HAGAI 2

Na Ruma ni Rotu ki page hagaratena me na ramana

1Na tangahuru gi rua matare tage na tangiana igê na pita na hageha igê na ruata na harisi, i maneraha teha igê o Tario, na Araha ki hagatora nikâ na poropete o Hagai. 2Ngaia ki tamasi i harana o Hagai tangara o Serubabele, i marungia i Juta, mo Josua na maneraha teha ni vogasiha, ma na enoni, ki vi: 3“Ti na hitangimi i rigia na ani i nago na Ruma ni Rotu? Ngaia ki bâkoro era. Ma i ngekê ki bâ hega? Ngaia ki bâ purupuru ma. 4Inê nga na Araha kê vi tangagamu: Mu ramoramo! Gu ramoramo Serubabele! Igo nogamu o Josua, o karena o Jehosataka ma maneraha teha ni vogasiha! Igamu hato na enoni mu ramoramo nogami! Mu tagara! Inê na Araha raramohaga huniê kê tamanigamu. 5Matena mu pania i Esipito, inê kê bani surua, vigê ngahisigamu. Inê kê oga henigamu. Tahema siana kamu magu.

6“Inê nga na Araha raramohaga huniê inê kê vi tangagamu: I page arihu, menê kê page ngingigi na vavearo ma na maveta, na asi ma na ano. 7Inê be hagamagusira na enoni i maveta, ma ngaira ka page migirâ me na ruruguha iata, ma inê be hagabâkoroa ngavê na Ruma ni Rotu renigi. 8Na ara ni siliva ma na golo ka na aniku, suria inê ki na Araha raramohaga huniê. 9Na Ruma ni Rotu haoru ki page bâkoro teharia na ani i nago. Ma i ngekana inê be haganahunira na kariaku renigi na ramana ma na marapeha. Inê nga na Araha raramohaga huniê kani gê visia.”

O Hagai ki merahekarigi na mane ni vogasiha

10Na tangahuru gi rua matare ke he na tangiana igê na sivata na hageha igê na ruata na harisi, i maneraha teha igê o Tario, na Araha raramohaga hunia ki tamasi nikâ tanga na poropete o Hagai. 11Ngaia ki vi: “Gu vi tangara na mane ni vogasiha, ke aramia na hagatenga ikê. 12Manga ta na enoni, ma ki torea na ganiana apuna tenia na vogasiha, ngaia ki tavoa ma ki pinoa igê na gahu iana. Ma na gahu ki hataria na bereti, se na ngêra mako, se na vaini, se na oile ni olive, se na ani ma vigana, i hega, ngaia ki katogi ki apuna nogani vari?”

Matena o Hagai ki hagatera vikana na mane ni hagarahenga, ngaira ka arami, ka vi: “Mareha.”

13Mo Hagai ki hagatera nikâ, ki vi: “Takusia na enoni, i pe matarotaro surigi na ramata na rotu, suria i hataria na gahua. Manga vi ngaia, ma ki hatarigi na ngêra ngegana, i hega, i manga ngekê, na ngêra ngegana ka pe arari vige ngaugi vari?” Na mane ni vogasiha ka arami, ka vi: “Ua, ga pe arari.”

14Mo Hagai ki vi: “I tagenana ma tangara na enoni igê na agua ikê. I maana na Araha na enoni ngegê ka pe matarotaro. Tahema na ara ni ngêra, ga hasigi, ma na ara ni marâ, ga nakagi igê na bea ni vogasiha, ka pe koro.”

Na Araha ki surua na ramana

15Na Araha ki vi: “Mu takusigi mênga vari na tarani, ga bani tarahugamu, matena i mamênga, vigamu haganega kamu tagarahia aporo igê na Ruma ni Rotu? 16Mu takusia, mu page hagavunusigi na tangahuri heni gi rua renigi na koni, ma kamu tarahugi ma na tangahuru gi tage na heni. Mu takusia, mu page hagavunusigi na maraguhu tangahuru gi rima renigi na vaini, ma kamu tarahugi ma na tangahuru gi rua. 17Inê kê hagaitangigamu. Na kakaganiha ma na mariaganiha ka tarahugi na mu iami. Na arito, na rangi ma na roga ka hagaerasigi na ngêra hato iami. Ma naka ma i manga ngekana, ma igamu kamu pe urisi parongami ma kamu pe ahariê. 18I ngekê ki na tangahuru gi rua matere he na tangiana igê na sivata na hageha. I ngekê nga ki hato igê na pureniana na Ruma ni Rotu. Hoita, haganega tenia i ngekê, na marâ ka page heurusi tenia i nago. 19Naka ma ga bani baguru me na ruma ni ngêra iami, ma ka pe hunguhungu na apinige ni vaini, ma na apinige ni fiki, ma na apinige ni olive, ma na apinige ni ngauha getigi, ma ki haganega tenia i ngekê, inê be haganahunigamu renia na ramana.”

Na suruha tanga o Serubabele

20Igê nga na tangahuru gi rua matare ke he na tangiana igê na hageha ngekana na Araha ki tamasi nikâ tanga o Hagai, ki vi: 21“Gu vi tanga o Serubabele, i marungia i Juta, ko vivi, vi inê kê sugi ngingirerua na vavearo ma na maveta. 22Inê be hatungigi na raramohata na maneraha i maveta. Inê be horogi na kati ni me henira na me igê. Inê be hagavotarira na hosi ma na mane ni me igê. Na hosi ka page meme, ma na mane ni me igê ka page heariha ka meme. 23Igê na tangiana ngekana inê be atego o Serubabele, karena o Sealetiele, ma be kasigo, ku araha igê na raramohaku. Inê nga na Araha raramohaga huniê kani gê visia.”

Currently Selected:

HAGAI 2: KCB

Highlight

Copy

Compare