1 TIMOTI 2
2
Na tarana na hagarahenga
1Hoita, hagenago inê kê obanigo bâraha, vi go avarasia God, go nungia, ko rahesia, ma ko visia koro, hanana ngaia ki tamanira na enoni hato. 2Go nungia God tangara na enoni, ga araha teha igê na gavumane, ma tangara na enoni hato, ga araha, hanana na ogaha iaka ki korokoro, ma ki marape, ma ka girara ga arâ suria maninga na tamasinga iana God, ma ka paronga manga i marisika. 3Na tarana ngekê ki koro, ma ki hagakoro obana God, na Hagamauri iaka, 4i obania, vi na enoni hato ka tahitahi, ma ka tarahua na monariha. 5Renia God ki gi tage togo ma, ma ki vere tage togo na ani i hagakorora na enoni tanga God: ngaia ki na mane o Kirisito Jesu. 6Ngaia ki kasi manavana, hanana i hagamêrira na enoni hato. Ma igê na matena tanga ngaia ki hagatanga monari, vi God ki obanira na enoni hato, vi ga tahitahi. 7Tahema ngaia ki bani ateê, kê aposotolo, ma kê vora re na mane ni hagesuringa tangara na enoni, ga pe Siu, hanana gê tarohenia na tamasinga na tongesuriha ma na monariha. I mareha vi ve hagaparu. Inê kê vi monari!
8Igê na ara ni agua ni hagarahenga inê kê obanira na mane, vi ga hagarotu. Na mane ngegana ki tuguhira, vi ga bani nakara mareta, ka tagara tanga God, ka pe mangariaga, ma ka pe hekorekore, matena ga taugi kê na rimata igê na hagarahenga.
9Nikâ inê kê obanira na gete, vi ga tuguni, manga hanana i marisita nogata, ma siana ka pakora mareta, ma siana ka bâbâ hahanetaga. Siana ka bâbâ hahanetaga igê na tarani, ga tapurura, ma ka surasura bê, se vi ga pakora renigi na mahe na golo, se vi na oruni na egugu, se vi na gahu, ga akê bâraha na meni. 10Ma ki tuguhira, ga hagamahera mareta hete renigi na tagaraha koro, manga hanana i marisita nogata, vi ngaira ka na gete, ga hanetasia God. 11Na gete ki tuguhira, ga girara ga munimuni, ma ka kasira so mareta, matena ga hagesuri. 12Inê kê manimanira na gete, siana ka hagesurira na enoni, se vi ga araha tangara na mane. Ki tuguhira, ga munimuni. 13Renia God ki hagavora hagenago o Atama, ma hagemuri ka Eva. 14Satana ki pe hagaparua o Atama, ma ki hagaparua hete ka Eva, ma ka Eva ki aharê igê na ramata iana God. 15Ma na gete ki page tahitahi renia na apaparaha ni kare, ma na marupeana na kare, manga vi ngaia, ma ki ama ni gatagata nga igê na tongesuriha, ma igê na hetakuiha, ma igê na ogaha, i arâ suria na obaniha iana God, manga vi ge pe paroparo igê.
Currently Selected:
1 TIMOTI 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
