2 KORINTO 12

O Paulo ki ageage renigi na maruteha ma na mamasiaganiha iana

1Na ageageha ki pe koro. Ma ki manga inê, ma ki tuguhiê, vi gê ama ni ageage nga, inê be ageage renigi na maruteha ma na marâ, na Araha i hagagirarê renigi. 2Inê kê girara ta na mane i tongesuria o Kirisito. Na harisi tangahuru gi tage matara ge he ga hato, na mane ngekana ka tahura akê i vavearo i haha ngavê. Inê kê pe girara, i vora me monari vari, se i marute ma. God ma kani girara. 3Ma inê kê girara, na mane ngekana ga tahura akê i Paratiso, ma inê kê pe girara, i vora me monari vari, se i marute ma. God ma kani girara. 4Ma i ngekana ngaia ki rongogi na marâ, na enoni ga pe nahunigi rârâ ta na tamasinga, vi ge ararigi, ma ki apu tangara na enoni, vi ge visigi. 5I manga ngekana, inê be ageage renia na mane ngekana, ma ki mareha vi ve ageage reniê mareku, nga noga ma na marâ, ga hagabângenia, vi inê kê makumakusiaga. 6Manga vi inê, ma kê obania, vi gê ageage, inê kê pe bekabekaga, suria inê kê tamasigi na marâ, ga monari. Ma inê kê usi, vi ve ageage, suria inê kê obania ma, vi na enoni ka hanetasiê renigi na marâ, ga basiê, gê tanugi, ma ka rongoê, gê visigi.

7Hanana siana kê paroparo renigi na marâ, ga bâkoro ngavê, gê bâsigi, ki tarahuê ta na maeha i apeku. Na maeha ngekana ki manga na sutana ta na marâ, na angelo iana Satana ki sugiê renia, hanana vi siana kê paroparo. 8Hageoru inê kê metamasi na Araha renia na tarana ngekana, ma kê nungia, hanana vi torea vê paniê. 9Ma ngaia ki aramiê, ki vi: “Na hetamaniha iaku ki uhu noga tangago, suria na raramohaku ki tehateha, matena igo ko makumakusiga.” Tahema inê kê vagevage bâraha, matena gê ageage renigi na makusiha iaku, hanana gê girara, vi na raramohana o Kirisito ki anumasiê. 10Renia inê kê takuia o Kirisito, inê kê vagevage, matena gê makumakusiga, matena na enoni ka guhariê, ka hagamamasiagê, ka merongasiê, ma ka erasiê, suria na matena gê makumakusiga igê, inê kê ramoramo.

O Paulo ki takuira na enoni i Korinto ga tongesuri

11Inê kê bâ manga gê bekabekaga, ma igamu nga kani mu katoê, kê manga ngekana. Igamu hete ka na ani i tuguhigamu, vi gamu visiê, vi inê kê koro, mareha vi inê mareku. Henaka vi gê manga na enoni purua ma, ma na aposotolo raha teha iami ka pe tehariê rârâ igê ta na marâ. 12Inê kê hagatanga monari tangagamu reniê mareku, vi gê aposotolo, suria inê kê pe hagagege, matena ga tarahuê na mamasiaganiha, ma suria ga vora me i pasimi na mena, na tagaraha raha, ma na marâ, na enoni ga konekone renigi. 13Na tarana manga i he kê pe katogamu igê mangara na haku getera na enoni ga tongesuri, nga noga ma inê kê pe hagamarâ apemi? Ma ki monari, i pe oto ngavê nga! Gê hetaki bâraha!

14Hoita, i ngekê ki na oruta na matena, gê nanê igê, hanana vi gê vatugigamu, ma ki asa ve page hagamarâ apemi nikâ. Inê kê obanigamu nga, igamu, mareha vi na haga iami. Bâ, na kare ki pe tuguhira vi ge marupera na enata ma na enata hete kani ga marupera na kareta. 15Inê kê obania bâraha, vi ve bâsurigamu renigi na ara ni nahuninga iaku, ma reniê mareku nikâ, hanana ve tamanigamu. I hega, i so vari na takuiha iami tangê, suria inê kê takuigamu bâraha?

16Hoi, igamu kamu vi nikâ, vi inê kê pe hagamarâ apemi. Ma ta na enoni ki page visiê vari, vi inê kê hagahagaparugamu, ma kê hagabekasigamu. 17Manga i he? Inê kê hagabekasigamu vari renira na mane, gê hagatorangenira tangagamu? 18Inê kê nungia nga o Tito ki arâ, ma inê kê hagatorangenia ta na mane, i tongesuri, ki arâ henia. Mu takusia vari, vi o Tito ki hagabekasigamu? Hoi, ngaia ma inê, kamuru tagenamirua ma. Na takotako iamirua ma na parongamirua ka hetagenani ma.

19Igamu kamu bani takusia vari, vi i koro ngavê, kani vi igami kami tamasi pusigami maremami i maami? Mareha vê! Igami kami tamasi suria na obaniha iana o Kirisito, i maana God, ma, goaku hetakui igê na tongesuriha, na ara ni marâ, mi katogi, igami kami katogi hanana vi gami tamanigamu renigi. 20Inê kê magu, suria na matena manga gê atata vê i pasimi, inê kê page tarahua vari, vi igamu kamu pe manga hanana gê obania vari, ma igamu nogami kamu page tarahua vari, vi inê kê pe manga hanana mu obania igamu. Inê kê magu, vi ve tarahugamu, vi gamu heariha, ma kamu hengari, mu bagamangamangariaga, ma kamu maongo, mu guhaguha, ma kamu tabotabohara, ma kamu heparoparo, ma kamu atani ataka mavê. 21Inê kê magu, vi na matena i muri gê arâ vê i pasimi, vari God iaku ki page hagamakiê i maami, ma ki page rugurugu na obaku renira na enoni, ga bani tasi i nago ma ka pe urisi parongata tenigi na marâ era, ga katogi, tenigi na gamogamoha, ma na ataka mavê na tauha era, ga tenigi.

Currently Selected:

2 KORINTO 12: KCB

Highlight

Copy

Compare