SEPANIA 3
3
God ki hagaitangia ma ki hagakoroa aporo Jerusaleme
1I page era ngavê tangara na ai ni Jerusaleme,
suria ga pe toto suria na Araha,
ma na enoni raha i pasita ka bagaparongata
ma ka hagamamasiagara na kariata.
2Ngaira ka heriga na Araha,
ma ka usitenia, vige hagaotora.
3Na enoni raha iata ka mangara na laione, ga ngurunguru.
Na mane ni kotiha ka mangara na o vasiga,
ga magê ma ka gagari igê na bungiana,
ma ka migimaongo na ganiani,
ma ki asa vige hagahitagi tagua tanga na mavoraro.
4Na poropete ka tamasi paroparo re harata ma,
ma ka hagahagaparu ma.
Na mane ni vogasiha ka hagaerasigi na marâ apuna
ma ka horohorogi na ramata iana God.
5Ma na Araha ki oga mênga igê na hinua.
Ngaia ki koro ma oto teha ngavê,
ma ki asa iana, vige tanugi na marâ,
ga pe koro ma ka pe oto.
I na ara ni mavoraro,
ki asa vige mareha,
ngaia ki roherohe pusira na kariana re na otoha.
Ma bâ, na enoni era ka ama ni erataga ngavê,
ma ki asa vige tangahurira hete.
6Na Araha ki vi:
“Inê kê bani hagamagahurura
na enoni hato i ta na agua getigi.
Inê kê bani ruhuruhugi na hinua iata,
ma na para ni hinua ma na bebetehe iata ka ahogehoge.
Na hinua ka hihiruga.
Na mahera ka baguru.
Mareha tani vige hita.
7Inê kê kato vikana, suria gê takusia,
vi na kariaku ka page hagahigasiê,
ma ka page nakê, kê hagaotora,
hanana ga page takusigi tare na hagesuringa iaku tangara.
Ma ki pe arihu, ma ngaira ka erataga manga i nago.
8Naka! Inê na Araha kê vi tangagamu, kê vi:
Mu nanê! Mu nanêa na tangiana,
gê page rêra akê kê ranganira igê
na enoni hato i maveta.
Inê kê bani kato, vigê hagahakura
na enoni hato i maveta ma na maneraha iata,
hanana gê hagaitangira igê na mangariaganiha raha iaku.
Na mangariaganiha iaku ki manga na apena bagagi raha,
i ngaua na maveta hagenani.
9Ma hemuri inê be horogi na aitangihata na enoni i maveta,
hanana ge rahesiê inê geteê ma,
mareha vi na ataro.
Ngaira hato ka page têtê viteaku inê.
10Nakara ma na kariaku ga oga totoko
i na agua hagatê i Etiopia,
ngaira nikâ ka page vogasiê.
11Kariaku, igê na matena ngekana
igamu ki hato, vigamu page maki,
suria mu heherigê.
Inê be paira hura tenigamu
na ani ga paroparo ma ka heruruhi,
hanana igamu ki asa, vigamu heherigê nikâ
i Sione na hungana apuna iaku.
12Inê be nakara so ma na enoni,
ga haritagi ma ka pe hagarahasira mareta,
ga avarasiê ma ka rukuruku i pasiku.
13Na ai ni Isiraele, na ani ga hita,
ka page marupegi bâkoro na ramata.
I asa vige hagahagaparu,
ma ki asa vige hagahagabeka.
Ngaira ka page gâga igê na ramana,
ka apeape tatara, ma ki mareha ta na marâ,
vige page hagamagusira.
Na ki ni vagevageha
14Ai ni Isiraele, mu kiki.
Ma kamu ngerengere vagevage!
Igamu Jerusaleme,
mu vagevage i mêrihami hagenani!
15Na Araha ki bani hatungia
na hagaitangiha tenigamu.
Ngaia ki bani paira na merongami hato.
Na Araha, i marungia i Isiraele,
ki ngahisigamu, siana mu magu.
16I râ me noga na matena
na enoni ka page vi tanga Jerusaleme, ka vivi:
“Siana kamu magu, na ai ni Sione,
ma kamu ramoramo hete.
17Na Araha God iami ki ngahisigamu.
Igê na raramohana igamu kamu tehateha
na Araha ki page vagevagesigamu,
ki page takuigamu aporo
ma ki page muni tenigamu.
Ngaia ki page kiki
ma ki page vagevagesigamu,
18mangara na enoni ga vagevage
igê na tangiana raha.”
Na Araha ki vi:
Inê kê bani hatungigi na eraha
ma na makiha tenigamu.
19Bâ, i sugia ma!
Inê be hagaitangira na ani ga hagamamasiagagamu.
Inê be hagatahigamu manga na avanu ni sipi,
i torera aporo na ani ga tavi ma ka tarupe.
Inê be hatungia na makiha iami,
ma be katora na enoni hato i maveta,
ke hagahigasigamu ma ke visigamu raha.
20Bâ, i sugia ma!
Inê be torera aporo me na goami, ga totoko,
ma be hagahakugamu aporo.
Inê be katogamu, ke rongo raha na atami
i maveta hagenani.
Inê be katogamu, kamu oga aporo igê na ramana.
Ngaia kani gê visia, inê na Araha.”
Currently Selected:
SEPANIA 3: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
