BUKA NI TAKOHA 4
4
1Suria na maveta hagenani inê kê bâsira nikâ na enoni ka hagamamasiagara na enoni getera. Na enoni ga mamasiaga, ngaira ka angiangi, ma ki mareha rârâ ta na enoni vige haganaku parongata. I mareha rârâ ta na enoni vige tamanira, suria na enoni ga hagamamasiagara ka nahuni ramoha.
2Tahema inê kê takusia, vi na enoni ga bani me, ka oga maninga teharira na ani ga tahitahi mêngara. 3Ma na ani i mareha ngavê vige vora, ka oga maninga teharira ngaira, na ani ga bani me ma na ani ga tahitahi mêngara, suria ngaira ka pe hatamigi rârâ na mamasiaganiha igê na ogaha i maveta ikê.
4Inê kê bâsira nikâ na enoni ga tagara bâraha, hanana viga tehateha. Renia ta? Suria ngaira ka hengarira na enoni getera. Ma na tarana ngekana ki tâ hagâbo ma nikâ. Ngaia ki mara ma ga uhungia viga taua na roga. 5I monari, na enoni bonobonoga kani rumirumi rima ma ki mesi magêha. 6Henaka vikana, ma ki ararigia viga mamaro sisite taraka, hanana siana ke arumaruma tare ma ke uhungia tare vige taua na roga.
7Ta na marâ nikâ gê bâsia i maveta ikê, ki oga hagâbo ma. 8Ta na mane ki oga getegetea. Ngaia ki pe apara kare ma ngaia ki na varomu. Ma ngaia ki ama ni tagara raha tare nga. Ngaia ki asa vige togo na aitangihana renigi na ruruguha iana. Ngaia ki tagara bâraha tanga o ti? Tanga o ti kani usi vige tari surigi na tarani ni vagevageha? Na tarana ngekana ki oga hagâbo ma nikâ. Na tarana vikana ki erasia na ogaha iana na enoni.
9Na vererua ki koro teharia na vere tagena, suria garu hetamani, hanana na tagaraha iaterua ki akê me maninga. 10Manga ta na hetangiterua ma ki votavota, na tamana ki girara i ragea aharaga. Ma ki manga na enoni i oga getegetea ma ki votavota, e, i era ngavê, suria i mareha rârâ ta na enoni hanana vige ragea aharaga. 11Igê na rogaroga ahuru, ma na vererua ma karu tâtâ haku karu mauru, ngairerua karu mahanahana. Manga i he ko girara go mahanahana, manga vi igo getegetego? 12Na vererua karu girara garu tehateha igê na hearihatana ma tanga na vere tagena ki kere bara. Na varo na gagana gi oru ki bara vige mu.
13Na mane na gapu haoru i matareha ma ki takotako mataha, ngaia ki oga maninga teharia na maneraha i gemêa ma ki bekabekaga ma ki usitenigi na hagaotonga iata na enoni. 14Na mane gê takusia kani manga ikê: I murina i hura tenia na ruma ni hagaitangiha, ngaia ki vora re na maneraha ma ki marungia na agua i vora matareha igê. 15Na enoni hato ka vagevagesia, suria i page urusia na maneraha. 16Hagenago na bera na enoni ka raruni togo renia ma hemuri ka raruni era renia. Na ata i rongo raha ki rongo hagâbo ma. Ngaia ki mara ma ga uhungia viga taua na roga.
Currently Selected:
BUKA NI TAKOHA 4: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
