ESETA (Greece) 6
6
Na maneraha ki kasia akê o Moretekai
1Igê nga na bungiana ngekana na maneraha ki bara tanga vige mêru. Tahema ngaia ki haribona, ka torea me na buka ga segegi igê na tarani ga vora me ma ka tomania tanga. 2Matena ga tomatoma rârâ, ngaira ka tarahua igê na sihonga renia o Moretekai, i hagarongoa na maneraha renirerua o Bigitana mo Teresi, vigaru harikato, hanana vigaru nahuia ki meme na maneraha. Ngairerua ka na vâmavo, garu tagara i ruma raha iana na maneraha ma karu anumasigi na kiboru iana. 3Na maneraha ki hagate, ki vi: “I hega, igia kaniga kasia akê renia na tarana ngekana? I hega kaniga bani vuria?”
Na kariana ka arami, ka vi: “I mareha rârâ.”
4Na maneraha ki hagate, ki vi: “Tani na hitangita na mane ni hagaotonga kaniga gâga mênga i ruma ikê?”
Hoi, o Hamane ki kahu banu ma me i beraro na ruma raha. Ngaia ki bani hagêrasia na u ni riguiha ma ki râ me ki nungia na maneraha, hanana vi haribona ka riguia igê o Moretekai. 5Hoi, na kariana na maneraha ka arami, ka vi: “O Hamane ikê. Ngaia ki naasia vi bâsigo.”
Na maneraha ki vi: “Mu naka ke banu me.”
6Hoita, o Hamane ki banu me ma na maneraha ki vi tanga, ki vi: “Ta na mane inê kê obania bâraha vigê kasia akê. Na tarana ta kani ve katoa tanga?”
O Hamane ki tako i obana, ki vi: “E, na maneraha ki obania bâraha vi kasia akê o ti? E, i mareha tenia vi inê!”
7Tahema ngaia ki aramia na maneraha, ki vi: “Maneraha, gu kato vikê tanga na mane go obania vigo kasia akê. 8Gu haribona ke toregi me na tuguni i marisina na maneraha manga igo. Gu haribona nikâ ke torea me na hosi i araria ma na maneraha vi tagiria ma ke naka na mahe i bêna na girarana vi na hosi tanga na maneraha. 9Hemuri ko bonasia na mane ni hagaotonga i teha ma ki hagarangigo, hanana i hagatugunia na mane ngekana renigi na tuguni ngegana ma ki urua na hosi i gâga igê ki merihu suria na mahera ni hinua. Matena ga ririhu, na mane ni hagaotonga ki tuguhia i ngerengere ki vivi, Bâ, nga hanana na maneraha i vuria na mane i obania vi kasia akê ngekê!’”
10Hoi, na maneraha ki vi tanga o Hamane, ki vi: “Gaha! Ko toregi me na tuguni ma na hosi ma ko kasia akê o Moretekai na Siu, manga go bani visia. O Moretekai ki oga i maana na maani ruma na ruma raha. Go katokato tanga manga go bani visia.”
11Hoi, o Hamane ki toregi me na tuguni ma na hosi ma ki hagatugunia o Moretekai renigi na tuguni. O Moretekai ki akê i gerina na hosi ma o Hamane ki merihu na hosi i oga igê o Moretekai suria na mahera ni hinua. Matena ga ririhu, ma o Hamane ki ngerengere tangara na enoni, ki vivi: “Bâ, nga hanana na maneraha i vuria na mane i obania vi kasia akê ngekê!”
12Hemuri o Moretekai ki aporo igê na maani na ruma raha iana na maneraha. O Hamane ki hatani râ tanga i pasina. Ngaia ki buhia na maana, suria i maki ngavê. 13Ngaia ki hagarongora na tamana hato na kaniana renigi na ara ni tarani ga tarahua. Hemuri na tamana, ga vi viga tako mataha ma kaniana, ngaira ka vi tanga, ka vi: “Igo ko haganega ko vatovato renia o Moretekai. Ngaia ki na Siu, ma igo ki asa vigu teharia. Ngaia ki page hagavotarigo nga!”
14Matena ga tamasi mêngara, ma na mane na vâmavo ka hatani ata me tenia na ruma raha iana na maneraha, hanana viga merâ o Hamane tanga na ngêra i pasina ka Eseta.
Currently Selected:
ESETA (Greece) 6: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific