ESEKIELE 25
25
Na tamasinga poropete renia na ai ni Amone
1Na Araha ki tamasi tangê, ki vi: 2“Igo, karena enoni ma, gu ranganira na ai ni Amone. 3Gu hagarongora renigi na tamasinga iaku. Inê na Araha God kê vi vikê: Igamu kamu manavatenira na kariaku, matena na merongata ka hagaerasia na Ruma ni Rotu iaku, ma ka ruhuruhua i Isiraele ma ka henahuraura na ai ni Juta. 4Tahema inê be hagamarumungenira na me igê na bagamasusu raha i kerekê, hanana ge henahuraua na apanena iami. Ngaira ka page toregi igê na hinua iata, ma ka page ogasia. Ngaira ka page ngêngê na apinige ni ngauha iami ma ka page rusigi na susuta na togoha iami, hanana ga tonomigi. 5Na hinua i Raba inê be katoa renia na panisi ni kamelo, ma na agua hagenani i Amone inê be katoa renia na pariki ni sipi. Vikana igamu kamu page tahetara reniê, vi inê ka na Araha.
6“Inê na Araha God kê vi: Igamu kamu hita baro, ma kamu ngerengere vagevage. Igamu kamu tamasi ruhira na ai ni Isiraele. 7Tahema inê be hagaitangigamu. Inê be mahatangenigamu tangara na me i na agua getigi, hanana ga page hanago ma ka page rurugu tenigamu. Inê be mutegamu ngavê. Igamu ki hato iami. Na apanena iami ki hato iana. Vikana igamu kamu page tahetara reniê, vi inê ka na Araha.”
Na tamasinga poropete renia i Moaba
8Na Araha God ki vi: “Na ai ni Moaba ka vi, vi na ai ni Juta ka maratorata na enoni i na agua getigi. 9Tahema inê be hagamarumungenira na merongata, ke henahuraugi na hinua igê na pereperegani, suria i bara tangara, viga ura barasira. Ngaira ka page ruhuruhugi nikâ na hinua, i bâkoro iata i Bete Jesimote, i Bala Meone, me Kiriataimi. 10Inê be nakara na me igê na bagamasusu raha i kerekê, hanana ge henahuraua i Moaba henia i Amone. 11Vikana i Moaba ki hatohato iana, ma ngaira ka page tahetara reniê, vi inê ka na Araha.”
Na tamasinga poropete renia i Etome
12Na Araha God ki vi: “Na ai ni Etome ka barua na siva ma ka hagamamasiagara ngavê na ai ni Juta. Tahema na hagaitangiha raha meni na siva ki ararira ngavê na ai ni Etome. 13Hoi, inê na Araha God be hagaitangira, ma be mutera na enoni hato igê ma na togoha hato i ngekana. Inê be ruhuruhua i Etome hagenani, haganega tenia na hinua i Temane tanga na hinua i Tetane. Na enoni igê ka page me renia na henahuita. 14Na kariaku na Isiraelita ka page urusiê ka barua na siva tanga i Etome, hanana na ai ni Etome ka page hatamia na mangariganiha raha iaku. Na ai ni Etome ka page tahetara renia na mamasiaganiha, i râ me tenia na siva iaku tangara. Ngaia kani gê visia, inê na Araha God.”
Na tamasinga poropete renia i Pilisitia
15Na Araha God ki vi: “Haganega me tenia i kere vê noga na ai ni Pilisitia ka hagatavatavara na merongata, matena ga barua na siva tangara. Ngaira ka makimaki tenira ma ka mutera ngavê. 16Tahema inê na Araha God be hagaitangira. Inê be mutera ngavê. Na hitangita, ga hita so ma ka oga igê na tarasini, inê be hagamagahurura. 17Inê be barua na siva tangara ma be hagaitangira bâraha ngavê. Ngaira ka page hatamia na mangariaganiha iaku. Vikana ngaira ka page tahetara reniê, vi inê ka na Araha.”
Currently Selected:
ESEKIELE 25: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
