ESETA (Greece) 2
2
Na maneraha ki êragia ka Eseta
1I murina i bani vato na mangariaganiha iana na maneraha, ngaia ki takusia mênga na tauhana ka Vasiti ma nikâ na tarohana renia tangara na enoni. 2Vikê na hitangita na mane ni hagaotonga i hagêguritogo renira, ngaira ka vi tanga, ka vi: “Hega, ko pe gari rârâ, hanana gu tarahura tani na kare viru ge bâkoro? 3Igo ko girara go atera na mane ni hagaotonga surigi na apaneni hato go marungigi, hanana ga merarâ me na kare viru hato i bâkoro na apeta tanga na ruma ni gete iamu ikê i Susa na hinua raha. Go naka o Hegai na vâmavo ki bâbâsurira, suria ngaia ki bâsurira na gete iamu, hanana ga maningaira ka bâkoro ngavê. 4Ma hemuri ko torea na kere gete na ani i râ me i mangatamu ma ko auragia urusia ka Vasiti.”
5I Susa ki oga igê ta na mane na Siu. Ngaia ki no Moretekai karena o Jaire. Ngaia ki tenia na varo ninuni iana o Benamino ma na raraha iaterua o Kise ma o Simi. 6Matena o Nebukanesare na maneraha i Babilone ki henahuraua o Jegonia na maneraha i Juta tenia i Jerusaleme henira na enoni getera, o Moretekai ki na hitangita. 7Ka Eseta kani kesina tonge. Na Siu ka visia vi ka Hatasa. Ngaia ka na kare viru i bâkoro ngavê. Na apena ki bâkoro era. Matena garu me na enana, o Moretekai ki têa ma ki marupea manga vi ka karena marena.
8Matena na maneraha ki haribona, viga merarâ me na kere gete, ngaira ka merarâ me rako na kare viru tanga i Susa. Ka Eseta ka na hitangita. Ngaira ka kasia ka Eseta i oga nogana igê na ruma raha iana na maneraha, hanana o Hegai ki bâsuria igê, suria ngaia ki bâsuria na ruma ni gete. 9O Hegai ki takuia ka Eseta ma ki koro tanga. Ngaia ki haganega ototo râ nga ki hagabâkoroa, ki hirihirisia ma ki vatea renia na ngêra tanga i bâkoro na apena renigi. Ngaia ki vatea renia na kiboru i koro ngavê igê na ruma ni gete, ma ki atera na kere gete gi pi tenira na ani i ruma raha iana na maneraha, hanana ga bâsuria.
10Hoi, ka Eseta ki pipinihia marena, vi ngaia ki na Siu, suria o Moretekai ki vi. 11I na ara ni tangiani o Moretekai ki arigurigu rârâ i maana na mahera ni ruma ni gete, hanana i obania i girara, vi ka Eseta ki manga i he ma vi na tarana ta ki page tarahua.
12Na maningaiana na gete ki oga suria na harisi gi tage. Na hirisiana renia na oile ni mire ko oga surigi na hageha ge ono, ma na hirisiana renia na oile ni balasame ki oga surigi na hageha ge ono nikâ. I murina ngekana ka torera tatage na kere gete tanga na maneraha o Ataseresese. 13Matena ga arâ tenia na ruma ni gete tanga na ruma raha iana na maneraha, ngaira ka girara ga gahugahu manga hanana ga obania. 14Ngaira ka arâ i ngekana igê na manurahitagani ki tangitangi me ma ka torera tanga na ani getea na ruma ni gete. I ngekana o Sasagasi ki bâbâsuria igê, suria na vâmavo ki bâbâsurira ngaia na gete râ ma iana na maneraha. Ngaira ka pe aporo râ i pasina na maneraha, nga noga ma na matena i obanira ma ki unini na atata.
15Hoi, i râ me na matena iana ka Eseta, hanana i râ i pasina na maneraha. Ka Eseta kani ka karena Abigaile ma kesina tonge o Moretekai i têa. Ka Eseta na enoni hato ga bâsia ka konetenia na bâkorohana. Matena i râ me na matena iana i banu, ngaia ki gahu manga i visia o Hegai na vâmavo i bâsuria na ruma ni gete. 16Vikê igê na pita na harisi o Ataseresese ki maneraha surigi, igê na tangahuruta na hageha na Tebete, ngaira ka merâ ka Eseta i ruma raha tanga na maneraha o Ataseresese. 17Na maneraha ki tenia ngavê teharira na ani getera na kere gete. Ngaia ki naka i bêna ka Eseta na tarepuri i marisina vi kaniana na maneraha ma ki kasia ki geteraha urusia ka Vasiti. 18Hemuri na maneraha ki katoa na magotoha raha, hanana ga hagahigasia igê ka Eseta, ma ki harora na mane ni hagaotonga ma na gavumane hato iana. Ngaia ki vi tangara na enoni hato i marungira, ka mamaro tenigi na tagaraha ma ki vutungira renigi na mahatanga raha ngavê manga hanana i tuguhia ngaia na maneraha.
O Moretekai ki hagatahia na maneraha
19I na matena ngekana na maneraha ki bani atea o Moretekai, hanana i tagara tanga. 20Ka Eseta ki mamênga vige visia vi ngaia ki na Siu. O Moretekai ki bani vi tanga, vi siana ki hagagirara ta na enoni renia marena. Vikê ka Eseta ki râ suria vikana, manga i bani tê viteana me o Moretekai i marupea me ngaia ka Eseta matena i sisite mênga. Ngaia ki ama ni rahesia nga God ma ki ama ni marupegi nga ma ramata iana God ma na tauha iata na Siu.
21Matena o Moretekai ki tagara i ruma raha iana na maneraha, na vâmavo o Bigitana mo Teresi garu anumasia na tarâto tangagi na kiboru iana na maneraha. Ngairerua karu haganega karu merongasia na maneraha o Ataseresese ma karu harikato vigaru nahuia ki meme. 22O Moretekai ki girararerua ma ki hagarongoa na geteraha ka Eseta renirerua. Hemuri ka Eseta ki hagarongoa nogana na maneraha renia na tarana ngekana o Moretekai i bani girara. 23Ngekana ka hahariria ma ka tarahua vi i monari. Vikê ngaira ka riguirerua igê na apinige ni riguiha. Na maneraha ki haribona, ka segegi so na tarani ngegana igê na buka tangagi na marâ ga voravora me igê na apaneni i marungigi.
Currently Selected:
ESETA (Greece) 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific