2 KORINTO 11

O Paulo ma na aposotolo hagaparu

1Inê kê obanigamu, vi gamu piringiape heniê, henaka vi igê na matena gê bekabekaga sisite. Mu piringiape heniê! 2Inê kê hengarigamu tagenana manga God, i hengarigamu. Suria igamu kamu manga na kere gete tatara maninga, inê gê bani surua tanga vi auragia na mane gi tage togo: ngaia ki no Kirisito. 3Inê kê magu, suria inê kê takusia, vi i era ma ka page erasigi na takotako iami, kamu kasia vê, vi gamu tototo suria maninga ngavê o Kirisito, tagenana manga na ma, i hagaparua ka Eva renigi na tamasinga oho iana. 4Renia igamu kamu piringiape ngavê henia na ani mavê na enoni, i arâ me i pasimi, ma ki ateate renia o Jesu, na ani getea tenia na ani, mi ateate renia igami; ma kamu taugi na higona ma na hagesuringa, ga râ hegitigi ngavê tenia na Higona Apu ma na Taroha Koro, gamu bani têgi tenigami.

5Inê kê pe takusia, vi inê kê pe raha mangara na aposotolo raha iami! 6Vari inê kê pe girara bâkoro, hanana vi ve tamasi, ma igê ma na giraraha inê kê nahunia. Igami kami hagatarêngenia tangagamu tare ma igê na ara ni tarani. Igamu kamu bani girara.

7Inê kê pe turigamu renia na haga, matena gê tarohenia na Taroha Koro iana God tangagamu. Inê kê nakê so mareku, hanana gê kasigamu akê. I hega, gê tasi vari? 8Matena gê tagara i pasimi, na haku getera na enoni ga tongesuri ka vuriê. I bâ manga vi inê kê hanago tenira, hanana gê tamanigamu. 9Ma na matena gê oga henigamu, inê kê pe hagamarâ apemi, hanana vi gamu tamaniê, matena i marehasiê na haga, suria na goaka igê na tongesuriha, ga râ me tenia i Masetonia, ngaira ka toregi me tangê na ara ni marâ, ga pe tongasiê. Tagenana manga i nago, ma i hemuri me inê ki asa hagetage, ve hagahigegamu! 10Inê kê tohe renia na monariha iana o Kirisito i pasiku, i asa hagetage ta na marâ, vi ge hagabarasiê, gê ageage, i Agaia hagenani. 11Tanu hega kanigê tamasi vikana? Suria inê kê pe takuigamu vari? Mareha, God ki girara, vi inê kê takuigamu.

12Inê kê page ama ni katoa nga na marâ, gê katoa i ngekê hanana gê hagabarasira na “aposotolo” hagaparu ngegana, hanana siana ka paroparo, ma ka vivi, vi ngaira ka katoa na tagaraha, i tagenana ma henia na tagaraha iamami igami. 13Na enoni ngegana ka mareha vi na aposotolo monari. Ngaira ka na aposotolo ngarangara, ga hagabekasira na enoni renia na tagaraha iata, ma ka maramara aposotolo monari iana o Kirisito. 14Ma ka visia re ta? Satana nikâ ki girara i maramara angero iana God! 15Tahema ki pe arari vige pe visia re naka viga manga ngegana, ma i ta na tangiana ngaira ka page tarahugi na meni na parongata.

Na mamasiaganiha iana o Paulo na aposotolo

16Be vi nikâ: siana ta na enoni ki takusia, vi inê kê bekabekaga. Ma ki manga mu tako vikana, mu katoê manga vi inê ki na mane gê bekabekaga, hanana gê ageage sisite. 17I monari, na marâ vi gê visia ki mareha vi na marâ, na Araha i obania tangê, vi gê visia. Matena gê ageage, ki monari, inê kê tamasi manga na mane i bekabekaga. 18Ma suria ga rako na enoni, ga paroparo renia ta na marâ, inê be ageage nogaku hete. 19Igamu, e, mu kare tako mataha ngavê, ma kamu piringiape ngavê henira na enoni ga bekabekaga! 20Igamu kamu piringiape nikâ henia na enoni, i ramonigamu, se i hagabekasigamu, se i hagaparugamu, se i ruhigamu, se i bahitarigamu. 21I monari, inê kê maki, suria igami kami pe gatagata, hanana vi gami katokato vikana!

Hoi, inê kê tamasi manga na mane i bekabekaga. Ma ki manga ta na enoni, ma ki râ me ki ageage renia ta na marâ, inê nogaku kê ramoramo kê ageage. 22Ngaira vari ka na Hebereo? Inê nogaku! Ngaira vari ka na Isiraelita? Inê nogaku! Ngaira vari ka na karena o Abaramo? Inê nogaku! 23Ngaira vari ka na kariana o Kirisito? Inê kê tamasi vari manga na mane, i bekabekaga, ma hete inê ki na kariana, gê koro teharira. Inê kê tagara bâraha ngavê teharira. Inê kê oga hagarako i ruma ni hagaitangiha. Inê, ka ramusiê bâraha ngavê teharira. Ma kê haga ni me teharira. 24Ma na Siu ka ramusiê hagerima, ga tahurungenia tangahuru gi oru matare siva. 25Na Ai ni Roma ka ramusiê hageoru, ma hagetage ka arihahuniê renigi na hê. Hageoru ki kokoro na haka, gê râ igê, ma hagetage inê kê ahe i asi suria na tangiana hagenani ma na bungiana hagenani. 26Hagarako igê na râha iaku inê kê tarahugi na perenga; ga maganu na ve; na manero; na tamaku na Siu ka merongasiê, ma na enoni, ga pe Siu nikâ. Inê kê tarahugi na perenga i hinua, i bemu, i asi i matava, ma i pasita na tamaku hagaparu. 27Inê kê tagara raha, ma ki meme na apeku. Hagarako ki bara vi ve mauru. Inê kê magê ma kê pasi tono. Hagarako ki marehasiê na ngêra, se na ruma, se na gahu. 28Ma na ani getigi na marâ, gê pe visigi, ma na marâ gi tage ma: i na ara ni tangiani ka nahuiê na takoha renira na haku hato na enoni ga tongesuri. 29Matena ta na enoni ki makumakusiga, inê nogaku kê makumakusiga. Ma na matena ta na enoni ki tasitasi, inê kê mangariaga, ma kê maki suria.

30Manga vi inê, ma ki tuguhiê, vi gê ageage, hoi, ve ageage renigi na marâ, ga hagabângenia, vi inê kê makumakusiga. 31Na God ma o Vaemana na Araha o Jesu ki girara, vi inê kê pe hagaparu. Ge visia raha God! 32Matena gê oga i hinua i Tamasiko, na gavumane iana o Areta, na maneraha, ki nakara na mane ni me, ka anumasigi na maa ni para na hinua, hanana vi hagatotongoê. 33Ma na kariaku ka kuniê vato igê na erere, igê na mabaha na para. Tahema inê kê tahi.

Currently Selected:

2 KORINTO 11: KCB

Highlight

Copy

Compare