ESEKIELE 26
26
Na tamasinga poropete renia i Taire
1Ngaia ka na tangiana gi tage igê na hageha igê na tangahuruta matare tage na harisi ga henahuraugami, kami oga surigi i Babilonia. Na Araha ki tamasi tangê, ki vi: 2“Igo, karena enoni ma, ikê nga ka na tarana, na ai ni Taire ka vagevagesia. Ngaira ka ngerengere, ka vivi, ‘Jerusaleme ki vota! Na raramohana ki hato. Na tagaraha ni hagavarahi haga ka hato. Ngaia ki hato, vige megia hetagetage. Ngaia ki aruhuruhu. Igia ka page ruruguha.’
3“Tahema inê na Araha God kê vi: Inê nga ka na merongamu, na hinua i Taire. Inê be katora na enoni tenigi na agua rako getigi, ke taharigo. Ngaira ka page arâ me hesurisuri mangagi na navo i asi. 4Ngaira ka page ruhuruhugi na para ni hinua iamu, ma ka page hogegi na bebetehe iamu. Nikâ inê be sinogi râ roro hato, nga noga ma na hareni na hê ki gâga so. 5Ngaia ki na bagahê raha i asi, ma na mane hugohugo ka hagasina igê na hugo iata. Ngaia kani gê visia, inê na Araha God. Na me i na agua getigi ka page rurugugo, Taire. 6Ngaira ka page mutera na enoni surigi na hinua hato igê na tarasini renigi na tatapa borahu iata. Vikana igamu na ai ni Taire, kamu page tahetara reniê, vi inê ka na Araha.”
7Na Araha God ki vi: “Inê be hagamarumungenia na maneraha i teha ngavê, hanana i taharia i Taire. Ngaia ki no Nebukanesa ni Babilonia. Ngaia ki page arâ me tenia i pasina henira na mane ni me gahu, henira na hosi ni me ma na kati ni me, ma henira na mane ni me igê na hosi. 8Ngaia ki page taharigi hagenago na hinua igê na tarasini, ma ki page ruhuruhugi ngavê. Ma hemuri ngaia ki page tagarahigi rihigo na âpavoro, ma ki page ukugi na mako rihigo, ma na mane ni me iana, ga page taharigo, ka page manga na para nganganihaga rihigo. 9Ngaira ka page rupukurugi na para iamu renigi na eariha, ma ka page hogegi na bebetehe iamu renigi na aiani. 10Na akuhukuhugata na hosi ka page buhigo. Na akurukuruhani na hosi iata, ga okegi na kati ni me ma na kati ni toraha, ki page ngingigi na para iamu, matena ga banuhigi vê na maani para ni hinua, i aruhuruhu. 11Na mane ni me igê na hosi ka page tango surigi na tara ni hinua iamu, ma ka page ahurara hunira na enoni igê. Na ara ni u raha nganganihaga iamu ka page tâ i ano. 12Na merongamu ka page hanagogi na ruruguha iamu ma na marâ ni hagavuringa iamu. Ngaira ka page ruhuruhugi na para iamu, ma ka page hogegi na ruma bâkoro iamu. Ngaira ka page kasigi i asi na roro, na hê ma na apinige. 13Inê be hatungigi na ki hato ma nikâ na ringeni na gita. 14Nga noga ma na harena na hê ki page oga so, ma na mane hugohugo ka page hagasina igê na hugo iata. Na hinua ki hato hagetage, vige page tagarahia aporo nikâ. Ngaia kani gê visia, inê na Araha God.”
15Na Araha God ki tamasi vikê tanga na hinua i Taire: “Na mane ni me ka page henahuraugo, ma na enoni igê na tarasini ka page bubununuga, matena ga rongora na enoni ga angiangi raha, matena na me ka hagamamarira ma ka tê hunuhunu renira. 16Ngaira hato na maneraha igê na marê, ga nahunigi na haka ni tagaraniha, ngaira hato ka page vatovato tenigi na atohata. Ngaira ka page tasigi râ na gahu ma na tuguni iata, ga turagi igê na marâ i bâkoro. Ngaira ka page oga hatara i ano, ma ki page tatata na apeta. Ngaira ka page bubununuga ngavê renia na tarana, i tarahugo, ma ki bara tangara, vige ape haritagi. 17Ngaira ka page kiria na ki ni hetakiha ikê renigo:
“Hinua raha, i rongo raha na atamu.
Igo ko aruhuruhu ngavê.
Na haka iamu ka hato tenia na asi.
I nago na kariamu ka pu gatagata i asi.
Na marê getigi ka magutenira ngavê.
18Ma i ngekê igo ko aruhuruhu
ma na marê ka bubununuga,
ma na enoni igê ka gasuga renigo,
suria i hato hagetage iamu.”
19Na Araha God ki vi: “Taire, inê be katogo, ku manga na hinua i aruhuruhu, i hihiruga ma ki bagubaguruga. Inê be katoa na ruarua, ke ahegenigo. 20Inê be kasigo so igê na agua iata na enoni, ga me, hanana gu hakunira na ani, ga bani me i kere vê noga. Inê be katogo, ku oga igê na agua ngekana henira na enoni, ga me igê na ruma, ga êvariga ma ka ahogehoge. I asa iamu, vigu page mêri nikâ i maveta ikê. Igo ko page hihiruga tare, ki bê ki arâ. 21Inê be katogo renia na hagararinga, hanana na enoni hato ka makuku. Na enoni ka page bâbâ renigo, ma ki asa, vige tarahugo. Ngaia kani gê visia, inê na Araha God.”
Currently Selected:
ESEKIELE 26: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
