ESEKIELE 34
34
Na enoni raha i Isiraele ka pe gagêmaga
1Na Araha ki tamasi tangê, ki vi: 2“Igo, karena enoni ma, gu ranganira na enoni raha i Isiraele. Gu tamasi poropete tangara, ku hagarongora renigi na tamasinga iaku. Inê na Araha God kê vi vikê: I page era ngavê tangagamu, igamu na enoni raha. Igamu ki tuguhigamu, vigamu bâbâsurira hete na Isiraelita, manga na avanu ni sipi i marupera maninga na sipi iana. Ma igamu kamu takusigamu maremi ma, ma ki mareha ngavê, vigamu botage renira na sipi iami. 3Igamu kamu tono na susuta. Igamu kamu gahu renigi na gahu, mu tagarahigi renigi na varehuta. Igamu kamu nahuira na ani ga binibinikaga ma kamu ngaura. Ma ki mareha ngavê, vigamu botage renira na sipi. 4Igamu kamu pe marupera hete na ani ga memega, se vigamu hagakomagara na ani ga maeha, se vigamu baraigi na maara iata na ani ga mamari, se vigamu torera ata na ani ga tarupe, ma kamu pe girara na ani ga tasi. Igamu kamu katora bera ma, ma kamu pe takira. 5Suria na sipi ki mareha na avanuta, tahema ngaira ka totoko, ma na marâ vasiga ka ngaura. 6Tahema na sipi iaku ka oga vataraha igê na hungani ma na barani. Ngaira ka totoko suria na maveta hagenani, ma ki mareha ta na enoni, vige botage renira, hanana vige garira.
7“Hoita, igamu na enoni raha, na avanu ni sipi, mu karingê, inê na Araha. 8Inê kê tohe reniê mareku, inê na Araha God mamauri. Mu karingê manga mu hanana. Na marâ vasiga ka tarigenira na sipi iaku, ma ka ngêra, suria i mareha na avanuta. Na avanu ni sipi iaku ka pe botage, vige garira na sipi iaku. Ngaira ka takusira mareta ma, ma na sipi ki mareha. 9Hoi, mu karingê, igamu na avanu ni sipi. 10Inê na Araha God be vi, inê ka na merongami. Inê be torera aporo na sipi iaku tenigamu. I hato iami, vigamu avanuta nikâ. Ma ki hato iami nikâ, vigamu takusigamu ma maremi. Inê be hagatahira na sipi iaku tenigamu, hanana siana kamu ngaura.”
Na Araha ki bâsurira maninga na sipi iana
11Na Araha God ki vi: “Inê mareku be garira na sipi iaku ma be bâsurira. 12Inê be manga na avanu ni sipi, i garira na sipi iana, matena ga totoko, ki hagahakura aporo, ma ki bâsurira maninga. Inê be torera aporo tenigi na agua hato, ga totoko surigi igê na tangiana ni mengo ma ni bagabevoani. 13Inê be torera hura tenigi na agua, ga mamahuara igê. Inê be hagahakura aporo i pasita. Inê be bêngenira aporo tange na hungani ma na ve i Isiraele, ma be hagangêra igê na pariki ni go koro. 14Ngaira ka page ngêngê igê na hungani i Isiraele. Ngaira ka page mamaro igê na tarihani, i gahuigi na go. Ngaira ka page ngêngê igê na maruguni ma igê na bena ni go koro suria i Isiraele. 15Inê mareku be bâsurira na sipi iaku ma be hagamamarora igê na agua koro. Ngaia kani gê visia, inê na Araha God.
16“Inê be garira na ani ga tarupe, ma be torera ata na ani ga tasi, ma be baraigi na maara iata na ani ga mamari, ma be hagakomagara na ani ga maeha. Inê be hagaotora na ani ga binibinikaga ma ka ramo, suria inê ka na morana na avanu ni sipi, gê bâsurira igê na otoha.
17“Hoita, sipi iaku, inê na Araha God, inê kê vi tangagamu, vi inê be suria na ara ni hitangimi, ma be voasigamu na ani koro tenia na ani era, na sipi tenira na goti. 18Tani na hitangimi ka ngêgi na go koro, ma ki pe tungira, ma igamu kamu puhuritagenigi nikâ na go getigi, ga hita so. Igamu kamu tonomigi na ve marava, ma kamu hagameragi na ve, na agua ga hita râ. 19Tahema na ani getera na sipi iaku ka ngêgi ma na go, mu puhuritagenigi, ma ka tonomigi ma na ve, mu katogi ki amera.
20“Hoita, inê na Araha God kê vi, vi ve surigamu, igamu na sipi binibinikaga, ma na ani mu rataga. 21Igamu na ani binibinikaga mu sukurira râ na ani ga pe ramo, ma kamu surera hura tenia na totoha, ma ka totoko. 22Ma inê be hagatahira na sipi iaku, hanana i hato, vige katora bera nikâ. Inê be surira na ara ni hitangita na sipi iaku, ma be voasira na ani koro tenia na ani era. 23Inê be atea tangara na ani gi tage na avanuta, ke maneraha iata manga na kariaku o Tavite. Ngaia ki page marupera, ma ki page bêngenira maninga. 24Inê nga na Araha kê God iata, ma na maneraha ki page marungira manga na kariaku o Tavite. Ngaia kani gê visia, inê na Araha.
25“Inê be naka na suruheri henira, hanana viga gâga igê na ramana. Inê be tarigenira hura na marâ vasiga, ga garagara hunu, tenia na agua, hanana na sipi iaku ka gâga suri parongata igê na bena, ma ka mauruhigi na vapuni. 26Inê be vatera na ramana. Ngaira ka page oga hagarangia na hungana apuna iaku. Inê be vatera na rangi, matena ga obania. 27Na apinige ka page rasirasi. Na mu ka page ganora ngavê. Ngaira hato ka page oga suri parongata igê na mako iata mareta. Inê be musigi na seni tenira na kariaku, hanana ga ura mareta, mareha vi i ruguhata na ani, ga katora re na kare rakuraku. Vikana ngaira ka page tahetara reniê, vi inê ka na Araha. 28Na ai ni agua getigi ki hato, vige page hanagora nikâ, ma na marâ vasiga ki hato, vige page ngêra nikâ. Ngaira ka page oga igê na ramana, ma ki asa ta na enoni, vige page hagamagusira nikâ. 29Inê be haganahunira renigi na mako koro, ma na magêha ki page magahuru tenia na agua. Na enoni i na agua getigi ki hato, vige page meramarabe nikâ. 30Na enoni hato ka page tahetara reniê, vi inê kani gê anumasira na Isiraelita, ma ngaira ka na kariaku. Ngaia kani gê visia, inê na Araha God.
31“Igamu, na sipi iaku, na togoha iaku gê hagangêgamu, igamu nga ka na kariaku, ma inê nga ka na God iami. Ngaia kani gê visia, inê na Araha God.”
Currently Selected:
ESEKIELE 34: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
