ESEKIELE 32
32
Na maneraha ni Esipito ki maratorana na hua
1Ki na tangiana gi tage igê na tangahuruta matarerua na hageha igê na tangahuruta matarerua na harisi, ga bani henahuraugami surigi. Na Araha ki tamasi tangê, ki vi: 2“Igo, karena enoni ma, gu angi maramara renia na maneraha ni Esipito, ko vivi:
“Igo ko vi, vi igo ko manga na laione,
go marungira na enoni i maveta.
Ma igo ko matarorana ma na hua.
Gu hengo tenia na ve.
Gu karoa na ve ke amera.
Gu hagamoga na ve.
3Ma inê na Araha God be vi tangago,
inê kê page kasia na hugo hurigo.
Matena ga hakuhaku me na agua rako getigi,
ngaira ka page okego mamata akê.
4Inê be karangigo so i ano
ma be hagangêra na manu hato
ma na marâ vasiga renigo.
5Inê be tokorenigi na hasigomu surigi na hungani
ma be hagavunusigi na maruguni renigi na kakagamu.
6Inê be karangia so na gapumu i ano,
mataro me ki anuigi na hungani
ma ki vunuvunu renigi na ve.
7Matena gê nahunahu hunigo,
inê be hagarotoa na vavearo
ma be buhigi na mavetani na higu.
Na arito ki page pinihi igê na vaha
ma na hageha ki hato, vige page mave.
8Inê be hunuigi na marâ hato ga mave i vavearo,
ma na mengo ki page buhia na apanena iamu.
Ngaia kani gê visia, inê na Araha God.
9“Na agua hato ka page gasuga,
matena gê hagarongora igê renia vigo vota.
Na agua hagatê ka page anumanuma,
na agua go pe rongo kuruhani me rârâ i nago.
10Na tarana, i tarahugo,
ki page hagagasuganira rako na agua.
Matena gê tahurungenia igê na tatapa boraha iaku,
na maneraha igê ka page bubununuga.
Igê na tangiana go votavota igê
ngaira hato ka page tatata,
suria ga vi, viga meme nogata.
11“Inê na Araha God kê vi:
Maneraha ni Esipito,
na maneraha ni Babilonia henira na mane ni me iana
ka page megamu heariha, igo ma na kariamu.
12Ngaira ka page aharigamu.
Ngaira ka page hagatavatavagamu,
ma ki asa vige hetaki.
Ngaira ka page mutera ngavê na kariamu hato,
ma ka page hagaerasigi na marâ hato, go ageagesigi.
13Inê be nahuira ke me na togoha hato iamu
igê na agua ni tonoha iata.
Na enoni ma na togoha ki hato,
vige page katoa nikâ na ve, ke amera.
14Ma hemuri inê be hagamaravagi aporo na ve,
ke ogogo suri parongani.
Ngaia kani gê visia, inê na Araha God.
15Inê be ruhuruhua i Esipito
ma be katoa ke hihiruga ngavê.
Vikana ngaira ka page tahetara reniê,
vi inê ka na Araha.
16“Ngaia nga ka na angiha maramara renia i Esipito. Na gete i na agua getigi ka page kiria, hanana ga angiangi maramara renia i Esipito henira na enoni hato igê. Ngaia kani gê visia, inê na Araha God.”
Na agua iata na enoni ga bani me
17Ki na tangahuruta matare rima na tangiana igê na hageha gi tage igê na tangahuruta matarerua na harisi, ga bani henahuraugami surigi. Na Araha ki tamasi tangê, ki vi: 18“Igo, karena enoni ma, gu angi maramara renira na enoni hato i Esipito. Gu mesira, matena ga soso henira na marê raramohaga i na agua iata na enoni, ga bani me. 19Go vi tangara vikê:
“Mu takusia vari,
vi igamu kamu teharira na enoni getera?
Igamu kamu soso nga hete
igê na agua iata na enoni ga bani me
henira na enoni erataga.
20“Na ai ni Esipito ka page me henira na ani, ga meme igê na henahuita. Na tatapa borahu ki nanêra ngaira hato 21Na mane ni me ramo ma na ani, ga tamania i Esipito, ka unira banu igê na agua iata na enoni, ga bani me. Ngaira ka ngere, ka vi: ‘Na enoni erataga ka bani so me ikê. Ngaira ka me igê na hearihatana. Ngaira kani ga tâtâ ikê!’
22“Na ai ni Asiria i ngekana. Na maneraha iata ma na anoanota na mane ni me iana ka tâ rihia. Ngaira hato ka me igê na henahuita. 23Na anoanota ka oga igê na rutuni na agua iata na enoni, ga bani me. Na mane ni me hato iana ka me igê na hearihatana, ma na anoanota ka tâ rihia na anoanona, henaka i nago ngaira ka hagamagusira ngavê na enoni i maveta, matena ga tahitahi mêngara.
24“Na ai ni Elama i ngekana. Na maneraha iata ma na anoanota na mane ni me iana ka tâ rihia. Ngaira hato ka me igê na henahuita. Ngaira ka erataga ma ka so igê na agua iata na enoni, ga bani me. Matena ga tahitahi mêngara ngaira ka hagamamagura, ma i ngêke ngaira ka me ma ka maki. 25Na maneraha ni Elama ki me ma ki tâ henira na ani, ga me igê na henahuita, ma na matuhata na mane ni me iana ka tâ rihia. Ngaira hato ka erataga ma ka me igê na hearihatana. Matena ga tahitahi mêngara, ngaira ka hagamamagura, ma i ngekê ngaira ka me ma ka maki, mangara na ani ga me igê na hearihatana.
26“Na ai ni Meseki me Tubala i ngekana. Na maneraha iata ma na anoanota na mane ni me iana ka tâ rihia. Ngaira hato ka erataga ma ka me igê na henahuita, henaka i nago ngaira ka hagamamagura, matena ga tahitahi mêngara. 27Ngaira ka ata ni bagira purua mavê, mareha vige bagira mangara na maneraha i nago, ga tangaru, matena ga so igê na agua iata na enoni ga me. Ngaira ka bêbê renigi na tatapa borahu ma ka ngahingahi renigi na bêata. Matena ga tahitahi mêngara na maneraha ngegana, ngaira ka raramohaga ngavê, ma ka hagamamagura.
28“Igamu nikâ na ai ni Esipito, mu page so i ngekana. Igamu ka page ninigamu, kamu tâtâ henira na enoni erataga, ga bani me igê na hearihatana.
29“Na ai ni Etome i ngekana henira na maneraha ma na meraha iata. Ngaira ka na mane ni me ramo, ma i ngekê ngaira ka tâ igê na agua iata na enoni, ga bani me, henira na enoni erataga, ga me igê na hearihatana.
30“Na maneraha ni agua getigi ngekana henira na ai ni Sitone. Ngaira ka raramohaga ma ka hagamamagura, ma i ngekê ngaira ka me ma ka maki, ma ka tâ henira na ani, ga me igê na hearihatana. Ngaira ka erataga, ka me, ma ka bagira. Ngaira ka maki henira na ani, ga so igê na agua iata na enoni, ga bani me.
31“Na maneraha ni Esipito ma na mane ni me iana ka obakoro, matena ga bâsira ngaira hato, ga me igê na hearihatana. Ngaia kani gê visia, inê na Araha God.
32“Inê kê hagamarumungenia na maneraha ni Esipito, hanana i hagamamagura, matena i tahitahi mênga, ma ngaia henira na mane ni me iana ka page meme igê na hearihatana, ma ki tâtâ henira na enoni erataga, ga me igê na henahuita. Ngaia kani gê visia, inê na Araha God.”
Currently Selected:
ESEKIELE 32: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
