2 TESALONIKA 2
2
Na Merongana God
1Hoita, i ngekê inê kê obania, vi gê tamasi renia na Araha iaka o Jesu Kirisito, i page arâ me nikâ, ma ki page hagahakugia, hanana igia ka gâga haku henia. Goamami igê na tongesuriha, inê kê nungigamu nga, 2hanana vi siana kamu hata ni bagatatako, se vi gamu anumanuma, suria tani na enoni ka vi, vi i bani râ me noga na Tangiana, i aporo me igê na Araha. Vari ta na enoni ki bani tamasi vikana, renia vi God ki tamasi i harana, se vi ta na enoni ki bani ateate tangagamu renia na tarana ngekana vari. Se ta na enoni vari ki vi, vi igami kami visia na tarana ngekana igê ta na leta. 3Siana hagetage kamu tongesuria ta na enoni, i hagaparugamu. Renia i page hagenago me na matena, na enoni ka page usisitenia igê God, ma ki page voravora me na Merongana God. Ma hemuri ma ki page mataro me na tangiana, i page aporo me igê na Araha. Ma God ki page hagaerasia hagetage na Merongana ngekana. 4Na Merongana God ngekana ki page ruhira, ma ki page tamasi erasira na ani mavê na ataro, na enoni ga vogasira, ma na anima na marâ, na enoni ga takusira, vi ga god. Ngaia ki page hagarahasia marena, vi ngaia ki teharira hato, ma ngaia ki page bêbanu i ruma ni rotu iana God, ma ki page gâga so i ngekana, ma ki vivi, vi ngaia ki God!
5Mu pe bani girara? Inê kê bani hagarongogamu renia na tarana ngekana, matena gê oga i pasimi. 6Ma ki oga ta na marâ, i hagabarasigi na tarani ngegana ga voravora me mave i na matena i ngekê. Igamu kamu girara na tarana ngekê. Hoi, igê na matena tanga ki page voravora me igê na Merongana God. 7Na eraha iana na Merongana God ki bani tagara noga i ngekê. Ma igia ka girara ga rongorongogirara na tarana ngekana, suria God ki bani hagagiraragia renia. Ma na marâ, i page voravora me, ki page voravora me igê na matena, God ki torea râ igê na ani, i hagabarasia. 8Ma hemuri ki kahu voravora me na Merongana God. Ma na matena na Araha o Jesu ki page arâ me nikâ, ngaia ki page uhihihunia ki meme, ma ki page hagaerasia ngavê renia na bâbâhana raramohaga hunia. 9Na Merongana God ki page arâ me, ma ki page nahunia na raramohana Satana, ma ki page katogi na ataka vê ma na mena, ma ki page hagaparura na enoni renigi na tagaraha raha, ma renigi na marâ, ga hagakonera na enoni. 10Ma ngaia ki era ngavê, ma igê na ara ni tarani ngaia ki page hagaparura na enoni, i asa iata, vi ge page tahi. Ma ki asa iata, vi ge tahi, renia ga usitenia, ma ka pe hanetasia na Taroha renia na Araha o Jesu, hanana vi ge tahitahi hete renia. 11Tahema God ki hagamarumungenia na tasi, ki ramo i pasita. Manga ngekana ngaira ka tongesuria na marâ, i pe monari. 12Tahema God ki page hagaitangira na enoni hato, ga pe tongesuria na taroha renia na Araha o Jesu, ma ka tasi, ma ka vagevage renigi na tasi iata.
God ki bani ategamu hanana mu tahitahi
13Goamami igê na tongesuriha, i tuguhigami, vi gami visia koro God tare renigamu, suria God ki takuigamu. Renia God ki bani ategamu, hanana i hagatahigamu hagenago, suria na Higona Apu raramohaga ki katogamu, kamu vora re na kariana koro God marena, ma suria igamu kamu tongesuria na taroha renia na Araha o Jesu. 14God ki bani ategamu, kamu vora na kariana, suria igami kami bani ateate tangagamu renia na Taroha Koro. Ngaia ki bani ategamu, hanana vigamu nahunia na Arahanga iana henia na Araha iaka o Jesu Kirisito. 15Hoita, goamami igê na tongesuriha, mu gâga gatagata nga igê na tongesuriha, ma kamu taugi bâkoro na hagesuringa monari, mi bani hagatarêngenigi tangagamu i nago.
16God Vaemaka ki bani takuigia, suria ngaia ki koro teha, ma ki bani ama ni hagaramonigia tare, ma ki bani katogia ka rarunitogo. Igami kami nungirerua God ma na Araha iaka o Jesu Kirisito, 17karu hagamaraka obami, ma karu hagaramonigamu, hanana mu girara mu katogi tare, ma kamu visigi tare na ara ni marâ, ga koro.
Currently Selected:
2 TESALONIKA 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
