EPESO 4

Na obahahaku

1Hoita, inê nga, gê oga igê na ruma ni hagaitangiha, renia gê tagara tanga na Araha, inê kê kanukanugamu, mu mauri suria na tarana, God i vategamu renia, matena i ategamu. 2Siana kamu hagarahasigamu maremi. Mu haritagi, ma kamu piringiape tare. Mu hetakuiheri, ma kamu hekomaniheri. 3Na Higona Apu ki bani katogamu, kamu obahaku. Mu uhungia nga, kamu ama ni obâbahaku nga ma kamu marapeheri. 4Na haku na enoni, ga tongesuri, ki gi tage togo; ma na Higona Apu ki gi tage togo, ma nikâ i gi tage togo na marâ, mu naasia, suria God ki bani ategamu tanga. 5Na Araha ki gi tage togo. Na tongesuriha ki gi tage togo. Na batesimo ki gi tage togo. 6God ki gi tage togo, ma ngaia ki na vaemata na enoni hato, i Araha iata na enoni hato, i marupera na enoni hato, ma ki gâga i pasita na enoni hato.

7Ga râ hegitigi na mahatanga, o Kirisito i bani votogi tanga na ara ni hitangika. 8Renia na Buka Apuna ki vi,

“Ngaia ki akê i haha.

Ngaia ki merarâ rako na enoni,

i bani henahuraura.

Ngaia ki vutungira na enoni.”

9Hoi, na ta ki na girarana na tamasinga, i vi “ngaia ki akê i haha”? I vi, vi ngaia ki soso i nago: ikê ki vi, vi soso i rarona na maveta. 10Tahema na ani, i soso me, ngaia ki akê teharia na vavearo, hanana i gâga igê na ara ni agua hato. 11Ngaia ki na ani, “i vutungira na enoni”. Ngaia ki kasira tani ka aposotolo, tani ka poropete, tani ka tarohenia na Taroha Koro, tani ka bâsurira na enoni, ma ka hagesurira. 12Ngaia ki kato vikana, hanana i hagarêra na kariana hato God tanga na tagaraha iana, hanana ga hagaraha na haku na kariana o Kirisito. 13Manga ngekana, igia hato ka page obahaku igê na haku gi tage, renia igia hato ka tongesuria ma ka girara o Karena God. Igia ka page voravora manga na Mane, i koro teha: ngaia ki no Kirisito, i koro teha ngavê. 14Ngekana igia ki hato, vi ge page mangara na kere kare, ga tangatanga hepe. Ma na mane ni hagaparunga ki hato, vi ge page hagabekasigia renia na hagesuringa iata, i mangagi na navo, i toregia rârâ, se i mangagi na roga i rêraheriri, ma ki ahegenigia rârâ. Ngaira ka hagatasira na enoni renigi na hagaparunga, ga katogi. 15I tuguhigia hete, viga nganganihaga igê na monariha ma igê na hetakuiha. Manga ngekana igia ka voravora nga, vi ga obahaku henia o Kirisito. Igia mo Kirisito ki manga na apena hagenani na enoni. O Kirisito ki manga na bêna. 16Ma igia ka manga na apena. Ngaia ki bêngenigi na ara ni agua hato igê na apena, ga hearari, ma ka heratorato maninga, hanana na ara ni agua ka tagara bâkoro tanga na apena hagenani. Tahema, manga vi na ara ni agua, ma ki tagara maninga, na apena hagenani ki mauri bâkoro. I tagenana ma tanga na haku na enoni, ga tongesuri: manga vi na ara ni enoni igê na hakuta ngekê, ma ki tagara maninga, na haku hagenani ki raharaha, ma ki nganganihaga renia na hetakuiha.

Na mauriha haoru suria o Kirisito

17Hoi, igê na raramohana na Araha inê kê bonasigamu, siana kamu ama ni paronga nga mangara na enoni ahuroto. Na takotako iata ka bekabekaga, 18ma ki bono na osuta. Ngaira ka pe nahunia na mêriha, God i votoa, suria ngaira ka bonobonoga ngavê, ma ka parisihêga ngavê. 19Ngaira ki hato, vi ge maki. Ngaira ka hagamahahagasia na eraha, ma ki tanugi na ani mavê na marâ era, na teniha era ga obanigi.

20O Kirisito ki pe hagesurigamu vikana! 21I monari, igamu kamu bani rongo tarohana, ma suria igamu ki na kariana, igamu kamu bani girara na monariha. Ngaia kani i pasina o Kirisito. 22Tahema mu kasigi râ na bani tauhami, ga katogamu, kamu oga manga bani hanami. Manga i mareha, ka page hagaparugamu ma ka page erasigamu na teniha era. 23I tuguhigamu, mu urisigi ka haoru ngavê na mêrihami. 24I tuguhigamu, mu taugi na ani haoru na tauhami, na ani ga arâ surigi na tauhana God, i hagavoragi, ma ka hagabângenigi mareta igê na morana na mêriha, i koro ma ki oto i maana God.

25Manga ngekana, ki hatohato na hagaparunga! Na ara ni hitangimi ki tuguhia, i tamasi monari tanga na goana igê na tongesuriha, suria igia hato ka oga igê na haku na enoni, ga tongesuri, i manga na apena o Kirisito. 26Manga go mangariaga, siana na mangariaganiha iamu ki hagatasigo. Siana ko mangariaga mênga, matena i susu na arito. 27Siana ko naka na matora tanga Satana. 28Na enoni hanago ki tuguhia, siana ki hanago nikâ. Ki tuguhia, i tagara marena igê na tarana i oto, hanana i nahunigi na marâ tanga na mêrihana marena, ma hanana i girara i tamanira na enoni, ga matareha. 29Siana kamu tamasi bera, ma kamu tamasi bâkoro ma hete. Ma igê na matena i arari, mu visigi ma na tamasinga koro, ga tamanira, ma ka hagaotora na enoni, ga rongogi. 30Siana kamu hagabono obana na Higona Apu iana God. God ki bani segegamu renia na Higona Apu, na girarana, vi igamu ka na anina igê na Tangiana ni Tahinga iaka. 31Mu kasigi râ na siva. Siana kamu henahu, ma siana kamu mangariaga. Siana kamu pupuhara, se guhaguha. Siana kamu tamasi erasira na enoni igê na ani mavê na tarani! 32Mu korokoro heri, ma kamu hetamaniheri, ma kamu hebonotenigi heri hete, tagenana manga God, i bani bonotenigi na tasi iami renia o Kirisito.

Currently Selected:

EPESO 4: KCB

Highlight

Copy

Compare