1 PETERO 3

Na enoni êragi

1Hoita, igamu na gete êragi, i koro, kamu têtê viteata na mane iami. Tahema, manga vi ta na hitangita, ma ka pe tongesuria na viteana God, ngaira ka page kahu tongesuria renigi na parongami koro. Henaka mu pe tamasi tangara, 2ma ngaira ka girara ga bâsigi na parongami ga matarotaro ma ka koro. 3Siana kamu hagamahegamu maremi ma renigi na surasuraha ni bê bâkoro, se vi na rêni, se vi na hato, se vi na mumu ni karinga, se vi na bangobango ni rima, se vi na pupu mako, se vi renigi na tuguni bâkoro. 4Ma ki ararigamu, vigamu bâkoro hete igê na parongami ma igê na aitangihami. Ki korokoro, ka haritagi ma ka marape na ataromi. I asa ta na marâ, vi ge erasigi na bâkoroha ngegana. God ki obanigi bâraha na bâkoroha ngegana. 5Na gete koro i nago, ga tongesuria God, ka hagamahera mareta renia na tarana ngekana. Ngaira ka têtê viteata na mane iata. 6Ka Sara ki kato manga ngekana, i tê viteana o Abaramo, ma ki hêtana, ki vi “Araha iaku”. Megamu na karena, manga vi gamu paronga koro, ma kamu pe magutenia ta na marâ.

7Ma igamu nikâ, na mane êragi, ki ararigamu, vigamu takuira na gete iami igê na mêriha na êragiha iami. Renia ngaira ka mareha vi ge ramo manga igamu. Tahema ki ararigamu, vigamu hanetasira, suria mu nahunia tagenami na mêriha, God i vategamu renia. Na nunginungiha iami ka page korokoro, manga vi igamu ma kamu katoa na tarana ngekana.

Na mamasiaga renia na paronga koro

8Hoita, i tuguhigamu, mu obâbahaku, ma kamu apehaku. Kamu hetakuiheri mangara na ahegoata, ma kamu hekorokoro, ma kamu haritagi heri. 9Siana kamu barua na eraha renia na eraha, se vi na guhata renia na guhata. Ma ki araria hete, mu tanua na tarana getea. Mu nungia na hetamaniha iana God tangara, renia God ki bani surua tangagamu, vi vategamu na hetamaniha iana, matena i ategamu. 10Suria na Buka Apuna ki vi:

“Manga na enoni, ma ki obania na mêriha koro,

hanana vi vagevage renia,

siana ki tamasi erasira na enoni,

ma siana ki hagaparu.

11Ngaia ki tuguhia, i murisigegi hete na marâ era,

ma ki tuguhia, i ama ni garia nga na marapeha.

12Renia na Araha ki marupera na enoni,

ga paronga koro ma oto i maana,

ma ki aganarigi tare na nunginungiha iata,

ma ki rêrapusira na enoni era.”

13O ti kani page erasigamu, manga vi igamu ma kamu agana, kamu tanugi na tagaraha koro? 14Ma be ata ni vi ma: manga mu hatamia na mamasiaganiha, suria vi gamu katogi na tagaraha koro, igamu kamu babarisi. Siana kamu magutenira na enoni, ma siana kamu anumanuma. 15Ma kamu tongesuria hete o Kirisito i obami, ma kamu hanetasia, suria ngaia ki na Araha iami. Manga ta na enoni, ma ki hagategamu renia na tongesuriha iami, siana kamu magu, vigamu aramia. 16Ma na matena mu aramia, i koro, kamu korokoro tanga, ma kamu hanetasia. I ararigamu mu togeaga nga igê na tagaraha koro. Manga ngekana, na enoni, ga guharigamu, ma ka tamasi erasigamu, suria igamu kamu paronga manga i marisita na kariana o Kirisito ka page maki renigi na tamasinga iata. 17Manga God, ma ki obania, vi gamu hatamia na mamasiaganiha renia na tagaraha koro, mu takusia na tarana ikê: na mamasiaganiha renigi na tagaraha koro ki koro teharia na mamasiaganiha renigi na tagaraha, ga pe koro. 18Renia ngaia marena o Kirisito ki me renigamu. Hagetage togo ma ngaia ki me renigi na tasi. Na mane koro ki me renira na enoni era, hanana i megamu râ tanga God. I meme na apena, ma na atarona ki mauri tare. 19Ma igê na atarona ngaia ki râ, ma ki ateate tangara na atarota na enoni, ga bani me. 20Ngaira ka na atarota na enoni, ga guguruga tanga God matena God i naasira makira suria na bevoana, o Noa i tagarahia igê na haka. Na enoni, ga pe rako i rarona na haka, na vere varu, ga tahi renia na ve. 21Na ve ngekê ki hagesurigia renia na batesimo, i hagatahigamu i na matena i ngekê. Ma na batesimo ki mareha vi na marâ, ge tananigi râ na tongo tenigi na apemi, ma ngaia ki na suruha hete tanga God, i hura me tenia na aitangihana koro na enoni. Na batesimo ki hagatahigamu, suria i mêri aporo o Jesu Kirisito. 22Ngaia ki bani râ i pasina God, ma ki araha henia God, ma na angelo hato, ma na ani ga ramo, ma na ani ga raramohaga ka bêtuhia, ma ka tê viteana.

Currently Selected:

1 PETERO 3: KCB

Highlight

Copy

Compare