HAGAI 1
1
Na bonasiha ni tagarahiana aporo na Ruma ni Rotu
1Na tangiana gi tage igê na onota na hageha igê na ruata na harisi o Tario ki maneraha teha i Pesia, na Araha ki hagatora na poropete o Hagai. Na tamasinga, i vatea, ki tangarerua o Serubabele mo Josua. O Serubabele ki no karena o Sealetiele ma ki marungia i Juta. O Josua ki no karena o Jehosataka ma ki maneraha teha ni hagarahenga.
2Na Araha raramohaga hunia ki tamasi tanga o Hagai, ki vi: “Na enoni ngegê ka vi, vi na matena koro tanga viga tagarahia aporo igê na Ruma ni Rotu ki mamênga.” 3Ma hemuri na Araha ki tamasi i harana na poropete o Hagai tangara na enoni, ki vi: 4“Kariaku, ma ki hega? Na matena koro ma vari kani gamu oga igê na ani koro na ruma, ma na aniku inê ki oga aruhuruhu? 5Mu pe bâsigi vari na tarani, ga tarahugamu? 6Igamu kamu tagara bâraha i mu, ma ki asa vige rako na ngêra. I monari, mu ngêngê, ma ki asa vigamu ngê masu. I monari, mu tonomigi na vaini, ma ki asa vige ruguhigamu. I monari, mu nahunigi na aruhami, ma igamu kamu marato mênga. I monari, na enoni tagara ki nahunia na haga, ma ki asa vige araria na ogaha iana. 7Mu pe girara vari, tanu hega kani ga vora me na tarani ngegê? 8Hoita, mu tagere igê na hungani, kamu tapitapi apinige, ma kamu tagarahia aporo na Ruma ni Rotu. Ma hemuri inê be vagevagesia, ma igamu kamu page rahesiê maninga igê.
9“Igamu kamu naasigi, vige ganora ngavê na mu iami, ma ngaigi ki ganora sisite ma. Ma na matena mu bêbagi na harisi i ruma ni ngêra, inê kê hagakakagarigi. Tanu hega kê kato vikana? Suria na Ruma ni Rotu iaku ki oga aruhuruhu mênga, ma igamu hato kamu aharo surigi ma na ruma iami maremi. 10Tahema i mareha na rangi, ma na marâ ka pe akê bâkoro. 11Na ara ni marâ ka me, suria i arihu me era, inê kê pe hagarangisigi na mako, na hungani, na mu, na pariki ni vaini ma na pariki ni olive. Inê kê pe hagarangisira rârâ na ara ni ngêra, na enoni, na sipi, na puruka ma na ara ni marâ hato mu hasigi.”
Na enoni ka tê viteana na Araha
12O Serubabele, o karena o Sealetiele, ma o Josua, na maneraha teha ni vogasiha, o karena o Jehosataka, karu tê viteana God na Araha henira na enoni, ga bani aporo me tenia i Babilonia, ga bani henahuraura tanga. Ngaira ka magutenia na Araha, i tamasi i harana o Hagai na poropete iana. 13Mo Hagai ki hagarongora na enoni renia na tamasinga iana na Araha, ki vi: “Inê kê surua, vigê ngahisigamu.” 14Na Araha ki hagagana apeta na ara ni enoni hato, hanana ga tagarahia na Ruma ni Rotu: o Serubabele, i marungia i Juta, mo Josua na maneraha teha ni hagarahenga, ma na enoni hato, ga bani aporo me, suria ga henahuraura. Ngaira ka haganega ka tagarahia na Ruma ni Rotu iana na Araha iata God raramohaga hunia. 15Ngaira ka haganega igê na tangahuru gi rua matare he na tangiana igê na onota na hageha igê na ruata na harisi, i maneraha teha igê o Tario.
Currently Selected:
HAGAI 1: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
