HAGONEGAHANI 49
49
O Jakobo ki tamasi tanga i meme
1O Jakobo ki unira me o karena ma ki vi tangara, ki vi:
“Mu ura hagarangiê, hanana ve hagarongogamu
renigi na marâ ga page tarahugamu i muri me.
2Igamu hato o karena o Jakobo, râ me kamu karingê.
Mu karinga o vaemami o Isiraele.
3Rubeni na bêbê ni kare iaku,
igo ka na raramohaku.
Igo ka na kare hagâkani iaku.
Igo ko paro ma ko ramo ngavê
teharira o kareku hato.
4Igo ko pe hagatogo surigo maremu
manga na aogana na maganuha.
Ma igo ki asa vigu raha tangara o vesimu,
suria igo ko memêru na gete râ ma iaku
ma ko oga erasia o vaemamu.
5O Simeone ma o Levi karu têhesuri.
Ngairerua karu hagaera
renigi na tangaruha iaterua.
6Inê ki asa ve hakunirerua,
matena garu harikato se garu hekarigi,
suria garu nahu enoni
igê na mangariaganiha iaterua
ma karu meramarabe na puruka mane,
hanana vigaru hagamanamana.
7Na hagaitangiha ke tarahurerua,
suria i raha ngavê na mangariaganiha iaterua,
ma na bagamangamangariaganiha iaterua
ki hagamamasiagara purua ma na enoni.
Inê be tokorenira na raraha iaterua
suria i Isiraele hagenani.
Inê be kasi totoko renira
i guputa na enoni i ngekana.
8O Juta, na goamu ka page hagarahasigo.
Igo ko page mutera na merongamu.
O goamu ka page tubê so tangago.
9O Juta ki manga na laione
i garahunia na ganiana i ngaua,
ki aporo igê na tâtâ iana,
ki gugusia marena ma ki tâtâ.
Ti ki gatagata hanana i hagakangia?
10O Juta ki page taua na vato ni maneraha
ma na raraha iana ka page maratorana ngaia.
Na agua getigi ki page tuguhira, viga mahata tanga.
Ngaira ka page têtê viteana ma ka page tubê so tanga.
11Ngaia ki baroa na bêhâgana na tonki iana
igê na apinige na vaini
igê nga na apena koro ngavê na vaini.
Ngaia ki tananigi na gahu iana igê na vaini memera.
12Na maana ka masuri ngavê teharia na vaini.
Na rivona ka sikisiki ahuru ngavê teharia na miliki.
13O Sebuluni ki page oga igê na tarasini.
Na marugu iana ki page vora re na manitava ni haka.
Na apanena iana ki page tariha râ i Sitone.
14O Isakare ki maratorana na tonki ramo
i tâ i berarogani na erutanga.
15Ngaia ki girara na agua vi mamaro igê
na agua i hagagarakoro ngavê
ma ki vagevagesia na agua hagenani.
Vikê ngaia ki ramatutuku na gerina,
hanana i toregi na erutanga.
Ga tuguria ki tagara manga na kare rakuraku.
16O Tane ki page marungira na kariana
Ngaira ka page maratorata na raraha getera iana o Isiraele. 17O Tane ki page maratorana na ma i papana na tara,
na ma ni garahunu i na akerena na tara,
i hanasia na popogani ugana na hosi,
ma na mane i tagiria ki votavota hagarenga.
18Araha, inê kê naasia tenigo na tahinga.
19Na manero ka page taharia o Gati
ma ngaia ki page meramato hetanga
ma ki page tarigenira.
20Na mu iana o Asere ka page ganora ngavê
renigi na ngêra ga araria na maneraha.
21O Napatali ki na goti i arârâ asitatara
ma ki agusingenira na karena ga koro ngavê.
22O Josepo ki maratorana na tonki vasiga
igê na ve banga,
na bêhâgana na tonki vasiga
igê na apanena na hungana.
23Na merongana ka gamorahia ngavê
ma ka tarigenia renigi na mage ma na epage
24Na God raramohaga hunia, o Jakobo i rahesia
na God i marupea ma ki anumasia o Isiraele,
ngaia ki barugi na epage iata.
25God o vaemamu i rahesia
ngaia nga kani page tamanigo.
Na God raramohaga hunia ki page korokoro tangago.
Ngaia ki page vatego renia na rangi ni vavearo
renia na ve tenia na ruguhana na ano,
renia na hagarakoniha ni togoha ma ni nuni,
26renigi na ngauha ma na mahe,
renigi na korohani na barani hagahu,
renigi na korohani na hungani hagahu.
Na mahatanga hato ngegana
God ke haganahunia o Josepo renigi,
suria ga atea i berarogata o goana.
27O Benamino ki manga na o vasiga i garaga.
I mavoraro ngaia ki gagari
ma ki tagenana ma nikâ igê na manurahi.”
28Ngegana ka na tamasinga i visigi o Jakobo tanga na ara ni hitangita o karena ma ki kahu me. Ngaira ka vora na êvarita na raraha tangahuru matererua i Isiraele.
O Jakobo ki me ma bagia
29O Jakobo ki bonasira o karena, ki vi: “Hoi, i ngekê inê kê sugi hakunira na êvariku ga bani me. Mu bagiê henira na êvariku igê na vaba igê na mako iana o Eperoni na Hitita, 30hagarangia i Makapela kerekê i Mamere i Kanani. O Abarahamo ki bani vurigi na vaba ma na mako ngegana tenia o Eperoni tanga na matahu. 31O Abarahamo ma ka Sara kaniana ka bani bagirerua i ngekana. I ngekana inê kê bani bagia nikâ igê ka Lea. 32Na mako ma na vaba igê ka vurigi tenira na Hitita. Mu bagiê nga i ngekana.” 33Matena o Jakobo ki tamasi hato vikana tangara o karena, ngaia ki tâ hagarenga ma ki me.
Currently Selected:
HAGONEGAHANI 49: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific