ESEKIELE 30
30
Na Araha ki page hagaitangia i Esipito
1Na Araha ki tamasi tangê nikâ, ki vi: 2“Igo, karena enoni ma, gu tamasi poropete ma ko hagarongora na ai ni Esipito renia na tamasinga iaku. Inê na Araha God kê vi vikê:
“Angiangi raha!
I page era ngavê na hagaitangiha.
3I râ me noga na tangiana tanga.
I sugia ma na matena tanga na Araha,
i hagaitangira igê na enoni.
Na tangiana ni mengo ma ni bagabevoani!
4Na henahuita ki page tarahua i Esipito.
I Etiopia ka page bubununuga.
Rako na ai ni Esipito ka page meme.
Ka page hanagogi hato na ruruguha i na agua.
Na agua ki page aruhuruhu.
5Na mane ni me i na agua getigi,
ga tamania i Esipito,
na me ni Etiopia, ni Libia ni Litia,
ni Arabia, ni Kubu me tani nikâ,
ngaira ka page me igê na henahuita.”
6Na Araha ki vi: “Ngaira hato, ga pane henia i Esipito, haganega tenia i Migitore igê na tarasini, tariha i Asavane i toro, ngaira ka page meme igê na henahuita. Na mane ni me ramo i Esipito ka page mutemute. Ngaia kani gê visia, inê na Araha God. 7Na agua ki page hihuruga ngavê, na hihirugana ga pe rongo kuruhana rârâ i nago. Na hinua igê ka page aruhuruhu ngavê. 8Inê be sungia i Esipito, ma be mutera na me, ga pane henia. Vikana ngaira ka page tahetara reniê, vi inê ka na Araha.
9“Igê na tangiana gê hagaitangia ngavê igê i Esipito, inê be hagatorangenira igê na haka na mane tora tamasinga tanga i Etiopia, hanana ga hagakangia. Ngaira ka page bubununuga. I page râ me nga na matena ngekana.”
10Na Araha God ki vi: “Inê be hagatorangenia o Nebukanesa na maneraha ni Babilonia, ki rurugugi na ruruguha hato tenia i Esipito. 11Ngaia ma na mane ni me iana ka page ruhuruhua ngavê na agua. I asa iata vige hetaki. Ngaira ka page ahurara na ai ni Esipito, ma na gahuata ka page manasia na agua hagenani. 12Inê be hagamamataria na ve i Nile, ma be nakara na mane era ke marungia i Esipito. Na me i na agua getigi ka page hagaerasia ngavê na agua hagenani. Ngaia kani gê visia, inê na Araha.”
13Na Araha ki vi: “Inê be kumukumugigi na nunuta na ataro, ma be paira hura na ataro hagaparu tenia i Memepisi. I mareha rârâ ta na maneraha, vige page marungia i Esipito, ma na enoni hato igê ka page bubununuga ngavê. 14Inê be katoa, ke hihiruga i Esipito na apanena i toro, ma be sungia ke makaka na hinua i Soane igê na tarasini. Inê be hagaitangira na ai ni hinua raha i Tebesi. 15Igê na mangariaganiha raha iaku inê be hagaitangia na hinua nganganihaga ngavê i Pelusia. Inê be ruhuruhua na hinua i Tebesi, i ruruguha ngavê. 16Inê be sungia i Esipito, ma i Pelusia ki page amenamena ngavê. Na para ni hinua i Tebesi ka page ahogehoge ma na ve ki page anuia. 17Na mane na gapu haoru ni hinua i Heliopoli me Bubasiti ka page meme igê na hearihatana, ma ka page henahuraura na enoni getera. 18I page era ngavê tanga i Tagapanegesi, matena gê hatungia igê na raramohata na ai ni Esipito ma kê mutera igê na mane ni me iata, ga ageagesira. Na mengo ki page buhia i Esipito hagenani, ma ka page henahuraura na enoni hato surigi na hinua igê. 19Ngaia nga na hagaitangiha tanga i Esipito. Vikana ngaira ka page tahetara reniê, vi inê ka na Araha.”
Na raramohana na maneraha i Esipito ki hato
20Ki na pita na tangiana igê na hageha gi tage igê na tangahuruta matare tage na harisi, ga bani henahuraugami surigi. Na Araha ki tamasi tangê, ki vi: 21“Igo, karena enoni ma, inê kê bani barugia na rimana na maneraha i Esipito. I mareha ta na enoni, vige baraia, se vige hagahaga tanga, hanana vige komaga aporo, ma ke ramoramo aporo, hanana vige taua na tatapa borahu. 22Hoi, inê na Araha God kê vi vikê. Inê kê merongasia na maneraha ni Esipito. Inê be barugirerua hato na rimana, na ani i komaga ma na ani i bani magi, ma na tatapa borahu ki page vasivasi tenia na rimana. 23Inê be tokorenira na ai ni Esipito surigi na agua hato i maveta. 24Inê be hagaramonirerua na rimana na maneraha ni Babilonia, karu ramo, hanana i taua gatagata na tatapa borahu iaku. 25Inê be barugirerua na rimana na maneraha ni Esipito, ma ngaia ki page gegege, ma be hagaramonia na maneraha ni Babilonia. Matena i taua na tatapa borahu iaku ma ki usuia i Esipito renia, na enoni hato ka page tahetara reniê, vi inê ka na Araha. 26Inê be tokorenira na ai ni Esipito suria na maveta hagenani, hanana ge mamahuara igê na agua getigi. Vikana ngaira ka page tahetara reniê, vi inê ka na Araha.”
Currently Selected:
ESEKIELE 30: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
