ESETA (Greece) (4)
(4)
O Moretekai ki avarasia ka Eseta
1[1] Matena o Moretekai ki rongo vikana, ngaia ki tarisigi na tuguni iana, suria i obaera ngavê. Ngaia ki hagesuru kakaga, ki kuhuia na bêna renigi na rahu, ki angiangi raha ma ki rârâhia na hinua, suria i rugu ngavê na obana. 2[2] Rârâ ma ki tariha igê na tarâto tanga na ruma raha iana na maneraha. Ngaia ki pe banu igê, suria i apu tanga na enoni i hagesuru kakaga vige bêbanu igê. 3[3] Surigi na apaneni hato ga tarohenia igê na haribonaha iana na maneraha, na Siu ka angiangi maramara raha surigi. Ngaira ka harihari, ka angiangi ma ka angiangi maramara ma ka rako ngavê na ani ga hagesuru kakaga ma ka tâhigi na rahu.
4[4] Matena ka Eseta ki rongoa na tauhana o Moretekai tenira na kere gete tagara ma na vâmavo iana, ngaia ki anumanuma ngavê. Ngaia ki hagatorangenigi na tuguni tanga o Moretekai, hanana vi tuguni renigi urusigi na kakagani. Ma ngaia ki usitenigi. 5[5] Hemuri ka Eseta ki unia o Hatage. Ngaia ki na vâmavo, na maneraha i kasia ki tagara tanga ka Eseta. Ka Eseta ki vi tanga, ki râ tanga o Moretekai, hanana i tarahua, vi na tarana ta kani katoa ma ki hega. 6[6] O Hatage ki râ i pasina o Moretekai, i oga igê na mahera ni hinua i maana na maani ruma na ruma raha iana na maneraha. 7[7] O Moretekai ki hagarongoa renigi na ara ni marâ ga tarahugi, ma renia vi na haga gi hita ka no Hamane i bani surua vi naka igê na kiboru ni haga iana na maneraha, manga viga mutera na Siu hato. 8[8] Ngaia ki vatea o Hatage tahana na pepa ni bonasiha iana na maneraha, ga bani tokorenia suria na hinua i Susa, hanana viga mutera na Siu hato. O Moretekai ki nungia o Hatage, vi torea na pepa tanga ka Eseta ma ki ramatenia tanga ka Eseta na tarana ngekana ma ki vi tanga ki râ ki metamasi na maneraha ma ki nungia, hanana i takira na Siu.
Currently Selected:
ESETA (Greece) (4): KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific