TAHINGA 1
1
Na ai ni Esipito ka hagamamasiagara ngavê na Isiraelita
1O karena o Jakobo, ga râ henia tanga i Esipito henira na ahemata iata hegitigi, 2ka no Rubeni, o Simeone, o Juta, 3o Isakare, o Sebuloni, o Benamino, 4o Tane, o Napatali, o Gata ma o Asere. 5Ngaira hato haku na raraha iana o Jakobo ngegê ka vora na tangahuru gi pi, nga noga ma o Josepo ma tani o karena kani bani oga i Esipito. 6Rârâ o Josepo mo veogana ma ngaira hato na vetage kare ka bani me. 7Henaka, ma na raraha iata na Isiraelita ka hagatakara na kare. Ngaira ka rako ma ka raramohaga ma ka manasia i Esipito.
8Hemuri na mane getea ki urisi ki maneraha i Esipito. Na maneraha ngekê ki pe hagarea rârâ na matena iana o Josepo. 9Ngaia ki vi tangara na kariana, ki vi: “Na Isiraelita ngegana ka rako teha ngavê ma ka ramo, i era ma ka parênia i Esipito tenigia. 10Vari manga i mataro na hearihatana, ngaira ka panepane henira na merongaka, hanana ga megiaheariha ka gavagava tenia na agua iaka. I ararigia, ge tarahua ta na tarana, ge hagabarasira, hanana siana ke tataka.” 11Tahema ngaira ka kasira na mane ramo, ka hagatutunguhira igê na tagaraha, hanana siana ka gunaguna ni urapusira. Vikê na Isiraelita ka tagarahirerua na hinua raha i Pitome me Ramesesi tanga na maneraha, hanana i nakanaka igê na ngauha. 12Naka ma na ai ni Esipito ka ama ni hagamamasiagara nga na Isiraelita, ma na Isiraelita ka ama ni tataka nga ma ka ama ni manasia nga i Esipito. Na ai ni Esipito ka haganega ka magutenira na Isirealita, 13-14ma ka erasia ngavê na ogaha iata ma ka ramusira, hanana viga tagara bâraha. Ngaira ka tugurira, ka tagarahigi na hinua, na ruma ma na mu, ma ka pe tako rugu rârâ renira.
15Ma na maneraha i Esipito ki tamasi nikâ tangarerua ka Sipara ma ka Pua, na gete ni hagaparaha iata na gete na Isiraelita. 16Ngaia ki bonasirerua, ki vi: “Matena muru hagaparara na gete na Isiraelita, ki tuguhigamurua, muru nanahuira na kareta ka meme, manga vi na kare mane, nga noga ma na kare hehene kamuru nakara mavê.” 17Ma na gete ni hagaparaha ngegê karu hagahigasia God. Tahema garu pe tê viteana na maneraha. Ngairerua karu nakara mavê nogata na kare mane ngegê. 18Vikana na maneraha ki unirerua na gete ni hagaparaha ngegê ma ki hagatererua, ki vi: “Tanu hega muru kato vikana? Tanu hega muru pe nahuira na kare mane?”
19Ngairerua karu arami, karu vi: “Na gete na Isiraelita ka pe mangara na gete ni Esipito. Na gete na Isiraelita ki asa vige harahara bâraha renira na kareta. Ngaira ka gasuga ni apara, ma hemuri na hitangimirua mataruhia vê.” 20-21Suria na gete ni hagaparaha ngegê karu hagahigasia God, tahema God ki koro tangarerua ma ki haganahunirerua renira na raraha iaterua mareterua. Na Isiraelita ka ama ni tataka nga ma ka raramohaga. 22Tahema na maneraha i Esipito ki bonasira ngaira hato na ai ni Esipito, ki vi: “Mu kasira nga na ara ni kareta mane haoru hato na Isiraelita i ve i Nile, ka totono ka meme igê, ma na ara ni kare hehene kamu nakara mavê.”
Currently Selected:
TAHINGA 1: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
