ESETA (Greece) 3
3
O Hamane ki harikato vi mutera na Siu
1[1] Hemuri na maneraha o Ataseresese ki gurua akê o Hamane ki gavumane raha i ruguhana. O Hamane ki no karena o Hametata na raraha iana o Agaga. 2[2] Na maneraha ki bonasira na kariana hato igê na gavumane, hanana ga hagahigasia o Hamane, ka susure ma ka tubê so tanga. Ngaira hato ka kato vikana, nga noga ma o Moretekai. Ngaia ki usi. 3[3] Na enoni getera ga tagara tanga na maneraha ka hagatea, ka vi: “Tanu hega kanigo pe tê viteana na maneraha?” 4[4] Tare i na ara ni tangiana ngaira ka tuguria vige têtê vita. Ma ngaia ki pe pasi rongora. Ngaia ki vi: “Na Siu kani inê. I bara vi ve tubê so tanga o Hamane.” Vikê ngaira ka hagarongoa o Hamane renia, hanana ga girara, vi o Hamane ki naka mavê o Moretekai se mareha. 5[5] O Hamane ki mangariaga ngavê, matena i rongo vi o Moretekai ki usi, vige susure ma ke tubê so tanga. 6[6] Ma na matena i rongo vi o Moretekai ki na Siu, ngaia ki kato vi mareha ge hagaitangia getea ma o Moretekai. Ngaia ki kato, vi mutera nikâ hete na Siu hato surigi na apaneni hato i marungigi na maneraha i Pesia.
7[7] Igê na tangahuruta gi tage matarerua na harisi iana o Ataseresese i maneraha noga surigi, igê na hageha hagenago, na hageha na Nisane, o Hamane ki haribona, ka kangikangigi igê na heni na atani na hageha ma na tangiani, hanana viga tarahurerua nga na hageha ma na tangiana i arari nga tanga na harikatoha iana. Na ata igê na heni ga visia vi Purimi. Ngaira ka tarahua na tangahuruta matarerua na tangiana igê na tangahuruta matarerua na hageha, na hageha na Atare.
8[8] Hoita, o Hamane ki vi tanga na maneraha, ki vi: “Na apaneni nuni gi tage ma ki oga totoko surigi na apaneni hato go marungigi. Ngaira ka râ surigi na tauha ga tora hegitigi tenigi na anita na apaneni nuni getera. Ma ta na marâ nikâ, maneraha. Ngaira ka pe marupegi na ramata iamu. I pe koro tangago, vigu nakara mavê. 9[9] Maneraha, manga go obania ma ko haribona, ka mutera ngavê. Manga go katokato vikana, inê kê tohe, vigê page nakagi na 300.000 kilo na siliva henigi na ruruguha iamu tangagi na tagaraha igê na gavumane iamu.”
10[10] Na maneraha ki tarasia râ na ringi i kakêna ma ki purugenia so na girarana igê na puru igê na tamasinga na ramata iana, hanana i hagagatagatanigi. Ngaia ki tagarenigi na pepa tanga o Hamane karena o Hametata, na raraha iana o Agaga. O Hamane ngaia ki merongasira na Siu. 11[11] Na maneraha ki vi tanga o Hamane, ki vi: “Na haga ka na animu. Ma tangara na enoni ngegana igo ma kanigo girara.”
12[12] Hoi, igê na tangahuruta matare oru na tangiana igê na hageha hagenago o Hamane ki unira me na mane segesege iana na maneraha. Ngaia ki tamasigi na tamasinga iana tangara na enoni ka segesegegi so ma ka urusigi igê na tamasinga ma na segesegeha ga tora hegitigi surigi na apaneni hato i marungigi na maneraha. Ngaira ka hagaguhigi tangara na enoni raha, na gavumane ma na enoni ga bâsurigi na apaneni hehegitigi. Na atana na maneraha o Ataseresese ki oga igê, suria i purugenia igê na ringi na girarana. 13[13] Na mane tora tamasinga ka toregi na pepa ngegana tangagi na ara ni apaneni hato i marungigi o Ataseresese. Na tamasinga igê na pepa ki manga ikê: “Igê nga na tangiana gi tage igê na hageha na Atare mu nahuira ka meme igê na Siu hato, na gapu haoru ma na meraha, na gete ma na kare. Siana mu takira. Mu mutera ngavê ma kamu raugi na nahuninga iata.”
14[14] Na tamasinga ni haribonaha ka tarohenia surigi na ara ni apaneni ma ka bonasira na enoni hato, hanana ga nananêa na tangiana ngekana.
15[15] Ga hatani tarohenia nikâ na haribonaha i hinua raha i Susa. Matena na maneraha ma o Hamane karu tono bâraha, na ai ni Susa ka hagagira bâraha.
B
Na haribonaha hanana viga mutera na Siu
16[1] Igê nga na tamasinga igê na haribonaha:
“Inê o Ataseresese, na maneraha ramo, inê kê hagatorangenia na haribonaha tangara na mane ga bâsurigi na 127 na apaneni iaku, haganega i Intia tanga i Etiopia, ma tangara na gavumane i ruguhata. Na haribonaha iaku ki manga ikê:
17[2] Matena gê haganega kê marungira na enoni hato i maveta hagenani, inê kê bani kato, vi na enoni gê marungira, ka gâga tare igê na marapeha. Inê kê obania vikana, mareha suria vi inê kê ageagesia na ramoha iaku, ma suria hete inê kê obania, gê marungira haritagi ma kê korokoro tangara. Inê kê bani kato, vigê hagahaorungia na marapeha na enoni hato ga tangasia, ma kê tanugi na tarani ga arari, hanana na maveta gê marungia ki asitatara ni râha tenia tapanena tanga tapanena.
18[3] Inê kê hagatera na mane ni hagaotonga iaku, manga i he kani akê me bâkoro na katoha iaku ngekê. O Hamane ki akê me igê na anina na hagaotonga. O Hamane ki na mane ni takoha mataha i berarogamami. Ngaia ki tototo surigami tare ma igami kami hagêguritogo ngavê renia. Tahema inê kê naka ki vora na ruata me tangê. 19[4] O Hamane nga kani hagarongogami renira na enoni ga pe oga igê na ramata ma ka oga totoko se i berarogata na enoni hato i maveta. Suria ngaira ka nahunigi na anita mareta na ramata, tahema ngaira ka tora getera ngavê tenira na ara ni enoni hato getera ma ka pe botage tare renigi na ramata iaku, inê na maneraha. Vikana ngaira ka hagaerasia na gavumane ni obahahaku igami kami obania bâraha tangara na enoni hato mi marungira.
20[5] Na enoni ngegana, ngaira getera ma, ngaira ka rêra pusira tare na enoni hato getera, ka sika tenira, suria ga râ surigi na tauhata ma na ramata iata mareta ga tora getigi ngavê, ka usitenia na arahanga iamami ma ka katogi na tarani ga erataga ngavê. Vikana ngaira ka na perenga tanga na obahahaku iata na enoni gê marungira.
21[6] Vikana igami kami haribona, ka mutera na enoni o Hamane na ruata me tangê i tamasira. Ngaira hato, na gete ma na kare nikâ, ka mutera nga. Siana hagetage ki tahitahi râ tani. Na merongaka kani ngaira. I asa vige takira. Igami kami haribona, hanana ngaira ka mutemute igê nga na tangahuruta matare he na tangiana igê na tangahuruta matarerua na hageha na Atare igê na harisi i ngekê. 22[7] Na enoni ngegana ga bani oga sutaga me, ka page mutemute i rarona nga na tangiana gi tage. Tenia i ngekana na arahanga iamami ki page rêra gatagata igê na marapeha.”
Currently Selected:
ESETA (Greece) 3: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific