EPESO 3
3
Na tagaraha iana o Paulo tangara na enoni ga pe Siu
1Tahema inê Paulo kê nungia God tangagamu, mu pe Siu. Inê kê oga igê na ruma ni hagaitangiha, suria inê kê tarohenia o Kirisito Jesu tangagamu. 2Igamu kamu bani girara, vi God ki koro era, i bani ateê tanga na tagaraha ngekê tangagamu. 3God ki rangania na katoha pinihi iana, ma ki hagagirarê renia. Inê kê bani sege sisite râ renia na tarana ngekana. 4Ma ki manga mu obania, vi gamu tomania nikâ na marâ, gê bani segea so, igamu kamu page tahe tara renia na giraraha iaku renia na katoha pinihi iana o Kirisito. 5I nago God ki pe hagagirarara na enoni renia na katoha pinihi ngekana, ma i ngekê God ki bani rangania tangara na aposotolo koro iana ma na poropete iana renia na Higona Apu. 6Na katoha pinihi i manga ikê: renia na Taroha Koro na enoni, ga pe Siu, ma na Siu ka nahunia tagenata na mahatana God. Ngaira ka hegoata igê na haku gi tage, ma ka nahunia tagenata na marâ, God ki bani surua renia o Kirisito Jesu.
7God ki bani ateê, kê tagara renia na Taroha Koro, suria ngaia ki mahata tangê, ma na raramohana ki tagara i pasiku. 8I monari, i pe arariê, suria na ara ni kariana hato God ka koro tehariê. Henaka i manga ngekana, ma God ki mahata tangê, ma ki ateê, hanana gê ateate tangara na enoni, ga pe Siu, renia na Taroha Koro renia na ruruguha raha teha ngavê iana o Kirisito, 9ma kê hagagirarara na enoni hato renia, vi manga i he God ki tagarahia na katoha pinihi iana. God, i hagavorara na ara ni marâ hato, ki pe rangania na katoha pinihi iana igê na bevoana i nago, 10hanana vi na matena ngekê renia na haku na enoni, ga tongesuri, ngaia ki hagagirarara na ani ga araha, ma na ani raramohaga i bevoa purua renia na takotako mataha iana igê na ara ni tarani. 11God ki kato vikana suria na katoha iana, i bani oga me i nago kere vê noga. God ki bani katoa na katoha ngekana renia o Kirisito Jesu, na Araha iaka. 12Suria igia ka obahaku henia o Kirisito, ma ka tongesuria, igia ka pe magu, vi ge râ i maana God, suria igia ka hagêguritogo renia. 13Tahema inê kê nungigamu nga, siana kamu makumakusiga, suria inê kê hatamigi na mamasiaganiha tangagamu. Mu ageage renigi hete.
Na hetakuiha iana o Kirisito
14Tahema inê kê susure, ma kê nunginungi tanga God Vaemaka. 15Ma renia ngaia na ara ni haku hato i pasina ma i maveta ka tonga hunani. 16Inê kê nungia God, i ruruguha raha teha, hanana i hagaramonigamu renia na Higona Apu, mu gatagata igê na aitangihami. 17Vikana o Kirisito ki gâga i pasimi, suria mu tongesuria. Inê kê nunginungi, hanana mu nganganihaga igê na hetakuiha, i hunasigamu. 18Ma kê nunginungi, hanana henira na kariana hato God igamu kamu girara mu rongorongogirara, vi na hetakuiha iana o Kirisito ki raha ngavê. Ngaia ki buhira na enoni hato i maveta hagenani. Ngaia ki gâga tare, ki teha, ma ki nganganihaga. 19Inê kê nunginungi, hanana mu girara, vi na hetakuiha iana ki raha teha ngavê, ma ki asa na enoni, vi ge girara hagenani. Inê kê nunginungi, hanana vi God marena ki angarigi nga na aitangihami hagenani.
20Ge visia raha God. Renia na raramohana i tagara i pasika, na mahatanga iana ki raha teharigi na ani mavê na marâ, ga girara ga nungigi, se ga takusigi. 21Igê na haku na enoni, ga tongesuri, ma ka obahaku henia o Kirisito Jesu, ka visia raha God tare ma tare ma, mareha vige page hato. Monari.
Currently Selected:
EPESO 3: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
