HAGONEGAHANI 50

1O Josepo ki abahia o vaemana, ki angisia ma ki siginia. 2Hemuri ngaia ki bonasira na mane mangata ka tagarahia na gahuana o vaemana, hanana vi siana ki kakaga. 3Ngaira ka tagara vikana surigi na tangiani tangahuru ge he manga bani hanana. Na ai ni Esipito ka hetaki surigi na tangiani tangahuru gi pi.

4Matena i hato na hagahunu bungi, o Josepo ki vi tangara na mane ni hagaotonga iana na maneraha i Esipito, ki vi: 5“Bamane, mu torea na rongoha ikê tanga na maneraha: ‘Matena o vaemaku ki sugia ma vige meme, ngaia ki katoê, kê tohe, vi inê kê bagia nga igê na vaba, i bani hagarêa i Kanani. I koro, ko nakê kê arâ ma kê bagia o vaemaku ma kê kahu aporo me.”

6Na maneraha ki arami, ki vi: “I koro ma vi go arâ ma ko bagia o vaemamu manga hanana go tohe.”

7Vikê o Josepo ki râ ma ki bagia o vaemana. Na gavumane hato iana na maneraha ma na mane ni hagaotonga iana ma na mane ni bêngeniha ka râ henia. 8Na ahemata iana, o goana ma na ani getera na raraha iana o vaemana ngaira hato ka râ nikâ henia, nga noga ma na kere kare iata ma na sipi, na goti ma na puruka iata ka oga vê i na apanena i Gosene. 9Na mane ga tagirigi na kati ma na ani ga tagirira na hosi ngaira ka râ nikâ henia. Ngaia ki vora na râha raha ngavê.

10Matena ga tariha i Atata i na apanena akê i ve i Jotano, igê na agua ni hatanga ni koni, ngaira ka angi maramara raha arihu era. O Josepo ki râ surigi na ramata ni angiha maramara surigi na tangiani gi pi. 11Matena na ai ni Kanani ka bâsira ga angiangi maramara i Atata, ngaira ka vi: “Oi, tangara na ai ni Esipito na angiha maramara ki na tarana i raha teha ngavê.” Tahema na agua ngekana ka hêtana vi Abele Misiraimi i vi ‘Ai ni Esipito ka angi maramara.’

12Hoi, o karena o Jakobo ka kato manga i bani bonasira. 13Ngaira ka torea na gahuana tanga i Kanani ma ka bagia igê na vaba i Makapela i na apanena akê i Mamere igê na mako, o Abarahamo ki bani vuria tenia o Eperoni na Hitita tanga na matahu. 14Matena o Josepo ki bagia hato o vaemana, ngaia ki aporo i Esipito henira o goana ma na enoni hato, ga tage râ tanga na bagiha ninuni.

O Josepo ma veogana ka hekorokoro aporo

15I murina i me o Jakobo, o veogana o Josepo ka hetamatamasi, ka vi: “O Josepo ki mangariaga mênga vari tangagia? Ngaia vari ki usumigia renia na bagatauhaka tanga?” 16Vikê ngaira ka kasi tamasinga tanga o Josepo, ka vi: “Hagenago ma ki me o vaemaka, 17ngaia ki bani vi tangagami, ki vi, ‘Mu nungia o Josepo, ki bonotenigi na bagatauhami tanga, matena mu merongasia.’ Tahema igami kami nungigo, hanana go bonotenigi na bagatauhamami tangago, suria igami nogamami kami rahesia God, o vaemamu i rahesia.” O Josepo ki angi, matena i rongo vikana.

18Ma hemuri ngaira mareta o veogana ka râ ma ka tubê so tanga, ma ka vi: “Igami ikê. I ararigami, vigami voravora re na kare rakuraku iamu.”

19Ma o Josepo ki vi tangara, ki vi: “Siana kamu magu! Mareha vi God kani inê! 20Igamu kamu katoa na eraha tangê, ma na eraha mu katogi, God ki horogi igê na tarani ga koro, hanana ga tahitahi rako na enoni ga goga i ngekê surigi na marâ hato ga tarahuê. 21Siana kamu magu! Inê be marupegamu igamu ma na karemi.

“Vikê ngaia ki hagakoro tangara ma ki haganaku parongata, suria na tamasinga iana ki hagakoro obata.

O Josepo ki me

22O Josepo ki oga nga i Esipito henira na raraha iana o vaemana. Ngaia ki tonga na 110 na harisi iana ma ki kahu me. 23Ngaia ki tahi togâta na karena ma na esina o Eparaimi. Ngaia ki tahi togâta na karena o Makire o karena o Manase ma ki katora ka vora na raraha iana. 24Ngaia ki vi tangara o veogana, ki vi: “Inê kê sugi meme, ma God ki page marupegamu nga ma ki page bêngenigamu hura tenia na agua ikê tanga na agua i bani tohe vi haganahunira o Abarahamo, o Isako ma o Jakobo renia.” 25Hemuri o Josepo ki vi tangara na raraha iana o Isiraele, ka tohe. Ngaia ki vi: “Mu tohe, vi igamu kamu page migirâ na suriku, matena God ki page bêngenigamu hura tanga na agua ngekana.” 26Hoi, o Josepo ki tonga na 110 na harisi iana ma ki me i Esipito. Ngaira ka tagarahia na gahuana, siana ki vi kakaga ma ka naka i rarona na bokesi ni gahua.

Currently Selected:

HAGONEGAHANI 50: KCB

Highlight

Copy

Compare