1 TIMOTI 1
1
1Inê ki no Paulo. God, na Hagamauri iaka, mo Kirisito Jesu, na hagêguringa iaka, karu kasiê, kê aposotolo iana o Kirisito Jesu.
2Inê kê sege tangago, Timoti, igo ki no kareku monari igê na tongesuriha.
Inê kê nungi, hanana God Vaemana mo Kirisito Jesu, na Araha iaka, karu korokoro tangago, karu takuigo, ma karu vatego na marapeha.
Hinarua na hagesuringa hagaparu
3Inê kê obanigo, vi go gâga i hinua i Epeso, manga gê bani bonasigo, matena gê tavoraha tanga i Masetonia. Tani na enoni i ngekana ngaira ka katogi na hagesuringa hagaparu, ma ki tuguhigo, vigo bonasira, ka nakagi vê. 4Go vi tangara, ka nakagi vê na sihonga ngegana, ma na tamasinga renigi na atata na raraha iata na êvarita na enoni, renigi na tarani ngegana ka katora na enoni, ka hetuguri ma, ma ka pe tamania na katoha iana God, na tongesuriha ki hagagiraragia renia. 5Inê kê bonasigo vikê, hanana i akê me na hetakuiha, i arâ me tenia na parongana matarotaro na enoni, ma tenia na aitangihana koro, ma tenia na tongesuriha taranina. 6Tani na mane ka bani kasigi râ na tarani ngegana, ma ka takotako tugupu igê na tamasinga bekabekaga. 7Ngaira ka obania, vi ga voravora re na mane ni hagesuringa renigi na ramata iana God, ma ki asa iata, vi ge rongogiraragi na tamasinga iata so mareta, se vi ge rongogiraragi na marâ, ga tamasigi, ma ka migi para.
8Igia ka bani girara, vi na Ramata i na Buka Apuna ka koro, manga vi ga katogi igê na otoha. 9I tuguhigia ga takusia, viga nakagi na ramata, siana vi tangara na enoni, ga koro, ma tangara hete na enoni, ga aharê igê na ramata, ma tangara na manero, tangara na enoni, ga pe tê viteana God, se ga usitenia; tangara na mane, ga nahuira o vaemata ma kenata, tangara na enoni henahu; 10tangara na enoni, ga gamogamo; tangara na mane, ga varangi heri, ma tangara na gete, ga varangi heri; tangara na ani, ga raura na enoni; tangara na enoni, ka hagahagaparu, ma ka tohetohe vero, se ga katogi na ani mavê na tarani getigi, i manimanigi na hagesuringa monari. 11Na hagesuringa ngekê igia ka tarahua igê na Taroha Koro iana God, i koro ma ki araha. Ngaia ki hagêguriê, kê tarohenia.
Ga visia koro God renia na takuiha iana
12Inê kê visia koro o Kirisito Jesu, na Araha iaka, i hagaramoniê igê na tagaraha iaku. Inê kê visia koro, renia ngaia ki hagêguritogo reniê, ma ki kasiê, kê tagara tanga. 13Henaka i nago inê kê tamasi erasia, ma kê merongasia, ma kê guharia. Ma God ki takiê, renia inê ki mamênga, vi ve tongesuri. Tahema inê kê pe girara vi na ta kanigê tanua. 14Ma na Araha iaka ki vateê na korohana raha teha, ma ki vateê na tongesuriha, ma na hetakuiha. Ngairerua ka na anika, manga vi igia, ma ka obâbahaku henia o Kirisito Jesu. 15O Kirisito Jesu ki râ me i maveta, hanana i hagatahira na enoni tasi. Na tamasinga ngekê ki monari. Ma ki tuguhigia, vi ga taua, ma ka tongesuria i mêrihaka hagenani. Inê kê era ngavê teharira na enoni tasi getera, 16ma suria inê kê manga ngekana, God ki takiê, hanana o Kirisito Jesu ki hagabângenia, vi ngaia ki piringiape ngavê heniê, inê kê era ngavê teharira na enoni tasi getera. God ki kato vikana tangê, hanana i hagagirarara na enoni hato, ga tongesuria i hemuri me, renia na tauhana, hanana vi ga page nahunia na mêriha mora ma tarema. 17Na Araha, i gâga tare, ma ki mauri tare, ma ki asa, vi ge bâsia, na God gi tage togo, ka kasia akê, ma ka visia raha tare ma tarema! I monari.
18Timoti, kareku igê na tongesuriha, inê kê hagêgurigo igê na tagaraha ngekê. Na tagaraha ngekê ki râ surigi na tamasinga iata na poropete, ga bani visigi renigo i nago vê, matena ga atego tanga na tagaraha ngekê. Na tamasinga ngegana ka araria, vi ga mangagi na tangaruha iamu, hanana go ramoramo igê na tagaraha iamu. 19Go gatagata igê na tongesuriha iamu, ma ko ototo surigo maremu igê na aitangihamu. Tani na mane ka pe bani oto surira mareta igê na aitangihata, ma ka bani erasia hagetage na tongesuriha iata. 20Ngairerua o Humeneo mo Alesanta kani i berarogata. Inê kê bani hagatarêngenirerua tanga na raramohana Satana. Na tarana ngekê ki page hagagirararerua, hanana vi siana karu tamasi erasia God.
Currently Selected:
1 TIMOTI 1: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
