HEBEREO 3

O Jesu ki raha teharia o Moise

1Goaku igê na tongesuriha, God ki bani ategamu nogami, ma ki bani unigamu tanga na mêriha mora i pasina. Mu takusia o Jesu. God ki hagatora, ki mane ni vogasiha i teha igê na rotu iaka. 2Renia ngaia ki têa bâkoro tare na viteana God, i hagatora, tagenana manga o Moise i têa bâkoro tare na viteana God igê na tagaraha iana igê na ruma hagenani iana God. 3Na mane, i torea na ruma, ka visia raha teharia na ruma, i torea. I tagenana ma ga visia raha o Jesu teharia o Moise. 4I monari, na ara ni ruma na enoni ka tagarahigi, ma God ki na ani, i tagarahigi na ara ni marâ hato. 5Mo Moise ki têa bâkoro tare na viteana God igê na tagaraha iana igê na ruma hagenani iana God. Ngaia ki na kariana igê, ma ki hagananê renigi na marâ, God i page visigi. 6Mo Kirisito ki têa bâkoro tare na viteana God, suria ngaia ki no Karena, i araha igê na ruma iana o Vaemana. Igia nga ka na ruma iana, manga vi igia, ma ka ama ni ramoramo nga, ma ka ama ni hagêguritogo nga renigi na marâ, ga naasigi.

Na mamaroha God i obania tangara na kariana

7Hoi, na Higona Apu ki tamasi vikê:

“Mu rongoa nga na tamasinga iana God

i na tangiana i ngekê.

8Siana ka pungupungu na bêmi,

manga i nago mu urapusia God,

matena mu oga igê na bagamasusu raha

ma kamu uhungia igê.

9Suria God ki vi,

‘I ngekana na êvarimi ka uhungiê ma ka rapasiê,

henaka vi ngaira ka bani bâsigi na marâ,

gê bani katogi me surigi na harisi tangahuru ge he.

10Tahema inê kê mangariaga tangara na enoni ngegana,

ma kê vi,

Na takotako iata ka arâ tasi tare.

Ngaira ka pe giraragi na tauhaku.

11Inê kê mangariaga, ma kê tohe, kê vi:

I asa iata, vi ge page banu me i pasiku,

ma ke mamaro heniê!’”

12Goaku igê na tongesuriha, mu bâbâ maninga, hanana siana ta na hitangimi ki pania na God mamauri renigi na parongana era, ma ki pe tongesuria. 13Hanana siana na tasi ki katoa na hitangimi, ki pungupungu na bêna, ma ki tuguhigamu hete, mu hetamaniheri i na ara ni tangiani suria na matena, igia ga nahunia mênga igê na “tangiana i ngekê”, na Buka Apuna i tamasi renia. 14Manga vi igia hato, ma ka obâbahaku henia o Kirisito, ki tuguhigia, viga ama ni nganganihaga nga igê na tongesuriha manga i nago, matena ga tongesuri moramora, ma ki tuguhigia, siana ka rumakaka. 15Na Buka Apuna ki vi vikê:

“Mu rongoa na tamasinga iana God

i na tangiana i ngekê.

Siana ka pungupungu na bêmi,

manga i nago mu urapusia God.”

16Ti ki rongoa na tamasinga iana God, ma ki urapusia? Ngaira hato nga nga na enoni, i bêngenira hura o Moise tenia i Esipito surigi na harisi tangahuru ge he. 17God ki mangariaga tanga ti? Ngaia ki mangariaga tangara na enoni, ga tasi, ma ka aihu ka me igê na bagamasusu. 18Matena God i tohe, ki vi, “I asa iata, vi ge page banu me i pasiku, ma ke mamaro heniê”, ngaia ki tamasi renia ti? Ngaia ki tamasi renira na enoni, ga urapusia. 19Hoi, igia ka girara, vi na enoni ki asa, vi ge banu i pasina, suria ngaira ka pe tongesuri.

Currently Selected:

HEBEREO 3: KCB

Highlight

Copy

Compare