ESETA (Greece) 7
7
Ga nahuia ki me o Hamane
1Hoita, na maneraha ma o Hamane karu râ i pasina ka Eseta tanga na ruata na ngauha. 2Matena ga totono na vaini, na maneraha ki hagatea nikâ ka Eseta, ki vi: “Hoi ka Eseta kaniaku, na ta kanigo obania? Visia me ma hanana gê vatego. Naka ma ta na apanena na agua gê marungia, inê kê girara ma gê vatego renia.”
3Ka Eseta kaniana na maneraha ki arami, ki vi: “Maneraha, manga go obakoro reniê, hanana go aganaria na obaniha iaku, inê kê obanigo, vigo hagatahigami inê ma na goaku na Siu. 4Na goaku na Siu menê ka bani hagavuringenigami, hanana viga nahuigami kami meme. Manga vige hagavuringenigami ma kami vora re na kare rakuraku, inê ki asa be tamasi renia se vi ve tako renia. Ma igami, ka sugia ma vige mutegami ngavê ma ke hatungigami hagetage!”
5Na maneraha o Ataseresese ki hagatea ka Eseta kaniana, ki vi: “Ti kani gatagata na apena, hanana vi katoa na tarana ngekana? I he kani gâga igê?”
6Ka Eseta ki arami, ki vi: “Na merongamami ka no Hamane. Na eragani nuni ngekana kani erasigami ngavê!”
O Hamane ki gasuga ngavê ma ki magutenirerua na maneraha ma kaniana. 7Na maneraha ki mangariaga ngavê, ki aharaga, ki pania na kiboru ma ki hura i mu ni mahe i metara na ruma raha iana. O Hamane ki girara, vi na maneraha ki ama ni togeaga nga, hanana vi hagaitangia renia na bagatauhana ngekana. Tahema ngaia ki oga so ma, hanana i nungia ka Eseta kaniana na maneraha, hanana vi hagatahia. 8Matena i ehu vê ki râ ki tê igê na bea iana ka Eseta, hanana vi nungia ki takia, ma na maneraha ki aporo banu me igê na kiboru tenia na mu ni mahe. Matena na maneraha ki bâsia vikana, ngaia ki ngere, ki vi: “Mane era! Na ta kanigo katoa henia kaniaku ikê i maaku i ruma iaku mareku?”
Matena i tamasi hato vikana na maneraha, na mane na vâmavo ka baraia ototo râ nga na maana o Hamane. 9Hemuri o Garabona na hitangita ki vi: “Maneraha, o Hamane ki hagêrasia na u ni riguiha hagarangia na ruma raha, hanana vi riguia igê o Moretekai i hagatahigo. Na u ni riguiha ki 25 mita na borahusigana!”
Na maneraha ki haribona, ki vi: “Riguia o Hamane igê!”
10Vikê ka riguia o Hamane igê na u ni riguiha, ngaia marena i bani hagêrasia, hanana vi riguia igê o Moretekai. Hoi ngekana na maneraha ki kahu so na mangariaganiha iana.
Currently Selected:
ESETA (Greece) 7: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific