ESETA (Greece) (D)
(D)
Na avarasiha iana o Moretekai
18[1] Matena o Moretekai ki takusigi na tagaraha raha iana na Araha, ngaia ki avarasia, ki vi: 19[2] “Araha, Araha raramohaga hunigo, igo ko marungira na ara ni marâ hato ga oga, ma ngaira hato ka tê viteamu. Manga go obania vigo hagatahira na Isiraelita, i asa ta na enoni vige hagabarasigo. 20[3] Igo ko hagavoragi na vavearo ma na ano ma na ara ni marâ bâkoro hato i maveta. 21[4] Igo nga ko Araha tangara ngaira hato, ma ki asa ta na enoni vige ura pusigo. 22[5] Igo ko girara erasigi na ara ni marâ hato. Araha, igo ko bani girara matena gê usi vi ve tubê so tanga o Hamane na mane paro ngekana. Inê kê kato vikana, mareha vi suria inê kê paroparo se vigê hagarahasiê mareku i maata na enoni, 23-24[6-7] ma suria hete gê pe obania vi ve hagahigasia na enoni teharigo igo God. Inê kê tubê so ma tangago igo Araha iaku. Ma ki mareha vi suria inê kê paroparo. Ma ki manga ve siginigi na baba ni ugana, hanana vi ve hagatahira na Isiraelita, hoi, inê kê girara ma gê katokato vikana.
25-26[8-9] Hoi, Araha God, Araha God iana o Abarahamo, gu takira na kariamu. Gu hagatahigami tenira na merongamami, suria ga harikato viga mutegami. Ngaira ka naasia na matena tanga. Kere vê noga igo ko bani ategami kami vora na kariamu ma ko bani hagatahigami tenia i Esipito. Siana ko rumakaka renigami i ngekê. 27[10] Gu aganaria na avarasiha iaku ma ku takigami, suria igami ka na kariamu go bani ategami. Gu urusia na obaeraha iamami renia na vagevageha, hanana igami kami tahitahi kami kiki hagarahasigo. Gu hagatahigami tenia na mera, hanana igami kami ama ni hagarahasigo nga.”
28[11] Na Isiraelita hato ka avaravara raha ngavê, suria ga tako vi ngaira ka oga igê na mera.
Na avarasiha iana ka Eseta
29[12] Na geteraha ka Eseta i oga igê na mera, ki rukuruku i pasina na Araha. 30[13] Ngaia ki tavogi râ na tuguni ni geteraha ma ki hagesuru renigi na tuguni ni obaeraha ma ni angiha maramara. Ngaia ki kuhuia na bêna renigi na rahu ma na ae, mareha vi renigi na oile i sigini koro. Ngaia ki hagamamasiaga ngavê na apena. Ngaia ki tarasigi râ na rêni ga hagabâkoroa na apena. Ngaia ki pe surasura bê ma na varehuna ka takitakiga ma ka kakaveraga.
31[14] Hemuri ngaia ki avarasia na Araha God iata na Isiraelita, ki vi: “Araha God iaku, igo getego ko God. Gu tamaniê. I mareha rârâ tani vige ngahisiê. I mareha rârâ tani hanana vi ve avarasia, nga noga ma igo. 32[15] Inê kê sugi kasi manavaku. 33[16] Araha, haganega me tenia na matena gê sisite, na ruma iaku ki hagesuriê, vi igo ko atera na Isiraelita i berarogata na enoni hato i maveta, ko tavora hura na êvarimami ka vora re na kariamu hagahu ma ko hagamonarigi na suruha hato iamu tangara.
34[17] Ma igami kami pe tê viteamu. Igo ko tagarenigami tangara na merongamami, suria mi hagarapera na ataro iata. 35[18] I oto tangago vigo hagaitangigami. 36[19] Ma i ngekê na merongamami ki pe uhu tangara vige hagamamasiagagami igami na kare rakuraku iata. Ma ngaira ka tohe renira na ataro iata, 37[20] viga mutegami na kariamu mi hagarahasigo, ka hagamagahurugi na ramata iamu, ka hunuia na bâkorohaterua na ruma ni rotu iamu ma na bea ni vogasiha iamu igê. 38[21] Ngaira ka obania hete, vi na enoni hato i maveta ka hagarahasira na ataro na marâ purua iata, ma ka hagahigasia ngavê na maneraha manga vi ngaia ka na ataro, na maneraha i girara i meme, suria ngaia ki na enoni ma.
39[22] Araha, na ataro iata ngegana ka pe gâga. Siana ko tagarenia na ramoha iamu tangara, ma siana ko nakara na merongamami ka rurusigami renia na perenga i tarahugami. Gu pariria bê aporo hete na harikatoha iata tangara ma ku katoa na hagararinga tangara renia na mane ngekana i haganega na harikatoha renigami.
40[23] Gu takusigami, Araha. Gu hagabângenia na raramohamu, suria igami kami mamasiaga ngavê. Igo, Araha God raha teha, go marungira na ani hato ga nahuni ramoha i maveta, gu hagaramoniê. 41[24] Gu hagaotogi na tamasinga iaku, matena gê gâga i maana na laione ngekana o Ataseresese. Gu horoa na aitangihana, hanana i kikitenia o Hamane i merongasigami ma ki mutera hete ngaia ma na kariana. 42[25] Ma tangagami igami gu hagatahigami. Araha, gu tamaniê, suria i mareha rârâ tani vige ngahisiê ma ki mareha rârâ tani, hanana ve avarasia, nga noga ma igo.
43[26] Araha igo ko aitangisigi na ara ni marâ hato. Igo ko bani girara, vi inê kê kitenia na hagahigasiana reniê iata na enoni ga pe botage renigo. Inê kê kitenia vi ve memêru na anima na hitangita ga pe retegi râ na gavoni na varata, se ga pe Siu. 44[27] Ma igo ko bani girara, vi ngaira ka tuguriê. Inê kê kitenia na tarepuri ni geteraha, vi ve naka i bêku igê na mateni tange. Inê kê kitenia manga vi ngaia ka na gahu gê hagamera huria. Inê kê naka ma i bêku na tarepuri ngekana igê na matena i tuguhiê igê, mareha vi i na keta nikâ. 45[28] Inê na kariamu kê pe ngêngê rârâ igê na bea ni ngêra iana o Hamane, se vi ve oga igê na magotoha iana na maneraha, se vi ve tonomia na vaini ga vogasira na ataro iana renigi. 46[29] Haganega tenia na matena ga meêrâ me ikê, na tarana gi tage ma gê vagevagesia kanigê rahesigo igo Araha God iana o Abarahamo. 47[30] God raramohaga hunigo, gu aganaria na avarasiha iata na kariamu ga bagahagêguri. Gu hagatahigami tenira na mane erataga ngegana. Gu tavoa râ na maguha teniê!”
Currently Selected:
ESETA (Greece) (D): KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific