1 PETERO 2
2
O Kirisito ma na enoni ga tongesuria
1Hoita, mu kasigi râ na ara ni marâ era. Siana kamu hagaparu, se mu hagahagaparu, se mu hengari, se vi gamu guhaguha! 2I ararigamu, vigamu maratorata hete na kare, ga vora haoru, ga obania tare, vi ga sususu. I ararigamu, mu pasi tono tare na susu matarotaro tange na ataromi, hanana mu raharaha, ma kamu tahitahi, renia mu tonomia. 3Renia na Buka Apuna ki vi, “Igamu kamu bani namia na koroha iana na Araha.”
4Mu râ me tanga na Araha. Ngaia ki na u mamauri. Na enoni ka usitenia, ma ka vi, vi ngaia ki na u purua ma, ma God ki atea, ma ki vi, vi ngaia ki na u koro era. 5Mu râ manga hanana, vi gamu ka na u mamauri, ma kamu agana, ka tagarahigamu renia na ruma iana God. Manga ngekana, igamu kamu page tagara mangara na mane apuna ni vogasiha, hanana mu vogasia God renigi na vogasiha koro, ga araria God renia o Jesu Kirisito. 6Renia na Buka Apuna ki vi:
“Inê kê atea na u koro era,
gê hagêrasia manga na rangata i Sione.
Ma na enoni, ga tongesuria,
ki asa iata, vi ge raronisuka renia.”
7Na u ngekê ki koro teha tangagamu, na ani mu tongesuria. Ma tangara na ani, ga pe tongesuria,
“Na u, na mane tagara ga usitenia,
ma ka vi, vi ngaia ki na u purua ma,
na apinige ngekê ki na rangata koro ngavê.”
8Ma na Buka Apuna ki vi nikâ,
“Na enoni ka page tapasu igê na u ngekê:
na rangata ngekê ki page hagavotarira.”
Ngaira ka tapasu, suria ga pe tongesuria na tamasinga iana God tangara. Ma ngekana nga ka na tarana, ngaira ga vora tanga.
9Ma igamu nogami na varo ninuni, God i bani atea. Igamu nogami na mane ni vogasiha iana na Araha. Igamu nogami na kariana God. God ki bani ategamu, hanana vi gamu ateate renigi na tagaraha raha teha iana. 10I nago kamu mareha vi na kariana God, me na matena ikê igamu ki na kariana. I nago igamu kamu pe girara na takiha iana God, ma na matena i ngekê igamu kamu bani nahunia na takiha iana.
Na enoni vurivuri iana God
11Goaku, inê kê kanukanugamu, renia igamu kamu mamahuara, ma ki asa, vi gamu oga tare igê na maveta ikê. Siana kamu marumusigi na teniha era, ga merongasira tare na ataromi. 12I tuguhigamu, vigamu ototo maninga i pasita na enoni ahuroto. Manga ngekana, henaka vi ngaira ma ka torahurigamu, vi igamu ka na enoni era, ngaira ka page bâsigi na tagaraha koro iami, ma i ngekana ngaira ka page visia raha God igê na tangiana, i page arâ me igê.
13Renia na Araha igamu kamu têtê viteata na ara ni enoni, ga araha. Mu têtê viteana na Maneraha, i teha igê na Gavumane. 14Ma kamu têtê viteata na ani getera na maneraha, suria na Maneraha, i teha igê na Gavumane, ki kasira, ka hagaitangira na enoni, ga era, ma ka visira koro na enoni, ga koro. 15Suria na marâ, God i obania, kani ikê: ngaia ki obanigamu, vi gamu hagamunira na enoni, ga bonobonoga ma ka tamasi bekabeka renigi na tagaraha koro iami. 16Mu gâga mangara na enoni aharupa. Ma siana kamu buhia na anima na marâ era renigi na parongami maremi, suria ma vi igamu vari ki na enoni aharupa. Igamu kamu oga mangara na enoni vurivuri iana God. 17Mu hanetasira na enoni hato. Mu takuira na tamami, ga tongesuri. Mu magutenia God, ma kamu hanetasia na Maneraha, i teha igê na Gavumane.
Na mamasiaganiha iana o Kirisito ki hagesurigamu
18Igamu na enoni tagara, i koro, kamu tê viteata na araha iami, ma kamu hanetasira maninga, henaka viga korokoro tangagamu ma ka piringiape, se viga ramonigamu tare. 19God ki page visigamu koro renia, manga vi gamu hatamia purua na mamasiaganiha, suria mu takusia ma na marâ, God i bonasigamu renia. 20I asa ta na enoni, vi ge visigamu bâkoro, manga vi igamu ma kamu hatamia na hagaitangiha renigi na marâ era, mu katogi. Ma God ki page visigamu bâkoro hete, manga vi igamu ma kamu hatamia na mamasiaganiha, suria mu tanugi na tarani, ga koro. 21Na tarana ngekana ki tuguhigamu, renia o Kirisito marena ki hatamia na mamasiaganiha tangagamu, ma ki hagesurigamu, kamu amaka surigi na parongana. 22Ngaia ki mareha ge tasi. Ngaia ki mareha ge hagaparu. 23Matena na enoni ka guharia, ngaia ki pe guharira bê aporo. Matena na enoni ka hagamamasiaga apena, ngaia ki pe hagamakukira, ma ki naka vê ma hete tanga God, ki surigi oto tare. 24O Kirisito nogana ki tora gapara renigi na tasi iaka igê na kuruse, hanana vi igia ka meme tenia na tasi, ma ka mauri suria na obaniha iana God. Na maara iana ka bani hagamavogamu. 25I nago igamu kamu maratorata na sipi, ga totoko ma ka tarupe. Me na matena ikê ka bani hagaporosigamu tanga God, hanana i bâbâsurigi na ataromi.
Currently Selected:
1 PETERO 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
