ESEKIELE 28

Na tamasinga poropete renia na maneraha ni Taire

1Na Araha ki tamasi tangê, ki vi: 2“Igo, karena enoni ma, gu hagarongoa na maneraha i Taire renia na tamasinga iaku. Go vi tanga, ko vi: Na Araha God ki tamasi vikê. Igo ko paroparo ngavê. Igo ko vi, vi igo ko God. Igo ko vi, vi igo ko oga igê na atohamu manga vi igo ko God, ma na asi ki rihigo. Igo ko maramara God, ma igo ki mareha vi God. Igo ka na enoni ma. 3Igo ko vi, vi igo ko tako mataha teharia o Taniele, ma ko giraragi na ara ni marâ hato, ma ki asa ta na marâ, vige pinihi tenigo. 4Na takoka iamu ma na giraraha iamu ka katogi na golo ma na siliva, ka aharêsigo ngavê. 5Igo ko manisingenigi na tagaraniha ni hagavaraha haga. Tahema go ruruguha. Ma na ruruguha iamu ka katogo, ko paroparo ngavê.

6“Hoi, tahema inê na Araha God kê vi vikê: Suria igo ko vi, vi igo ko tako mataha manga God, 7tahema inê be nakara na merongamu ke taharigo. Ma ki asa hagetage, vige takigo. Ngaira ka page hagaerasigi ngavê na nahuninga hato bâkoro iamu, go bani rurugugi renigi na takoha ma na giraraha iamu. 8Ngaira ka page nahu hunigo ma na matikumu ki page goga i rarona na asi. 9I hega, matena ga arâ me, hanana viga nahunahu hunigo, igo ko ama ni vivi nga vari, vi igo ko God? Matena go meramato hetanga na merongamu, igo ko kahu tahetara, vi igo ko mareha vi God, ma igo ka na enoni ma, i girara i meme. 10Na me tenigi na agua getigi ka page nahigo manga na marâ purua ma. I ngekana nga na katoha iaku, inê na Araha God.”

Na ki renia na maneraha i Taire i vota

11Na Araha ki tamasi tangê nikâ, ki vi: 12“Igo, karena enoni ma, gu angi maramara renia na maneraha ni Taire. Gu hagarongoa renigi na tamasinga iaku. Gu vi tanga, ko vivi: Na Araha ki tamasi vikê:

“I nago igo ko koro teha ngavê.

Igo ko tako mataha ngavê

ma ko bâkoro era.

13Igo ko oga i Etene,

na agua ni ramana iana God.

Na hê ahe ka gahuia na tuguni iamu:

na ani mavê na hê ahe, ga bâ hegetigi,

na ani memera ma na ani maravarava,

na ani toratorakaga ma na ani gagapugaga,

na ani pusupusuga ma na ani misi ni bo.

Igo ko rêni renigi na golo.

Ngaigi ki bani nanêgo,

matena go vora me igê.

14Inê kê naka na angero, hanana i ngahisigo.

Igo ko oga igê na hungana apuna iaku

ma ko arârâ i berarogani na hê ahe i togatoga.

15Na parongamu ki koro teha,

haganega me tenia na matena go vora me igê,

mataro me na matena go haganega ko bagaparongamu igê.

16Igo ko aruma ni hagavaraha haga.

Na tarana ngekana ki hagatasigo

ma ko katogi na tarani, ga pe oto.

Tahema inê kê paigo tenia na hungana apuna iaku,

ma na angero, i ngahisigo,

ki tarigenigo tenigi na hê ahe i togatoga.

17Igo ko paro bâraha renia na bâkorohamu,

ma na atamu ki rongo raha,

ma na tarana ngekana ki hagabekasigo.

18Na tarani na hagavaraha haga, go katogi,

ka pe oto ma ka erasigi na agua ni vogasiha.

Tahema inê kê sungia na hinua, ke makaka.

Na enoni hato, ga bâsigo i ngekê,

ka bâsigi ma na rahugamu.

19Ki hato iamu tare, ki bê ki arâ.

Na enoni hato i maveta, ga aitangisigo,

ka gasuga renigo ma ka mamakuku,

vige tarahura nogata na tarana ngekana.”

Na tamasinga poropete renia i Sitone

20Na Araha ki tamasi tangê, ki vi: 21“Igo, karena enoni ma, gu rangania na hinua i Sitone. 22Hagarongora na ai ni Sitone, vi inê na Araha God, kê vi vikê tangara, kê vi: Ai ni Sitone, inê be merongasigamu. Tahema ki page rongo raha na ataku. Matena gê hagaitangigamu, na enoni hato ka page tahetara reniê, vi inê ka na Araha, vigê koro ma ki oto tare na parongaku. 23Inê be nakagi na ringa ke tarahugamu. Na merongami ka page taharigamu rihigamu. Igamu kamu page meme, ma na gapu ka page manasigi na tara i hinua iami. Ma i ngekana igamu kamu page tahetara reniê, vi inê ka na Araha.”

Na Isiraelita ka page oga aporo igê na ramana

24Na Araha ki vi: “I asa na enoni igê na agua rihia Isiraele, vige page ruhira nikâ na ai ni Isiraele, se vige page erasira mangagi na tone ma na taroa. Ma ngaira ka page tahetara reniê, vi inê ka na Araha God.”

25Na Araha God ki vi: “Inê be torera aporo na ai ni Isiraele tenigi na agua, gê bani tokorenira surigi, ma na enoni hato i maveta ka page tahetara reniê, vi inê ki koro ma ki oto tare parongaku. Na ai ni Isiraele ka page nahunia aporo na apanena iata, na agua gê bani haganahunia o Jakobo na kariaku renia. 26Ngaira ka page oga asitatara i ngekana. Ngaira ka page tagarahigi igê na ruma ma na pariki ni vaini. Inê be hagaitangira na enoni hato igê na agua getigi, suria ga ruhira na Isiraelita, ma na Isiraelita ka page oga asitatara. Vikana ngaira ka page tahetara reniê, vi inê ka na Araha God iata.”

Currently Selected:

ESEKIELE 28: KCB

Highlight

Copy

Compare