ESEKIELE 27
27
Na ki ni hetakiha renia i Taire
1Na Araha ki tamasi tangê, ki vi: 2“Igo, karena enoni ma, gu kiria na ki ni hetakiha renia i Taire. 3Ngaia ki na hinua raha ni sugu ma ni manitava. Ngaia ki katogi na tagaraha ni hagavarahi haga henira na marê hagatê. Inê na Araha God kê vi vikê:
“Taire, igo ko ageagesia na bâkorohamu.
Igo ko vi, vi igo ko koro teha ngavê.
4Igo ko marungigi na asi hato.
Igo ko manga na haka, i bâkoro ngavê.
5Na apemu ka tagarahia renigi na apinige,
ga tapigi igê na hungana i Heremone.
Na masi iamu ka tagarahia
renia na apinige borahu i Libanone.
6Ga tahegi na vote iamu
renigi na hata ni Basani.
Na ge haruta iamu ka tagarahigi
renigi na apinige ni Saipero
ma ka parugi reoreoga.
7Na rohebana iamu ka tagarahigi
renigi na gahu siki ni Esipito,
ga turagi igê na marâ, i bâkoro era.
Vikê ka bani bâbâgirarago râ hagatê.
Na mamaruku iamu ka tagarahigi
renigi na gahu, na ani koro teha ngavê,
na gahu rotorotoaga memera ni Saipero.
8Na mane ni harutanga iamu
ka na mane ni Sitone me Aravata.
Na mane i pasimu ka torea na haka,
suria ga manisingenia na asi.
9I rarona ka oga igê na mane ni Bibilose,
ga manisingenigi na tahenga ma na puruha.
“Na ara ni haka raha tenigi na marê hagatê ka arâ me tangago, ka hohoro. 10Na mane ni me iamu ka na mane ni Pesia, ni Litia me Libia. Ngaira ka kahugi na bêata ma na bubuhibê iata igê na apê na ruma iata i pasimu. Ngaira nga ka na ani ga katoa na atamu, ki rongo raha. 11Na mane ni me ni Aravata me Geliki ka anumasigi na para, ma na mane ni me ni Gamata ka bâsurigi na bebetehe iamu. Ngaira ka kuhagi na bêata iata igê na para iamu. Ngaira nga ka na ani ga hagabâkorogo ngavê.
12“Igo ma na enoni rako i na agua getigi kamu tage hohoro heri. Igo ko hohorongenigi na marâ rako i pasimu renigi na siliva, na aiani, na kapa ma na poro tenira na ai ni Sipeni. 13Igo ko hohorongenigi na marâ iamu renira na kare rakuraku ma renigi na marâ ni aiani tenira na ai ni Agaia, me Tubala me Meseki. 14Igo ko hohorongenigi na marâ iamu renira na hosi ni tagaraniha, ma na hosi ni me ma na tonki tenira na ai ni Bete Togarama. 15Igo ma na enoni ni Rotose kamu tage hohoro heri. Igo ko hohorongenigi na marâ iamu renigi na rivonega ma na apinige na pou. 16Na ai ni Siria ka vuri rako era na marâ tenigo renigi na marâ, ga tagarahigi, hanana vigo hagavuringenigi ka vurivuri tenigo renigi na hê maravarava, na gahu ga turagi igê na marâ, i bâkoro, na gahu siki, na ahu, ma na hê ahe memera. 17Na ai ni Juta me Isiraele ka vuri tenigo renigi na koni, na pirui, na oile ni olive, ma na oile ni vanuniha koro. 18Na ai ni Tamasiko ka vurigi rako era tenigo na marâ, ga tagarahigi, hanana vigo hagavuringenigi, ma ka vurivuri renigi na vaini ni Gelibone ma na varehuta na sipi ni Sokare, 19ma na aiani ni Usala, na marâ ga sigini koro, ma na marâ ga ngê koro renigi na ngêra. 20Na ai ni Tetane ka vuri tenigo renigi na gahu upupuga, ga vatarangenigi igê na âgâga i gerita na hosi. 21Na ai ni Arabia ma na maneraha i Ketare ka vuri tenigo renira na kareta na sipi ma na goti, ma na ani mane raha. 22Na mane ni hagavaraha haga ni Seba me Rama ka vuri tenigo renigi na hê ahe i bâkoro, na golo ma na marâ ga sigini koro ngavê. 23Na hinua i Harane me Kane me Etene, na mane ni hagavaraha haga ni Seba, ni Asure me Kilimata, ngaira ka hagavuri tangago. 24Ngaira ka hagavuringenigi tangago na gahu i raha na meni, na gahu rotorotoaga memera, na gahu ga turagi igê na marâ i bâkoro, na bana totoperoga, ma na varo hirihiri raha. 25Na haka ni toraha i Tasisi ka toregi na marâ, go hagavuringenigi.
“Taire, igo ko manga na haka i kere ataha i asi,
i higego na erutanga raha.
26Na mane ka harutego tanga na matava tara,
ma na târagina ki korogo i ngekana.
27Na ruruguha ma na nahuninga hato iamu,
na marâ hato go vurigi ma ko hagavuringenigi,
na mane ni tagaraha iamu i asi,
na mane iamu ga manisingenigi na tagaraniha ni haka,
na mane hato ni hagaraha haga iamu,
na mane ni me iamu ma na enoni hato igê,
ngaira ka tono kere ataha i asi,
matena i kokoro na haku iamu.
28Na enoni igê na tarasini ka bubununuga,
matena ga rongora, ga ngerengere avaravara raha
na mane tagara iamu igê na haka.
29Na ara ni haka ka baguru,
suria na mane tagara igê ka bani gava i one.
30Ngaira ka angisigo bâraha.
Ngaira ka mesigo ngavê.
Ngaira ka kuhigi na bêta renigi na rahu,
ma ka oga hurihuri so ma i ano.
31Ngaira ka goro bê huri
ma ka hagesuru tatari.
Ngaira ka angi maramara renigo
ma ki rugu bâraha na obata.
32Ngaira ka angi harihari surigo,
suria go magahuru, ka vi,
‘Taire, ti ki maratoramu
igo na hinua go aruhuruhu i asi?’
33Na haka ka toregi na marâ iamu,
go vurigi ma ko hagavuringenigi,
ma ka katora rako na marê,
ka oga igê na ramana.
Igo ko katora na maneraha, ka ruruguha,
suria go hagavuri tangara na marâ iamu.
34Ma i ngekê igo ko kokoro i asi
kere vato igê na rutuna.
Na ara ni nahuninga hato iamu
ma ngaira hato na enoni tagara iamu
ka kokoro henigo igê na rutuni.
35Na enoni hato igê na tarasini
ka gasuga renigo ma ka magu.
Na maneraha iata ka bubununuga nogata
ma i tatata na apeta.
36Na mane ni hagavaraha haga i maveta hagenani
ka manavatenigo ngavê.
I era ngavê!
Na râha su iamu
ki hagamagusira ngavê na enoni.
Igo ki hato iamu tare, ki bê ki arâ.”
Currently Selected:
ESEKIELE 27: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
