na Araha ngaia marena ki haganega ki tarohenia na tahinga ngekana, ma na ani, ga rongoa, ka hagatarêngenia tangagia, ma ka hagatanga monari renia, vi i monari. 4Ma henira na enoni ngegana God ki hagatanga monari nikâ renia na tahinga ngekana, suria i hagabângenigi na raramohana, na tagaraha raha, ma rako na ani getigi na mena. Ma nikâ ngaia ki votongenigi na votovoto iana na Higona Apu suria na katoha iana.

Ngaia nga o Jesu ki hagatahira na enoni

5Igami kami tamasi renia na ani i muri me na maveta. God ki pe kasira na angelo, hanana vi ga marungia na maveta ngekana. 6Ma i tagua igê na Buka Apuna, ki vi:

“God, na ta ki na enoni?

Suria igo ko takusia.

Na ta ki na enoni?

Suria igo ko marupea.

7Igo ko katoa,

ki pe raha teharira na angelo

igê na kere matena abubu.

Igo ko kasia akê,

ma ko vatea re na raramohana,

ki araha.

8Ma ko katoa,

ki marungira na ara ni marâ hato.”

I vi, vi God ki katoa na enoni, “Ki marungira na ara ni marâ hato.” I vi, vi na ara ni marâ hato, ma ki mareha vi ge tihia ta na marâ. Ma igia ka pe bâsia na enoni, vi ge marungira na ara ni marâ hato i ngekê. 9Igia ka bâsia ma hete o Jesu! Suria na kere matena abubu ngaia ki pe raha teharira na angelo. Ma God ki kasia akê, ma ki vatea re na raramohana, ki araha, i ngekê, suria ngaia ki me. God igê na korohana, ngaia ki kato vikana, hanana vi o Jesu ki hagatahira na enoni hato renia na mera iana. 10God ki hagavorara, ma ki têra na ara ni marâ hato, ka oga tanga ngaia marena. Ma ki oto tanga God, vi katoa o Jesu, ki korokoro teha ngavê renigi na mamasiaganiha, hanana i merabanu rako na kariana God igê na arahanga iana i pasina God. Renia o Jesu ngaia ki na ani, i bêngenira tanga na tahinga.

11Ngaia ki tananira na enoni tenigi na tasi iata. Ma ngaia ma na ani, i katora ka matarotaro, ngaira hato ka nahunia o Vaemata gi tage togo ma. Tahema o Jesu ki pe maki, vi ge visira, vi na goana. 12Suria ngaia ki vi,

“God, inê be tarohenigo tangara na goaku.

Inê be kiki tangago henira na enoni hato,

ga rahesigo.”

13Ngaia ki vi nikâ,

“Inê be hagêguritogo renia God.”

Ma ki vi nikâ,

“Inê akê henira na kare,

God i bani vateê renira.”

14Hoi, suria na kare, i visira, ngaira ka na enoni monari, ga tonga na hasigota ma na gaputa, o Jesu marena ki vora enoni mangara ngaira. Ngaia ki kato vikana, hanana vi renia na mera iana ngaia ki hagaerasia hagatage Satana, i araha tanga na mera, 15ma hanana i rupasira na enoni, ga vora re na kare vurivuri iana na mera igê na mêrihata hagenani, suria ngaira ka magutenia na mera. 16I rongo mataha, vi ngaia ki pe tamanira na angelo. Ma na Buka Apuna ki vi hete, “Ngaia ki tamanira na raraha iana o Abaramo.” 17Tahema ki tuguhia, vi voravora mangara na goana igê na ara ni tarani, hanana i tagara tanga God manga na mane ni vogasiha i teha i takuira na enoni, ma ka hagêguritogo renia, hanana i kasikasi meni na tasi iata. 18Ma i ngekê ngaia ki girara, i tamanira na enoni, i tarahura na heuhungiha, suria ngaia marena ki bani hatamigi na heuhungiha ma na mamasiaganiha.

Currently Selected:

HEBEREO 2: KCB

Highlight

Copy

Compare