ESEKIELE 31
31
I Esipito ki maratorana na apinige raha
1Ki na tangiana gi tage igê na oruta na hageha igê na tangahuruta matare tage na harisi, ga bani henahuragami surigi. Na Araha ki tamasi tangê, ki vi: 2“Igo, karena enoni ma, gu tamasi urusiê tangara na maneraha ni Esipito ma na kariana hato, ko vivi:
“Maneraha, go raramohaga hunigo taraha!
Na ta be hagararingenigo renia?
3Igo ko maratorana na apinige raha i Libanone,
i bâkoro ma ki arubebe ma ki usu matava.
4Ngaia ki ura i papana na ve.
Ngaia ki akê igê na mako magarohaga.
Na ve i rarona na mako ki hagamêria
ma ki hagamêrigi nikâ na vagani
na apinige hato igê na vapuna.
5Suria i ura igê na mako magarohaga,
ngaia ki akê ki borahu
teharigi na ara ni apinige hato getigi.
Na arana ka raha, ka nganganihaga, ma ka borahu.
6Na ani mavê na manu ka roborobo
ma ka beabeba igê na arani.
Na marâ vasiga ka agusi i ruguhana.
Na enoni i maveta ka mamaro igê na mamarugana.
7Ngaia ki bâkoro ngavê,
ki usu matava ma ki borahu na arani.
Na vagani ka kanu ngavê, ka tarahugi na ve.
8I mareha rârâ ta na apinige iaku,
vige maratorana.
I mareha rârâ na arani ta na apinige,
vige matarotani na arana.
Na kakamuni ki bâkoro teharigi
na kakamuni na apinige hato getigi.
I mareha rârâ ta na apinige iaku
vige bâkoro vikana.
9Inê nga kani gê hagabâkoroa
renigi na arani ga arubebe.
Na ara ni apinige i Etene ka hengaria.
10“Hoita, inê na Araha God, inê be hagarongogamu renigi na tarani, ga page tarahua na apinige, i usu matava ngekana. Matena i ama ni raharaha nga ki akê, ngaia ki ama ni paroparo nga. 11Tahema inê kê usitenia, ma be haganahunia renia na maneraha i na agua getea, i page vatea renia na meni na bagaparongana. 12Na mamahuara, ka page hagatavatava, ka page tapia so ma ka naka vê. Na arani ma na kakamogani, ga babaro, ka page totoko agani surigi na ara ni hungani ma na maruguni igê na agua. Na enoni i na agua getigi, ga bani oga i mamarugana, ka page gava. 13Na manu ka page râ me ma ka page tagetage igê na apena, i tâ i ano, ma na marâ vasiga ka page purigi na arani. 14Ma ki haganega tenia i ngekê, ki mareha rârâ ta na apinige, vige akê ke borahu vikana, se vige usu matava, se vige mehearari, naka ma vige ura igê na mako magarohaga. Ngaigi hato ki tâ tanga meme manga na enoni. Ngaigi ki mangara na enoni, i tâ tangara, viga arâ igê na agua iata na enoni, ga bani me.”
15Na Araha God ki vi vikê: “Igê na matena na apinige ki arâ igê na agua iata na enoni, ga bani me, inê be katogi na ve i rarona na ano, ke aharêsia, manga vi hanana ga angiangi maramara renia. Inê be hagamamatarigi na ve, hanana ga voravora re na marave. Inê be gahuigi na hungani i Libanone renia na mengo, ma be hagamesigi na apinige hato igê na vapuna, suria na apinige igê ngekana ki bani me. 16Matena gê kasia vato igê na agua iata na enoni, ga bani me, na avavana ki page hagakangira na enoni hato i maveta. Na ara ni apinige hato i Etene ma na apinige hato i Libanone, ga bâkoro ngavê, ma ka ura igê na mako magarohaga ma ka bani oga igê na agua iata na enoni, ga bani me, ngaira hato ka page manavatenia, suria i baro. 17Ngaigi ki page arâ henia igê na agua iata na ani ga bani me, hanana ga hakunira na ani, ga bani me igê na henahuita, henira na enoni hato i na agua getigi, ga oga i mamarugana ma ka pane henia.
18“I mareha rârâ vi ta na apinige i Etene, vige usu matava ma ke bagararaha manga na ani ngekana. Igo, maneraha ni Esipito, ka na apinige ngekana. Tagenana mangagi na apinige i Etene, igo nogamu ko maratorani na apinige i Etene. Igo ko page soso igê na agua iata na enoni ga bani me, ma igo henira na kariamu hato kamu page hakunira na enoni erataga, ga bani me igê na hearihatana. Ngaia kani gê visia, inê na Araha God.”
Currently Selected:
ESEKIELE 31: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
