HEBEREO 1
1
God ki tamasi i harana o Karena tangagia
1I nago hagarako God ki tamasi i harata na poropete tangara na êvarika igê rako na tarani. 2Ma i ngekê, na tangiani na hatongini, ngaia ki bani tamasi i harana o Karena tangagia. Ma renia na ani ngekê God ki hagavorara na ara ni marâ hato, ma nikâ ngaia ki na ani, God i bani atea, ki nahunigi na ara ni marâ hato. 3Ngaia ki na taketakena na raramohana God. Ngaia ki na nununa ngavê God, ma ki usuria God. Ma renia na tamasinga raramohaga hunia ngaia ki têra na ara ni marâ hato, hanana ga gâga. Matena i tananira hato na enoni tenigi na tasi iata, ngaia ki aporo i pasina God raramohaga hunia, ma ki araha henia.
O Karena God ki raha teharira na angelo
4O Karena God ki raha teharira na angelo, renia na ata, God i hêtana renia, ki teharigi na atata na angelo.
5Suria God ki pe visia rârâ tanga ta na hitangita na angelo iana, ke vi,
“O Kareku kani igo.
I ngekê inê kê aparago.”
Ma God ki pe vi nikâ tanga ta na hitangita na angelo iana, ke vi,
“Inê ka no Vaemana.
Ma ngaia ki no Kareku.”
6Matena God ki hagatorangenia me noga o Karena i tage i maveta, ngaia ki vi nikâ, ki vi,
“Na ara ni angelo hato iana God
ki tuguhira, viga rahesia.”
7God ki tamasi renira na angelo, ki vi vikê:
“God ki katora na angelo iana,
ka vora re na roga raha.
Ma ki katora na kariana,
ka vora re na vavatani na gi.”
8Ma God ki tamasi renia nga o Karena, ki vi vikê:
“Na arahanga iamu, God,
ki page gâga tare ma tarema!
Igo ko marungira na kariamu
igê na otoha.
9Igo ko takuia na otoha,
ma ko kikitenigi na marâ,
ga pe oto.
Tahema God, inê na God iamu,
kê bani atego,
ma kê bani kasigo akê nga
teharira na kariamu.”
10Ngaia ki vi nikâ:
“Igê na haganegahana igo, Araha,
ko hagavora na maveta,
ma renigi na rimamu maremu
igo ko hagavoragi na vavearo.
11Ngaira hato ka page maguhuru,
ma igo nga ko page gâga tare,
ki bê ki arâ.
Ngaira hato ka page êvariga
mangagi na gahu.
12Igo ko page rumira manga na gahu.
Ma igo ko page urusigi
mangagi na gahu, ga urusigi.
Ma igo, igo nga ko page tagenana tare,
ma ki asa hagetage,
vi gu page me.”
13God ki pe visia rârâ tanga ta na hitangita na angelo iana, ke vivi:
“Gu oga so heniê ikê igê na atohaku,
igê na otohaku, ku araha,
mataro me kê katora na merongamu,
ka voravora re na êguga iamu.”
14Hoita, na angelo hato ngaira ka na nunuta ma, ma ka tê viteana God, ma God ki hagatorangenira, hanana ga tamanira na ani, ga page tahi.
Currently Selected:
HEBEREO 1: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
