EPESO 5

Na mauriha suria God

1Igamu ka na kariana God. Ngaia ki takuigamu. Tahema i tuguhigamu, vi gamu uhungia, kamu amaka suria. 2Na hetakuiha ki tuguhia i marungia na mêrihami, tagenana manga o Kirisito, i takuigia, ma ki me tangagia. Ngaia ki tagarenia tanga God na mêrihana manga na votovoto koro na vogasiha, i hagakoro obana God.

3Renia igamu ka na kariana God, tahema i pe ararigamu, vi gamu tamasi renia na paronga era, se vi renia na ani mavê na tauha era, se vi renia na maongoha. 4Ma nikâ i pe ararigamu, vi gamu tamasi bera, se vigamu tamasi bekabekaga, se vigamu hagatara bera. Ki tuguhigamu hete, mu visia koro God. 5Mu takotako maninga: i asa hagetage, vi ge oga igê na Arahanga iaterua o Kirisito ma God na enoni, i paronga i era, se i tanu era, se i maongo, suria na maongoha ki manga na vogasiha tanga na ataro.

6Siana ta na enoni ki hagaparugamu renigi na tamasinga bekabekaga ngegana. Surigi na tarani nga ngegana God ki page hagaitangira surigi na enoni, ga guguruga tanga. 7Tahema mu hinarura nga na enoni ngegana. 8I nago igamu kamu oga igê na mengo, ma suria igamu ki na kariana na Araha, igamu kamu oga igê na marara. 9Suria ngaia nga na marara kani hagarahagi na ani mavê na koroha, ma na otoha, ma na monariha. 10Mu uhungia nga, hanana mu giraragi na marâ, ga hagakoro obana God. 11Mu hinarura nga na enoni, ga oga igê na mengo ma ka mangara na apinige era. Mu ranganira mave hete. 12Manga ga tamasigi na marâ, ngaira ka tanugi pinihi, na tarana ngekana ki na agua ni makiha. 13Ma ki manga ga ranganigi mave na marâ hato ngegana, ngekana ngaira ka bâsigi maninga, vi ga manga i he. 14Suria na marâ, ga bani rangania mave, ngaia ki voravora renia na marara. Tahema igê na ki ka vi,

“Gu rite tenia na mêruha!

Gu mêri aporo tenira na ani ga me!

Mo Kirisito ki page mavesigo.”

15Mu bâbâ maninga, manga i he kanimu mauri. Siana kamu mauri mangara na enoni, ga bonobonoga. Ma kamu mangara hete na enoni, ga takotako. 16Siana kamu gâga purua ma, ma kamu gâga maninga tare hete, suria i ngekê ki na tangiani ni heuhungiha. 17Vikê siana kamu gâga bonobono, ma kamu uhungia hete, hanana mu tarahugi na marâ, na Araha i obanigamu, vi gamu tanugi.

18Siana ka ruguhigamu na tonoha, renia na tarana ngekana ki page aerasigamu. I araria vige angarigamu ngavê hete na Higona Apu. 19Mu kiki tangagamu heri igê na ringe apuna, na ki apuna, ma na ki ni rotu. Mu kirigi na ki apuna ma na ringe apuna tanga na Araha, matena mu visia raha igê na aitangihami. 20Igê na raramohana na Araha iaka o Jesu Kirisito mu visia koro tare God Vaemana renigi na ara ni marâ.

21Enoni êragi, mu hanetasigamu heri, suria mu hanetasia o Kirisito.

22Igamu na gete êragi, mu têtê na viteata na mane iami, tagenana manga mu tê viteana na Araha. 23Renia na mane êragi ki bêngenia na gete iana, tagenana manga o Kirisito ki bêngenia na haku na enoni, ga tongesuri. Ma nikâ o Kirisito ki na Hagamauri iana na haku na enoni, ga tongesuri. Na haku ngekê ki manga na apena na enoni, mo Kirisito ki manga na bêna. 24Tahema na gete êragi ki tuguhira, ga têtê viteata na mane iata igê na ara ni marâ, tagenana manga na haku na enoni, ga tongesuri, i tê viteana o Kirisito.

25Igamu na mane êragi, mu takuira na gete iami, tagenana manga o Kirisito i takuia na haku na enoni, ga tongesuri, ma ki kasi manavana ki me tanga. 26Ngaia ki kato vikana, hanana i tagarenia na haku na enoni, ga tongesuri, tanga God. Renirerua na manuha apuna ma na tamasinga na tongesuriha ngaia ki tanania, ki matarotaro, 27hanana i naka tanga ngaia marena na haku na enoni, ga tongesuri, i bâkoro era tanga ngaia marena, i matarotaro, ma ki pe makoraga, i pe tongotongoga, se vi ge herurumi, se vi na ani mavê na marâ, i pe koro, renia. 28Na mane êragi ki tuguhira, ga takuira na gete iata, tagenana manga ngaira ga takuira so na apeta mareta. Na mane êragi, i takuia na gete iana, ngaia ki takuia so marena. 29(I asa ta na enoni, vi ge kitenia so na apena marena. Ngaia ki hagangêa, ma ki marupea hete, tagenana manga o Kirisito i marupea na haku na enoni, ga tongesuri, 30suria na haku ngekana ki manga na apena, ma igia ka na agua igê na apena.) 31Na Buka Apuna ki vi, “Tahema na mane ki page panirerua o vaemana ma kenana, ma ki page gâga haku henia na gete iana, ma ngairerua karu page vora manga na vere tage togo ma.” 32Igê na tamasinga ngekê ki tâ pinihi ta na girarana raha. Inê mareku kê takusia, na girarana ngekê ki tamasi renirerua o Kirisito ma na haku na enoni, ga tongesuri. 33Ma nikâ ngaia ki tamasi renigamu nogami: na ara ni mane êragi ki tuguhia, i takuia na gete iana manga ngaia so marena, ma na ara ni gete êragi ki tuguhia, i hanetasia na mane iana.

Currently Selected:

EPESO 5: KCB

Highlight

Copy

Compare