BARUKU 3
3
1“Araha raramohaga hunigo, God iata na Isiraelita, igami kami avarasigo igê na anumanumaha ma na mamasiganiha iamami. 2Araha, gu aganarigami ma ku takuigami, suria mi tangahurigami renigi na tasi iamami. 3Igo ko mauri ma ko Araha tare ma tarema, ma igami kami ama ni meme so nga. 4Araha raramohaga hunigo, God iata na Isiraelita, gu aganarigi na avarasiha iamami. Igami kami maratorata na enoni, ga me. Na êvarimami ka haritohego, igo na Araha God iata. Ngaira ka guguruga tangago, ma igami kami mamasiaga meni na bagaparongata ngaira. 5Gu bonotenigi na bani bagatauhata na êvarimami, ma ku takusigi hete na raramohamu ma na tarotarohamu, 6suria igo ka na Araha God iamami, ma igami kami page hagarahasigo. 7Igo ko bani katogami, kami hagahigasigo, hanana mi avarasigo. Ikê igê na marê, ga bani henahuraugami tanga, igami kami hagarahasigo, suria mi bani urisi parongamami tenira na êvarimami. 8Igo ko bani tokorenigami surigi na marê iata na ai mamahuara, ma ko katora, ka ruhigami, ka guhaberasigami ma ka kasikasi mamava hurigami. Igo ko hagaitangigami meni na bagaparongata na êvarimami, ga haritohego, igo na Araha God iamami.”
Na takoha mataha ki na hunana na mêriha mora
9Ai ni Isiraele, mu rongogi na ramata ni mêriha.
Karingagi, hanana mu page takotako mataha.
10Ai ni Isiraele, ki hega,
mu oga igê na marê iata na merongami?
Tanu hega, kamu ngani ma kamu mameaga
igê na marê iata na ani ga mamahuara?
11Tanu hega, kamu makoraga mangara na enoni ga me,
mangara na ani ga oga igê na agua iata na enoni ga me?
12Renia ta?
Suria igamu kamu bani kasia na hunana na takoha mataha.
13Manga vi igamu ma kamu bani râ surigi na obaniha iana God,
vikê igamu kamu nahunia na marapeha tarema.
14Mu garigi na morani na giraraha, na ramoha ma na takoha mataha,
hanana mu page tarahugi henigi na morana na mauriha arihu,
na marara i mavesigi na obami, ma na marapeha mora.
15Ti ki girara, vi i he kani oga igê na takoha mataha?
Ti ki girara i bêbanu igê na ruma ni ruruguha iana?
16I he ngaira nga na maneraha surigi na marê hato i maveta
17ga hagamanatara nikâ na manu ma na marâ vasiga?
I he ngaira nga na enoni ga nahuni ruruguha
na siliva ma na golo ma ka tako togo renigi?
I he ngaira nga na enoni, ga ruruguha ngavê,
ga vanasigi ma ka gunahigi?
18I he ngaira nga na enoni, ga manisingenigi ngavê,
hanana ga tagarahigi na marâ bâkoro renigi na siliva?
I he ngaira nga na enoni, ga tangasigi tare na haga?
Ngaira ka migime na tagaraha iata.
19Ngaira hato ka bani magahuru,
ma ka oga igê na agua iata na enoni, ga me.
Na enoni getera ka urusira.
20Na apaparaha haoru ka ogasia na maveta,
ma ngaira nikâ ki mareha ngavê,
vige page tarahua na tara tanga na giraraha mora.
Ngaira ka tugupu,
vi i he nga na tara tanga na takoha mataha.
I mareha vê vige hagarea.
21Na kareta nogata ka bonobê ngavê teharira.
22I Kanane ngaira ka pe hagarea ngavê igê
vi na kere takoha mataha,
ma ngaira nikâ na ai ni Etome.
23Na raraha iana ka Hagara,
na enoni ni hagavara haga ni Mitiane me Tema,
na enoni ni sihonga ma na ani ga tamasi ususu,
ngaira hato ka garia makira na giraraha
ma ka pe tarahua na tara tanga na takoha mataha.
Ngaira ka bonobê ngavê renia.
24Ai ni Isiraele,
na arahanga iana na God iami ki raha teha ngavê.
Na raramohana ki raha teha,
i buhira na ara ni marâ hato.
25Na arahanga iana ki baga raraha
ma ki pe tonga na hagahatongina.
I bara vige hagararingenia,
vi aberabera se vi borahu.
26I nago vê noga ka vora me igê na ataro akâka.
Ngaira ki rongo raha na atata.
Ngaira ka borahu ma ka ramoramo igê na hearihatana.
27Ma God ki pe atera, hanana vige vora re na kariana,
se vige hagagirarara renia na tara tanga na giraraha mora.
28Ngaira hato ka mute ngavê,
suria ngaira ka pe nahunigi
na morana na giraraha ma na takoha mataha.
29Ti ki akê i vavearo,
hanana i torea me na takoha mataha?
Ti ki mevato me tenia na vaha i vavearo?
30Ti ki tage ki garia hagatê na takoha mataha?
Ti ki vuria renigi na ruruguha na golo?
31I mareha rârâ ta na enoni, vige tarahua,
se vige tarahua na tara tanga.
32Ngaia getea ma God ki girara na takoha mataha,
suria ngaia ki aitangisigi na ara ni marâ hato.
Igê na giraraha raha tahema ngaia ki tarahua.
Ngaia ki hagavora na maveta ki gâga tare
ma ki kasira igê na ataka mavê na marâ ga mauri.
33Ngaia ki bonasia na marara ki râ,
ma na marara ki râ.
Ngaia ki unia me,
ma ngaia ki aporo me.
Na marara ki tatata ma ki tê viteana.
34Ngaia ki tamasi,
ma na higu ka vora me otooto râ nga.
Ngaigi ki oga igê na atohani
Ngaigi ki vagevage ma ki mave,
ma ki hagakoro obana na ani i hagavoragi.
35Ngaia ki na God iaka.
I mareha rârâ tani, vige maratorana.
36Na ara ni tara ni giraraha mora
ka râ me tenia ngaia,
ma ngaia ki vatera na takoha mataha
tangara na Isiraelita na kariana hetakui.
37Tenia na matena ngekana
na takoha mataha ki vora i maveta
ma ki oga i berarogata na enoni.
Currently Selected:
BARUKU 3: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific