ESEKIELE 33
33
Na Araha ki kasia o Esekiele ki mane ni anumasiha
(Esekiele 3.16-21)
1Na Araha ki tamasi tangê, ki vi: 2“Igo, karena enoni ma, gu hagarongora na kariamu renia na tarana, i page voravora me, matena gê naka na hearihatana, i page tarahua igê ta na agua. Na enoni igê na agua ngekana ngaira ka page kasia tani na hitangita, ki voravora re na mane ni anumasiha. 3Matena i girara, vi na merongata ka râ me noga, ngaia ki uhia na ahuri, hanana i hagananêra na enoni. 4Manga ta na enoni, ma ki rongorongo purupuru renia na ahuri, ma na merongana ka arâ me ka nahuia ki meme, hoi, i ngekana ka na tauhana marena. 5Ngaia ki me suri tauhana marena, suria i rongorongo purupuru renia na ahuri. Manga vi ngaia ma ke hinaru, vikê ngaia ke tahi. 6Ma ki manga vi na mane ni anumasiha ma ki girara, vi na merongata ka râ me noga, ma ki pe uhia na ahuri, hanana vige hagananêra na enoni, hoi, na merongata ka arâ me, ma ka nahuira ka meme suria na tauhana ngaia. I ngekana inê kê page hagaitangia na mane ni anumasiha renigi na mera iata.
7“Hoita, igo karena enoni ma, inê be kasigo, ku mane ni anumasiha iata na Isiraelita. Gu hagatarêngenigi na haganunuha iaku tangara. 8Manga vi inê, ma kê vi, vi na enoni era ki page meme, ma igo ko pe haganunua, ke urisi parongana, hanana vige tahitahi, ngaia ki page meme igê na tasi iana. Ma i ngekana inê be torego igê na tamasinga, suria go hagamesia. 9Ma ki manga vi igo, ma ko haganunua na enoni era, ma ngaia ki ama ni tasitasi nga, ngaia ki page meme igê na tasi iana marena, ma ko page tahi igo.
10“Igo karena enoni ma, gu tamasi tangara na Isiraelita, ku vi: Igamu kamu hagagege tare, kamu vi, ‘Na tasi iamami ma na bagatauhamami ka higegami. Igami kami mameaga renigi. Manga i he kami girara vigami mauri?’ 11Go hagarongora, ku vivi, vi inê kê tohe reniê inê mareku, inê na Araha God gê mauri, vi inê ki asa be vagevagesia na mera iana na enoni era. Inê kê obania hete, vige urisi parongana ma ke tahi. Isiraelita, mu kasigi râ na bagaparongami. Mu urisi parongami. Tanu hega kamu obania, vigamu meme?
12“Hoi, igo karena enoni ma, gu hagarongora na Isiraelita, vi manga na enoni, i koro ma ki oto na parongana, ma ki haganega ki bagaparongana, na parongana koro ngekana ki asa, vige hagatahia. Manga vi na enoni na bagaparongana, ma ki haganega ki paronga koro, ngaia ki asa, vige tarahua na hagaitangiha. Manga vi na enoni, i koro ma ki oto na parongana, ma ki haganega ki bagaparongana, ngaia ki asa vige tahi, henaka vi ngaia ki paronga koro i nago. 13Manga vi inê, ma kê surua na mêriha tanga na enoni, i koro ma ki oto na parongana, ma ki manga vi ngaia, ma ki vi, vi na parongana koro ki bani oga, tahema i bagaparongana, hoi, inê ki asa be takusigi na bani parongana koro i ago. Ngaia ki meme renigi hete na bagaparongana. 14Hoi, inê ma kê haganunua na enoni na bagaparongana, vi ngaia ki page meme, ma ngaia ki kasigi râ na bagaparongana, ma ki haganega ki katogi na tarani, ga koro ma ka oto. 15Na hagararinga: Ngaia ki vatea aporo na hetagetageha tangara na enoni, ga barugi aporo na kaone iata tenia, se ngaia ki hagapurusigi na marâ, i hanagogi. Manga vi ngaia, ma ki urisigi na bagaparongana, ma ki tototo surigi na ramata ni mauriha, ngaia ki asa, vige page me. Ngaia ki page mauri hete. 16Inê kê page bonotenigi na bagaparongana, ma ngaia ki page mauri, suria ngaia ki katogi na tarani, ga koro ma ka oto.
17“Ma na kariamu ka vi, vi na tauhaku ki pe oto. Ma na tauhata ngaira hete kani pe oto. 18Manga vi na enoni, i koro ma ki oto na parongana, ki katogi na tarani, ga pe koro ma ka pe oto, ngaia ki page me renigi. 19Manga vi na enoni na bagaparongana, ma ki urisi parongana, ki katogi na tarani, ga koro ma ka oto, ngaia ki page tahi. 20Ma igamu na Isiraelita, igamu kamu vi, vi na tauhaku inê ki pe oto. Inê be suria na ara ni hitangimi renigi na tauhana ngaia marena.”
Na rongoha renia i Jerusaleme i vota
21Ki na rimata na tangiana igê na tangahuruta na hageha igê na tangahuruta matarerua na harisi, ga bani henahuraugami surigi. Ta na mane, i gava me tenia i Jerusaleme, i râ me i pasiku. Ngaia ki hagarongoê, vi Jerusaleme ki vota. 22I nago na tarana na manurahitana i gava igê, na raramohana na Araha ki angariê, ma kê bi. Matena na mane ki ata me i tangi râ, na Araha ki katoê, kê kahu tamasi aporo.
Na tasi iata na enoni
23Na Araha ki tamasi tangê, ki vi: 24“Igo, karena enoni ma, na enoni surigi na hinua, ga aruhuruhu i Isiraele, ka vi, ‘O Abaramo ka na vere tagena ma, ma ki nahunia na agua hagenani. Ma igia ka rako ngavê, tahema na agua ki na anika nga igia tagenaka.’
25“Gu hagarongora renigi na tamasinga iaku tangara. Inê na Araha God kê vi: Igamu kamu ngaugi na ganiani gagapugaga. Igamu kamu hagarapera na ataro. Igamu kamu nahu enoni. Ma ki tanu hega kamu vi, vi na apanena iami kani ikê? 26Igamu kamu hagêguri togo renigi na tangaruha. Igamu kamu bagatauhami ngavê. Igamu hato kamu gamogamo. Tanu hega mu vi, vi na apanena iami kani ikê?
27“Gu hagarongora, vi inê na Araha God kê haganunura, vi na enoni surigi na hinua, ga aruhuruhu, ka page meme igê na hearihatana. Inê kê tohe reniê mareku, inê na God mamauri. Na marâ vasiga ka page ngaura na enoni, ga oga i bemu. Na ani, ga ahi igê na hungani ma igê na vaba, ka page me renia na ringa. 28Inê be ruhuruhua na agua, ke hihiruga. Na raramohata, ga ageagesia, ki page hato. Na hungani i Isiraele ka page hagamakuku, ma ki asa ta na enoni, vige aharêvoro igê. 29Inê be hagaitangira na enoni meni na bagaparongata, ma be ruhuruhua na agua, ke hihiruga. Vikana ngaira ka page tahetara reniê, vi inê ka na Araha.”
Na enoni ka pe râ suria na tamasinga iana na poropete
30Na Araha ki vi: “Igo, karena enoni ma, na kariamu ka tamasigo, matena ga hetarahu igê na para ni hinua, se na maani ruma iata. Ngaira ka harigoe, ka vi, ‘Nika, ge râ ke rongoa na tamasinga ta nikâ ki râ me tenia na Araha.’ 31Ngaira ka hakurigo, go tamasi. Ngaira ka oga so ka karingago, ma ki asa vige katogi rârâ ta na marâ, go bonasira renigi. Henaka na harata ki rongo koro era, ma ngaira ka nakanaka bêta bâraha ma. 32I maata igo ko manga ma na mane ni hagamamaniha, i kirigi na barokiha, i marava na ringena ma ki tahurugi na gita. Ngaira ka karingagi na ara ni tamasinga hato iamu. Henaka, ma ngaira ki bara ngavê, vige râ suria na ani gi tage ma. 33Na na matena ga moramora igê na tamasinga iamu – ma ngaigi ki page vagavaga me mave nga – ngaira ka page tahetara renia, vi na poropete ki oga i berarogata.”
Currently Selected:
ESEKIELE 33: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
