ESETA (Greece) (F)
(F)
Na maneraha ki haribona ka pe mutera na Siu
Ikê nga na tamasinga ni haribonaha:
“Inê na maneraha teha o Ataseresese kê hagamauru koro tangara na ani ga bâsurigi na 127 na apaneni, haganega i Intia ki tariha i Etiopia, ma tangara ngaira hato ga toto surigami.
18[2] Rako na mane ka kasira akê mareta, matena ga taugi na tagaraha na enoni ka hagahigasira igê ma na mahatanga tenira na ani ga korokoro tangara. 19[3] Ngaira ka babarisi vigana ma ka pe oga manga hanana vi ararira hete. Ngaira ka uhungia ma viga hagamamasiagara na enoni mi marungira igami ma nikâ ngaira ka harikato renira na ani ga koro tangara. 20[4] Ngaira ki asa vige visira koro na enoni ga koro tangara. Ngaira ka takusia nikâ, vi ngaira ka girara viga tahitahi tenia na suriha iana God, i kitenigi na eraha ma ki giraragi na ara ni marâ hato. Ngaira ka ruhira na enoni ma ka vagevagesira na enoni ga hite ma ka era, ga hagamemesi ringeta tangara.
21[5] Hagarako nikâ na ani ga nahuni ramoha ka nahuira na enoni koro ka meme, ma vikana ngaira ka vota hagetage ngavê, suria ngaira ka râ surigi na tamasinga iata na ani ga tako togo renira ma ka nakara igê na tagaraha raha igê na gavumane. Ma vi na tamata ngegana ka oge apeta. 22[6] Suria ga hagaparu ma ka hagabeka, tahema ngaira ka katora na enoni raha koro iata ka bebeve renira.
23[7] Na hagararinga renia na tarana ngekana ka bani oga me igê na sihonga i nago. Ma ki mareha vi i ngekana ma, ma i ngekê nikâ. Na enoni raha igê na gavumane ka katogi nogata na tarani erataga vigana.
24[8] Ma tanga nga i hemuri me, igami kami uhungia nga, hanana vi na enoni hato mi marungira ka gâga asitatara ma igê na marapeha. 25[9] Tani na tarani ka page tora hegitigi tenia i nago, ma na ara ni tarani ga migirâ me tangagami, igami kami page hagaotogi igê na otoha.
26[10] Hoi, mu bâsia na tarana renia o Hamane karena o Hamatata ni Masetonia. Ngaia ki na mahuara, i mareha vi na gapuna na ai ni Pesia. Ngaia ki hagatê teniê, hanana vive koro tanga. Ma inê kê unia banu me i ruma iaku. 27[11] Ngaia ki vagevagesigi nogana na korohaku ma na hetakuiha iaku tangara na enoni hato i maveta. Vikana ngaira ka hêtana vi ‘Vaemamami’, suria ki na ruata tangê inê na maneraha, ma na enoni hato ka susure ka hagahigasia.
28[12] Suria ngaia ki paroparo ma ki obania vi guruguru akê nga, tahema ngaia ki harikato vi nahuiê kê meme, hanana vi maneraha urusiê ngaia. 29[13] Igê na hagahagaparunga ma na hagabekaniha iana ngaia ki nungiê, hanana viga nahuia ki meme o Moretekai i bani hagatahiê me nga ma ki tamaniê tare. Ma nikâ, hanana viga nahuira ka meme ka Eseta na geteraha i pe erasia rârâ ta na marâ, ma na ara ni Siu hato. 30[14] Na takoha iana, ngaia ki voasigami hanana siana tani ki tamanigami, hanana na ai ni Masetonia ka marungia i Pesia. 31[15] Henaka na eragani nuni ngekana ki harikato vi mutera ngavê na Siu, inê kê girara, vi na Siu ka pe erataga rârâ ma ka râ surigi hete na ramata koro ngavê. 32[16] Ngaira ka rahesia God monari i raha ma raramohaga teha ngavê ma ki bani haganahunia me na arahanga iamami renia na ramana haganega me tenia na matena iata na êvarimami mataro me i ngekê.
33[17] Tahema inê kê bonasigamu, vi siana kamu arâ surigi na tamasinga igê na leta iana o Hamane tangagamu. 34[18] Suria vikana, tahema ngaira ka riguia igê na maanipara i hinua i Susa henira ngaira hato i ruma iana. God i marungigi na ara ni marâ hato ki hatani hagaitangia araria.
35[19] Inê kê bonasigamu, kamu nakanaka mave na tamasinga na bonasiha iaku i na ara ni agua. Mu hagamarumungenira na Siu ka gâga surigi na tauhata mareta, 36[20] ma kamu tamanira, matena ga roherohe pusira mareta tenira na ani ga page taharira igê na tangiana ni muteha, na tangahuruta matare oru na tangiana igê na hageha na Atare, na tangahuruta matarerua na hageha. 37[21] God, i marungigi na ara ni marâ hato, ki urusia na tangiana ni muteha ki vora re na tangiana ni vagevageha tangara na kariana. 38[22] Mu naka me na tangiana ngekê henigi na tangiani raha iami. Mu hagahigasia renigi na magotoha, 39[23] hanana i ngekê ma i hemuri me na tangiana ngekê ke hagatakusigia, igia ma na enoni hato ga koro i Pesia, vi manga i he God ki hagatahigia igia ma ki hagaitangira ngaira na merongaka.
40[24] Na ara ni apaneni ma na ara ni hinua, henaka vi i he, ma ki pe marupea na bonasiha ngekê, ngaia ki page girara na mangariaganiha iaku. Ngaigi ki page aruhuruhu igê na hearihatana. I bara ngavê ta na enoni vige râ nikâ i ngekana, se vi na mane se vi na marâ vasiga.”
Currently Selected:
ESETA (Greece) (F): KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific