ESETA (Greece) (E)
(E)
Ka Eseta ki râ i pasina na maneraha
48[1] Na geteraha ka Eseta ki nunginungi surigi na tangiani gi oru. Hemuri ngaia ki tasigi râ na tuguni ni kasi mena ma ki hagesuru aporo renigi na tuguni bâkoro. 49-50[2-3] Ngaia ki bâkoro ngavê renigi na rêni ma na tuguni ni geteraha. Nikâ ngaia ki avarasia na God ni hagatahinga i giraragi na ara ni marâ hato. Ngaia ki hura me tenia na kiboru iana. Ngaia ki tavo uga manga i marisina vi na geteraha. Na kere gete tagara gi rua iana karu râ henia. Tani ki haritê i rimana ki merâ harahara, 51[4] ma tani ki têa akê na aruhana i borahu râ i murina. 52[5] Na maana na geteraha ka Eseta ki togatoga bâkoro era. Na maana ki hagabângenigi na vagevageha ma na hetakuiha, ma igê na aitangihana ngaia ki magu ngavê hete. 53[6] Ngaia ki hura surigi na maani ruma hato ki banu igê na kiboru i oga igê na atohana na maneraha ma ki ura i maana. Na maneraha ki oga so igê na atohana. Ngaia ki hagesuru renigi na tuguni ni maneraha ga gahuigi na golo ma na hê i raha na meni igê. Ngaia ki bâ hahanetaga ngavê. 54[7] Ngaia ki bâ raramohaga. Matena i bâsia ka Eseta, na maana ki bâ ni mangariaganiha. Igê na mangariaganiha raha iana ngaia ki bore rapurapu renia. Na maana ka Eseta ki parama ma ki siki. Ngaia ki haganega ki ehu ma ki haga ni bagamame. Ngaia ki matare râ i gaparana na kere gete tagara iana i merâ harahara.
55[8] Hoi, God ki horoa na mangariaganiha iana na maneraha, hanana i anumanuma renia ma ki takia. Ngaia ki reke kê tenia na atohana, ki têa akê ki ruia me mataro me ki aporo me na mêriha tanga ka Eseta. Ngaia ki hagakorokoro tanga, hanana siana ki magu. 56[9] Ngaia ki vi tanga, ki vi: “Ka Eseta na ta? O vaniamu kani inê! Siana ko magu. 57[10] Igo ko pe me, suria na haribonaha iamami ki tangara ma na enoni purua. 58[11] Ura me ikê.” 59[12] Ngaia ki tê akê na vato na golo ni maneraha ma ki hataria renia na riona ka Eseta. Hemuri ngaia ki siginia ma ki vi: “Visia me na ta ko obania.”
60[13] Ka Eseta ki arami, ki vi: “Araha iaku, matena gê bâsigo, inê kê vi ma, vigê bâsia na angero iana God ma na bâhahanetaganiha iamu ki hagamagusiê ngavê. 61[14] Igo ko bâ ararangataga ma na maamu ki hagabângenigi na koroha ma na bâkoroha.”
62[15] Ka Eseta ki bagamame nikâ, matena i tamasi mênga. Na maneraha ki tako bâraha ngavê renia ma na kariana hato ka uhungia viga hagamêria aporo.
Currently Selected:
ESETA (Greece) (E): KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific