BUKA NI TAKOHA 5
5
Siana kamu gasuga ni surusuru
1Mu girara, matena mu arâ i ruma ni rotu. Manga mu arâ i ngekana, ki tuguhigamu, mu hagesuringenigi na ta ki oto ma na ta ki pe oto. Manga i mareha, igamu kamu maratorana na enoni bekabekaga, i vogasi ma ki pe girara vi na ta ki oto se vi na ta ki pe oto. 2Mu takotako maninga ma hemuri kamu tamasi. Siana kamu gasuga ni surusuru tanga God. God ki oga i pasina ma igamu kamu oga i maveta. Tahema siana ki rakorako i harami renigi na suruha. 3Manga mu takoha raha, na maruteha era ka page tarahugamu. Ma ki manga i rakorako i harami, igamu kamu page tamasi bekabekaga. 4Vikê, matena mu surusuru tanga God, mu hagamonarigi rêrê nga. Ngaia ki pe obanira na enoni ga surusuru bekabekaga. Mu hagamonarigi nga na suruha iami. 5Na enoni i pe surusuru, ki koro teharia na enoni i surusuru ma ki pe hagamonarigi na suruha iana. 6Siana kamu gasuga ni surusuru, i era ma kamu tasi. Vikana ki tuguhigamu, mu arâ nga i pasina na mane ni hagarahenga iana God ma kamu hagarongoa, vi igamu kamu suru purupuru. Siana mu katoa God ki mangariaga tangagamu, i era ma ki erasigi na tagaraha iami. 7Henaka mu marute hagarako, se mu tagara bâraha hagaborâ ma, se i rakorako i harami, ki tuguhigamu, mu ama ni hagahigasia nga God.
Na ruruguha ki oga hagâbo ma
8Siana kamu hagagira, matena mu bâsia na gavumane i hagamamasiagara na enoni matareha ma ki usi vige vatera renigi na marâ ga oto tangara. Na enoni igê na gavumane ka roherohe pusira heri, haganega kere so ki akê ki tariha kere kê. 9Na ani mavê na ruruguha igê na agua ki araria i tarahura nga na ara ni enoni hato. Tahema ngaia getea ma na maneraha ki tuguhia, vi bâbâ igê na tarana ngekana.
10Manga go vanasigi na haga, ki asa vige togo na aitangihamu. Manga go tenia vigu ruruguha, i asa iamu vigu nahunigi na marâ hato go tenigi. Ngaigi ki oga hagâbo ma. 11Manga ga rakorako teha na ruruguha iamu, ka rakorako teha nikâ na enoni ga goga hagêgurigo. Na ta kani varahigo? Nga noga ma i rongo raha na atamu, suria go ruruguha. 12Na enoni tagara ki mauru bâkoro, henaka i ngêngê masu se i magê ma. Ma na enoni ruruguha ki tâtâ horota, suria i masumasu apuri ma ki takoha bâraha.
13I maveta ikê inê kê bâsia na tarana i erataga ngavê. Na enoni ki nakanaka na haga hato iana tanga na matena i hemuri. 14Hoita, ma ta na tarana ki tarahua ma ki tê tara renigi na ruruguha iana, ma ki pe hita so rârâ tani na ruruguha, hanana vige meme tenigi tangara na karena. 15Igia ka voravora me rupaturi ma ka meme rupaturi. Henaka ga tagara bâraha ngavê, ma ki asa vige torea ta na marâ henigia, matena ga meme. 16Na tarana ngekana ki pe oto! Na tarana ga vora me henia, ka magahuru nikâ henia. Igia ka tagara raha. Ma na ta ka hagavorea? Na tamana ma vi igia ka uhungia ma viga taua na roga. 17Na ogaha iaka ki oga igê na mengo, igê na mamasiaganiha, igê na anumanumaha, igê na mangariaganiha ma igê na ape era. 18Tahema inê kê vi: Suria na kere matena abubu God ki naka tanga na enoni, ngaia ki araria ma, i ngêngê, ki totono ma ki vagevagesigi na marâ i tagara bâraha tange. Ngaia nga kani vora tanga. 19Na ruruguha ma na nahuninga ka na mahatanga ka râ me tenia God, ma God ki nakara na enoni ka vagevagesigi. Vikê na enoni ki tuguhira, viga visia koro God ma ka vagevagesigi na marâ ga tagara bâraha tange. Na vagevageha ka na mahatanga i râ me tenia God. 20Suria God ki nakara na enoni ka vagevage, tahema ngaira ki asa vige takoha bâraha renia na kere ogaha abubu.
Currently Selected:
BUKA NI TAKOHA 5: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
