BARUKU 4
4
1Na takoha mataha ki na buka ni ramata iana God.
Ngaia ki na ramata, i asa vige page hato.
Na enoni, ga marupea maninga,
ka page nahunia na morana na mauriha,
ma na ani, ga pe marupea, ka page meme.
2Ai ni Isiraele, ge urisi parongaka.
Ge têa nganganihaga na takoha mataha.
Ge tabea na marara bâkoro iana.
3Siana ka hagamarumungenira na enoni getera,
ka tavoa tenigia na ageageha iaka.
Siana na ai mahuara ka nahunia.
4Ai ni Isiraele, igia ka babarisi.
God ki bani hagagiraragia
renigi na tarani, ga hagakoro obana.
Na hetamaniha tanga i Jerusaleme
5Kariaku, mu ramoramo!
Na atami Isiraele!
Na ata i asa, vige page hato.
6Ga hagavuringenigamu tangara na ahuroto,
ma ki mareha tanga vige mutegamu ngavê.
Suria igamu kamu hagamangaria God,
tahema ngaia ki mahatangenigamu tangara na merongami.
7Igamu kamu hagamangaria na ani, i hagavoragamu,
suria igamu kamu vogasira na ataro
ma kamu pe vogasia God hete.
8Suria igamu kamu bonotenia God,
i bani oga me ma tarema
ma ki marupegamu, manga vi igamu ka na karena,
tahema igamu kamu hagamamasiaga Jerusaleme,
i marupegamu manga vi ngaia ka na kenami.
9Jerusaleme ki bâsia God, i hagaitangigamu,
suria ngaia ki mangariaga tangagamu.
Jerusaleme ki vi tange na hinua hato rihia, ki vi;
“Bâsia na mamasiganiha raha, God ki vateê renia.
10Inê kê bâsia God, i bani oga me ma tarema,
ngaia ki hagamarumungenira na merongaku,
ka henahuraura na kareku, mane ma na hehene.
11Inê kê marupera ma kê vagevagesira bâraha na kareku
ma inê kê angi ma kê angi maramara renira,
matena ga henahuraura paniê.
12Siana ta na enoni ki mamava teniê i ngekê,
gê mamasiaga, ma kê nâ ma kê magari.
Na kareku ka pe râ surigi na ramata iana God,
ma na bagaparongata ka katoê, kê vora re na hiru.
13Ngaira ka pe botage renigi na ramata iana,
ma ka usi vige komani têgi.
Ngaira ka usitenia God,
hanana vi bêngenira igê na otoha.
14“Râ me, igamu na hinua hagarangiê,
ma kamu takusia, manga i he God,
i bani oga me ma tarema,
kani hagamarumu, ka henahuraura na kareku.
15Ngaia ki hagatorangenira me
na mane ni me i na marê hagatê,
ka taharira na kareku.
Na me ngegana ki bara vê, vige makimakiga.
Ngaira ka tamasi igê na tamasinga, i rongo getigi.
Ngaira ki bara, vige hagahigasira na bani nuni,
ma ki asa, vige takira na kare.
16Na me ngegana kani ga henahuraura
na kareku hetakui, na mane ma na gete,
ma inê kê hita so ikê
gê nâ ma kê magari.
17“Kareku, manga i he kê girara, vigê tamanigamu?
18Na ani i hagaitangigamu,
ngaia ma ki girara, i hagatahigamu tenira na merongami.
19Kareku, ua, mu râ!
Mu kahu giraragamu maremi!
Be oga so ma inê, inê getegeteê.
20Inê kê bani tasigi râ na ani i bâkoro na tuguni,
gê tuguni renigi igê na matena ni marapeha.
Ma kê bani urisi renigi na tarisigani na gahu,
suria gê hari ma kê avaravara.
Igê na ogaha iaku inê be ama ni avarasia nga God,
i bani oga me ma tarema.
21“Kareku, mu ramoramo,
ma kamu avarasia God.
Ngaia ki page hagatahigamu tenira na merongami,
ga hagamamasiagagamu ma ka ramonigamu tare.
22Inê kê tongesuria, vi God,
i bani oga me ma tarema,
ngaia ki sugi hagatahigamu.
God apuna ki page hagakoro obaku,
suria ngaia ki sugia ma, vige hetaki renigamu,
renia ngaia ki na hagamauri iami,
i bani oga me ma tarema.
23Matena ga henahuraugamu,
inê kê angisigamu ma kê mesigamu ngavê.
Ma God ki page toregamu aporo me tangê,
ma ki page katoê, kê ageagesigamu,
ma kê obâbakoro tare.
24Na enoni igê na hinua hagarangiê
ka bani bâsira na merongami, ga henahuraugamu,
ma ka page bâsia nikâ God, i hagatahigamu,
suria i raramohaga hunia
ma ki bani oga me ma tarema.
25Kareku, mu piringiape
ma kamu aganarigi na hagaitangiha,
God ki vategamu renigi.
Na merongami ka hagamamasiaga apemi,
ma igamu kamu sugi bâsira, ga mutemute
ma igamu kamu page teharira.
26Kareku, igamu kamu bani aro pere
igê na tara i sutasutaga.
Ga henahuraugamu mangara na totoha ni sipi,
na manero ka hanagora ma ka bêngenira vê.
27“Kareku, mu ramoramo,
ma kamu avarasia God.
Ngaia ki hagaitangigamu,
ma ki page takuigamu aporo.
28I nago igamu kamu togeaga, kamu kasi renia God,
ma i ngekê ki tuguhigamu,
mu togeaga i mêrihami hagenani,
kamu urisi parongami ma kamu têtê viteana.
29God, i bani katogi na bagabevoani, ki tarahugamu,
ngaia ki page hagatahigamu
ma ki page katogamu, kamu vagevage tare ma tarema.”
30Jerusaleme, gu ramoramo.
God, i bani hagamarahugo,
ngaia ki page haganaku parongamu.
31Na mamasiaganiha ki page tarahura na ani,
ga hagatavatavago,
ma ka mamavatenigo, matena go vota.
32Na mamasiaganiha ki page tarahugi na hinua,
ga henahuraura na karemu.
Na mamasiaganiha ki page tarahua i Babilone,
na hinua na karemu ka vora re igê na kare rakuraku.
33I nago i Babilone ki vagevage, matena go vota
ma ki koro na obana, suria go aruhuruhu
Henaka, ma ngaia ki page arikuku,
suria ngaia marena so ki page hihiruga.
34Inê be hatungia na ageageha iana
renia ga rako makira na enoni igê,
ma be urusia na paroparoha iana renia na obaeraha.
35Inê God, gê bani oga me ma tarema,
inê be karangia na gi huria.
Ngaia ki page aruhuruhu,
ma na ataro ka page gâga hagahu igê.
36Jerusaleme, gu bâ bêkê,
ma ku bâsia igê na vagevageha,
God ki vatego renia.
37Bâ, na karemu!
Na karemu ga bani henahuraura igana!
Ngaira ka aporo me tangago!
God apuna ki bonasira ka haku me
tenia i kerekê ma tenia i kereso.
Ngaira ka aporo me tangago
ma ka vagevagesia na raramohana God.
Currently Selected:
BARUKU 4: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific