ESETA (Greece) 5
5
Ka Eseta ki harorerua na maneraha ma o Hamane karu ngê i pasina
1[3] Na maneraha ki hagatea ka Eseta, ki vi: “Eseta kaniaku na tao? Visia me na ta kanigo obania. Inê kê girara gê vatego renia, naka ma go obania tapanena na agua gê marungia.”
2[4] Ka Eseta ki arami, ki vi: “Maneraha, manga vige ararigo ma, inê kê obanigamurua igo mo Hamane, muru arâ me i pasiku i rikini bungi tanga na ngêra gê hagarêa tangago.”
3[5] Hoi, na maneraha ki bonasia o Hamane ki hatani râ me, hanana garu ngêngê i pasina ka Eseta. Vikê na maneraha ma o Hamane karu râ tanga na ngêra i pasina ka Eseta. 4[6] Matena ga totono na vaini, na maneraha ki hagatea ka Eseta, ki vi: “Visia me na ta kanigo obania. Inê kê girara gê vatego renia, naka ma go obania tapanena na agua gê marungia.”
5[7] Ka Eseta ki arami, ki vi: 6[8] “Maneraha, na obaniha iaku ki manga ikê. Manga igo maneraha ma ko obâbakoro renia ma ko agana, hanana go aganariê, inê kê obanigamurua igo ma o Hamane, vigamuru arâ me nikâ i pasiku i gomaha tanga na ngêra. Igê nga na matena ngekana kanigê page visia vê tangago na obaniha iaku.”
O Hamane ki harikato vi nahuia ki meme o Moretekai
7[9] Matena ga ngê hato, o Hamane ki aporo i pasina. Ngaia ki vagevage ma ki obakoro. Matena i hura vê, ngaia ki gasuga renia o Moretekai i maana na maani ruma na ruma raha. Matena o Hamane ki ritenia o Moretekai, o Moretekai ki pe aharaga ma ki pe hagahigasia rârâ. Tahema o Hamane ki mangariaga ngavê tanga. 8[10] Ngaia ki muni so ma, ma ki arage bê nga tanga i pasina. Hemuri ngaia ki unira me na tamana i ruma iana ma ki nungia ka Seresi kaniana, hanana vi arâ me nogana. 9[11] Ngaia ki kasikasia akê marena tangara renia vi raha era na ruruguha iana, renia viga rako o karena ma renia na tagaraha na maneraha i gurua akê igê, ma renia vi ngaia ki raha teharira na mane ni hagaotonga getera iana na maneraha. 10[12] Ma ngaia ki vi nikâ, ki vi: “Ta na marâ nikâ. Ka Eseta kaniana na maneraha ki unigamirua igamirua na maneraha menê, kamuru ngê i pasina, ma ki unigamirua nikâ tanga i gomaha. 11[13] Na tarani ngegana ka na marâ purua ma tangê, suria gê bâsia o Moretekai na Siu i gâga mênga i maana na maani ruma na ruma raha.”
12[14] Tahema na tamana hato ma kaniana ka vi: “Tanu hega kanigo pe hagêrasia na u na tangahana tangahuru matarerua, hanana gu riguia igê o Moretekai? I gomaha mavoraro igo ko girara go nungia na maneraha, hanana i haribona ka riguia igê o Moretekai, ma ko kahu obâbakoro, hanana go arâ tanga na ngêra.”
O Hamane ki takusia vi na tarana ngekana ki koro. Ma ngekana ngaia ki hagêrasia na u ni riguiha.
Currently Selected:
ESETA (Greece) 5: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific