ESETA (Greece) 8
8
Ga tahi na Siu
1[1] Igê nga na tangiana ngekana na maneraha o Ataseresese ki haganahunia ka Eseta renigi na nahuninga hato iana o Hamane na merongata na Siu. Ka Eseta ki hagarongoa na maneraha, vi o Moretekai ki na goana i hagarangia. Haganega tenia na matena ngekana, na maneraha ki kahu hagamarumungenia o Moretekai, hanana i arâ me i pasina. 2[2] Na maneraha ki tasia râ na ringi iana i oga igê na girarana ma ki vatea renia o Moretekai. Ngaia ka na ringi i bani vatea renia o Hamane ma hemuri ki bani tavoa aporo tenia. Ka Eseta ki naka o Moretekai ki bâsurigi na nahuninga i me tenigi o Hamane.
3[3] Ka Eseta ki susure ki tubê so i maana na maneraha ma ki angi. Ngaia ki tamasi tanga na maneraha, ki nungia, hanana i rêra barasia na harikatoha era iana o Hamane na raraha iana o Agaga renira na Siu. 4[4] Na maneraha ki usia râ ka Eseta renia na vato na golo iana. Vikê ka Eseta ki ura hagaraga ma ki vi: 5[5] “Maneraha, manga vi igo ma ko obakoro reniê ma ko takuiê ma ko takusia vi i koro, hoi, gu haribona, hanana ga rêra pusigi na tamasinga i bani tokorenigi o Hamane karena o Hametata na raraha iana o Agaga, i haribona, ka mutera ngavê na Siu hato surigi na agua go marungigi. 6[6] Manga i he kanigê girara vigê gatagata, manga vi na bagabevoana ngekana ma ki tarahura na goaku na Siu ma ka meme nogata na ani ga hagarangiê?”
7[7] Na maneraha o Ataseresese ki vi tangarerua ka Eseta kaniana mo Moretekai, ki vi: “Bâ, inê kê bani riguia o Hamane, suria i harikato renira na Siu ma kê bani haganahunigo ka Eseta renigi na nahuninga iana. 8[8] Ma na haribonaha i oga igê na atana na maneraha ma ka purugenia igê na girarana na maneraha, ki asa ve page taruhi kasia. Ma ki koro ma, muru girara muru segegi tangara na Siu na marâ muru obanigi. Ma ki koro ma muru segea na ataku igê ma kamuru purugenia na giraraku igê.”
9[9] Na tarana ngekê ki vora me igê na tangahuruta gi rua matare oru na tangiana igê na oruta na hageha, na hageha na Sivana. O Moretekai ki unira me na mane segesege iana na maneraha ma ki katora ka segegi na tamasinga igê na leta tangara na Siu ma tangara na enoni raha hato ma na ani ga tagara igê na gavumane ma ka bâsurigi na 127 na apaneni hehegitigi, haganega i Intia ki arârâ ma ki tariha i Etiopia. Na leta ki râ tangagi na ara ni apaneni hehigitigi ma ka segegi igê na tamasinga hehigitigi iata mareta ma igê na tarani na segesegeha iata mareta, ma tangara na Siu igê na tamasinga iata ma igê na tarani na segesegeha iata. 10[10] O Moretekai ki katora na mane segesege ka segea so na atana na maneraha o Ataseresese igê na leta ma ka purugenia na girarana na maneraha igê. Na mane igê na hosi ni tangoha iana na maneraha ka votongenigi na leta surigi na ara ni apaneni hato.
11[11] Na leta i vi vikê “Na maneraha o Ataseresese ki hagamarumu tangara na Siu surigi na ara ni hinua, hanana viga hagarêra mareta ka rêra pusira na merongata. Manga na mane ni me tenia na anima na apaneni nuni igê na anima na apaneni ma ka taharira na Siu, na mane, na gete se na kare, hoi, ngaira na Siu ki koro ma ga rêra pusira ma ka mutera. I koro ma ga mutera hato ngavê ma ka nahunigi na nahuninga iata tenira. 12[12] Na bonasiha ngekê ki gatagata suria i Pesia hagenani igê nga na tangiana ga harikato viga mutera igê na Siu igê na hageha na Atare. Ngaia ki na tangahuruta matarerua na hageha.”
13[13] Mu nakanaka mave na tamasinga na bonasiha ngekê surigi na ara ni apaneni hato, hanana na Siu hato ka girara ga nanê ka meraheariha na merongata igê na tangiana ngekana.”
14[14] Na maneraha ki bonasira na mane tora tamasinga ka tagirira na hosi ma ka tango igê ka râ. Ngaira ka hagagirarara nikâ na enoni i Susa renia na bonasiha ngekana.
15[15] O Moretekai ki pania na ruma raha iana na maneraha. Na aruhana maravarava ma ki siki ma na tuguni iana ki rotorotoaga memera ma na tarepuri bâkoro na golo i bêna. Ngaia ki tuguni manga na maneraha. Na tara i hinua i Susa ka hebungi, suria na enoni igê ka vagevage ma ka ngerengere. 16[16] Na Siu ka obakoro ma ka haritagi. Ngaira ka vagevage ma ka hata manga vi ngaira ka teha. 17[17] Renia na ara ni hinua surigi na ara ni apaneni ka bani hagagirarara renia na bonasiha iana na maneraha, tahema na Siu ka naka na tangiana raha tanga ga magoto ma ka vagevage igê. Rako na enoni ga pe Siu ka hakunira na Siu, suria ga magutenira.
Currently Selected:
ESETA (Greece) 8: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific