1 TIMOTI 3
3
Na enoni raha igê na rotu
1Na tamasinga ngekê ki monari: manga vi na mane, ma ki agana ngavê, vi voravora re na maneraha igê na rotu, ngaia ki obania na tagaraha, vi korokoro ngavê. 2Na maneraha igê na rotu ki ototo na parongana igê na ara ni marâ. Ngaia ki auragia ma na gete gi tage togo. Ki ototo suria marena. Ki bâbâ tarana. Ki ototo surira na enoni, ma surigi na ramata. Ki unira banu i pasina na enoni mahuara. Ki girara i hagesurira na enoni. 3Siana vi na mane ni tonoha, se vi i bagananahu. Ngaia ki takotako rugu, ma ki haritagi hete. Siana ki vanasigi na haga. 4Ngaia ki girara i marupea maninga na ahemata iana, ma ki katora na karena, ka têtê viteana, ma ka hanetasia. 5Renia i manga vi ngaia, ma ki pe girara, vi ge marupea na ahemata iana marena, manga i he kani girara vi marupea na haku na enoni, ga tongesuria God? 6Siana vi na mane, i kahu tongesuri ma, i era ma ki paroparo, ma ki maratorana Satana, i bani paroparo, ma ka hagaitangia. 7Nikâ, na enoni, ga pe tongesuri, ki ararira viga hanetasia, hanana ngaira ki asa, vi ge hagamakia, ke vota igê na tu iana Satana.
Na enoni tagara igê na rotu
8Nikâ na enoni tagara igê na rotu ki tuguhira, viga voravora re na enoni koro ma ka ototo. Siana ka totono papasi na vaini, se viga hagatage haga. 9I tuguhira, viga taua gatagata igê na aitangihata koro na morana na tongesuriha, God i bani hagagiraragia renia. 10I koro, ka uhungira i nago, ma ki manga ga tarahura, vi ga koro, hoita, ngaira ka kahu tagara. 11Na gete iata nikâ, ki tuguhira viga korokoro, ma siana ki rakorako i harata. Ka bâbâ tarata, ma ka ototo igê na ara ni marâ. 12Na mane tagara igê na rotu ngaia ki auragia ma na gete gi tage togo, ma ki girara i hagaotora maninga na karena, ma ki girara i marupea maninga na ahemata iana. 13Na enoni, ga tagara bâkoro, ka katora na enoni getera, ka hanetasira. Ma ki manga ngekana ngaira ka girara ga tamasi ramo renia na tongesuriha, igia ga nahunia, manga vi igia ma ka obâbahaku henia o Kirisito Jesu.
Na tongesuriha iaka
14Matena gê segea na leta ngekê tangago, inê kê obania, vi sugia ma ve râ vê be bâsigo. 15Ma ki manga vi gê hagarihu, na leta ngekê ki hagagirarago, vi manga i he ki tuguhigia, viga paronga manga i marisika na ahemata iana God: ngaia ki na haku iata na kariana God mamauri. Ngaia ki manga na u, se na erapi, i gatagata renia na monariha. 16I asa na enoni, vi ge hagaiga, vi pe raha na giraraha, God i bani hagagiraragia renia igê na rotu iaka!
Ngaia ki vora enoni.
Na Higona Apu ki bani hagabângenia,
vi ngaia ki oto.
Ma na angero ka bani bâsia.
Ka bani tarohenia
tangara na enoni hato i maveta.
Ma na enoni hato i maveta
ka bani tongesuria.
Ngaia ki bani aporo i pasina God,
ma ki Araha.
Currently Selected:
1 TIMOTI 3: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
