2 TESALONIKA 3
3
Nunginungi tangagami
1Hoita, goamami igê na tongesuriha, mu nunginungi tangagami, hanana na taroha renia na Araha ki ama ni arâhigi rêrê nga na hinua, ma hanana na enoni ka tongesuria, ma ka visia koro God renia, tagenana ma manga i pasimi. 2Mu nungia God nikâ, ki hagatahigami tenira na enoni, ga era ma ka pe koro renia ga goga na enoni, ga pe tongesuria na Taroha Koro.
3Ma na Araha, i hagamonarigi tare na tamasinga iana, ngaia ki page hagaramonigamu, ma ki page anumasigamu tenia na Merongana God. 4Ma na Araha ki katogami, kami tako togo renigamu, megami kami girara bâkoro, vi igamu kamu katogi ma kamu ama ni katogi nga na marâ, mi visigi tangagamu.
5Igami kami nungia na Araha, ki mavesigi na obami, kamu barua na hetakuiha iana God, ma kamu piringiape manga o Kirisito, renia ngaia ki hagaramonigamu.
Na enoni hato ki tuguhira viga tagara
6Goamami igê na tongesuriha, igami, na urusina na Araha o Jesu Kirisito, kami bonasigamu, kamu hinarura na goami hato igê na tongesuriha, ga marababaga, vi ge tagara, ma ka pe râ surigi na hagesuringa, mi hagatarêngenigi tangara. 7Igamu maremi kamu girara bâkoro, vi tuguhigamu, vi gamu tagara renigi na rimami manga igami. Igami kami pe marababaga, vi gami tagara, matena mi oga i pasimi. 8Igami kami pe tavotavo purua ma na ngêra, ga vategami na enoni. Igami kami vurivuri tenira tare. Ma igami kami hatamia bâraha na tagaraha. Igami kami tagara surigi na tangiani ma na bungiani, hanana vi siana kami hagamarâ apena na anima na hitangimi. 9I arari ma, vi igami kami oga hagêgurigamu, ma igami ki mareha. Igami kami tagara maremami, kami hagabângenia na tarana ngekana tangagamu, hanana vigamu arâ suria. 10Matena mi oga i pasimi, igami kami bani vi tangagamu hagarako, kami vi: “Na enoni, i marababaga, vi ge tagara, ki pe araria, vi ge ngêngê.”
11Igami kami visia na tarana ngekê, suria igami kami rongoa, vi tani na enoni i pasimi ka marusi, vi ge tagara, ma ka totoravoro ma. 12Igami, igê na raramohana na Araha o Jesu Kirisito, kami bonasira na enoni ngegana ma kami ramonira, ka haritagi, ma ka tagara, hanana ga nahunigi mareta na marâ, ga mauri re.
13Ma igamu, na goamami igê na tongesuriha, siana ki meme na apemi, vi gamu hekomaniheri. 14Vari ta na enoni i pasimi ki usi, vi ge rongoa na tamasinga iamami igê na leta ikê. Na ta kamu katoa renia? Mu girara vi o ti, ma kamu hinarua, hanana i maki renia. 15Ma siana kamu merongasia, ma kamu hagaotoa ma hete, manga na goami igê na tongesuriha.
Na hagahatongina na leta
16Igami kami nungia na Araha, i katogia, ka marape, ki vategamu na marapeha tare ma igê na ara ni agua. Na Araha ke angarigamu hato.
17Renia na rimaku mareku inê be sege vikê: inê Paulo. Mu mauru koro. Ikê nga hanana gê segea tare na ataku igê na ara ni leta. Gê segea vikê.
18Inê kê nungia na Araha iaka o Jesu Kirisito, ke takuigamu hato, ma ki korokoro tangagamu.
Currently Selected:
2 TESALONIKA 3: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
