BUKA NI TAKOHA 3

Na ara ni marâ ki nahunia na matena iana

1Na ara ni marâ i maveta ikê ka voravora me igê na mateni tange.

2Na matena tanga ga apara kare

ma na matena tanga ga meme.

Na matena tanga ga hasihasi

ma na matena tanga ga opaopa.

3Na matena tanga ga nahunahu enoni

ma na matena tanga ga rikira na enoni.

Na matena tanga ga hogehoge

ma na matena tanga ga totora ruma.

4Na matena tanga ga angiangi

ma na matena tanga ga ruru.

Na matena tanga ga angiangi maramara

ma na matena tanga ga mâmâ.

5Na matena tanga ga mauru haku

ma na matena ga usisiheri.

Na matena tanga ga heroro

ma na matena tanga ga hemasesi.

6Na matena tanga ga garigari

ma na matena tanga ga hagatasigi.

Na matena tanga ga nakanaka

ma na matena tanga ga kasikasi.

7Na matena tanga ga tarisigi

ma na matena tanga ga turatura aporo.

Na matena tanga ga munimuni

ma na matena tanga ga tamasi.

8Na matena tanga ga hetakuiheri

ma na matena tanga ga hekitenigi.

Na matena tanga na hearihatana

ma na matena tanga na marapeha.

9Na ta ka na meni na tagaraha iaka? 10Inê kê bani giraragi na tagaraha i higa i hagahigegia God renigi. 11Ngaia ki bani nakagi na mateni tange na ara ni marâ. Ngaia ki katora na enoni, ka obania viga giraragi na marâ ga mamêngagi, ma ki pe katora ke aitangisigi maninga na tauhana. 12Tahema inê kê takusia, vi na marâ gi tage ma i ararigia nga viga katoa kaniga obâbakoro ma ka vagevage na ogaha iaka. 13Igia hato ki ararigia, viga ngêngê ka totono ma ka vagevagesigi na meni na tagaraha raha iaka. Ngaigi ka na mahatanga ga râ me tenia God.

14Inê kê tahetara, vi na ara ni marâ i tanugi God, ki asa vige page riariaga, ma ka tâtâ hagahu hete, ki bê ki arâ. I bara vige hagatonganigi kê nikâ, se vige hagasibagi. Na tauhana God ki katora na enoni, ka hagahigasia ngavê ngaia. 15Na ara ni marâ ga vora me i ngekê, ka bani vora me i nago. Ma na ara ni marâ ga page voravora me i hemuri, ngaigi ki bani vora me i nago nogani. God ki katogi na bani marâ, ka ama ni voravora me nga tare ma tarema.

Na eraha i maveta

16Inê kê girara nikâ, vi i maveta ikê na eraha ki oga parea na otoha, ma ka hagaitangira na enoni koro parera na eragani nuni. 17Inê kê tako kê vi: God ki surira na enoni hato, na ani koro ma na ani ga era, suria na ara ni marâ, henaka vi na ta, ngaigi ki tonga na mateni tange. 18Inê kê takusia, vi God ki uhungigia, hanana i hagagiraragia, vi igia ma na togoha ma na marâ vigana, ka tagenaka ma. 19Ma ke bâ! Na marâ, i tarahugia igia na enoni, ki tarahura ngaira nogata. Igia ma ngaira ka meme. Igia tagenaka ka torea na rogaroga gi tage ma. Igia ma ngaira ka tagenaka ma, suria na ara ni marâ ka oga hagâbo ma tangagia, igia ma ngaira. 20Igia na enoni ma ngaira, igia ka soso tagenaka igê na kiru ma ka voravora re na mako. Igia ma ngaira ka râ me tenia na mako ma ka page vora aporo nikâ renia na mako. 21Ti ki girara? I monari vari, vi na rogaroga ni mêriha iana na enoni ki aporo i pasina God, ma na rogaroga ni mêriha iata na togoha ma na marâ vigana ka soso i rarona na mako? 22Tahema inê kê takusia, vi na marâ gi tage ma ki ararigia viga katoa: ga vagevagesigi na meni na tagaraha raha iaka. I mareha vi ta na marâ eâ nikâ. I bara ngavê tangagia ge girara, vi na ta ki page akê me tangagia i murina ga meme.

Currently Selected:

BUKA NI TAKOHA 3: KCB

Highlight

Copy

Compare