1 MAKABEO 8
8
I Roma ki rongo raha na atana
1O Juta ki rongo, vi na ai ni Roma ka raramohaga teha igê na hearihatana ma ka koro tangara na enoni hato ga pane henira ma ka katoa na suruheri ni marapeha henira na ani ga nungira. 2Ngaia ki rongo tarohani renigi na hearihatani iata ma ki manga i he ka meraheariha ramo na ai ni Galia. Ngaira ka teharira ma ka tugurira ka vuri takesi tangara. 3Ngaia ki rongo tarohani renigi na tauhata i Sipeni, matena ga parênigi na agua ga oparigi igê na siliva ma na golo. 4Suria ngaira ka kato bâkoro ma ka togeaga, tahema ngaira ka henahuraua na apanena hagenani ngekana, henaka i hagatê ngavê tenia i Roma. Ngaira ka teharira na maneraha igê na agua hagatê, ga meraheariha. Ngaira ka purira so ma ka tugurira na ani ga tahi ka vuria takesi i na ara ni harisi. 5Ngaira ka teharirerua o Pilipo mo Pereseu, garu maneraha i Masetonia henira na ani ga pane henirerua ka meaheariha i Roma. 6Ngaira ka teharia nikâ o Antioko raha, na maneraha i Siria i taharira renira na 120 na elepante, na mane ni me igê na hosi, na mane ni me igê na kati ni me ma na mane ni me ramo ma ka gahu. 7Ngaira ka tê mamêrigana ma ka tugurira ngaia ma na urusina ka vuria na takesi i akê tangara ka tagarenira na goata tangara, hanana siana ka merongasira nikâ na ai ni Roma. 8Ngaira ka tugurira nikâ ka tagarenigi i Intia, i Metia, i Litia ma tani na mako koro iata. Ma na ai ni Roma ka tagarenigi tanga na maneraha o Umenesi.
9Matena na ai ni Gris ka harikato viga taharira ma ka têtê erasira ngavê na ai ni Roma, 10na ai ni Roma ka rongoa na harikatoha iata ma ka hagatorangenia na mane i bêngenira na mane ni me, hanana i meraheariha. Na ai ni Roma ka nahuira ka me rako na ai ni Gris, ka henahuraura na gete iata henira na kareta, ka rurugu na nahuninga iata, ka têa na apanena iata, ka hogegi na hinua na para nganganihaga ma ka katora ka vora re na kare rakuraku iata mataro me i ngekê. 11Nikâ ngaira ka tê erasira ngavê na maneraha getera henira na kariata, se ka katora ka vora re na kare rakuraku iata na ai ni agua getigi se na anima na enoni ga meraheariha. 12Henaka, ma ngaira ka ami ni komanira nga hete na enoni ga pane henira ma na ani ga hagêguritogo renia viga anumasira. Ngaira ka teharira na maneraha, na ani hagarangi ma na ani hagatê. Na enoni hato ka rongo tarohata ma ka magutenira. 13Na mane, ngaira ka obania viga maneraha, ngaira ka hagêrasira ka maneraha ma ka hatungira na ani ga bani maneraha. Na raramohata na ai ni Roma ki raha teha ngavê i na ara ni agua. 14Henaka i manga ngekana, ma ngaia ki mareha rârâ ta na mane ni Roma, vige naka akê marena ke maneraha ma ke tuguni manga na maneraha henia na tarepuri i bêna. 15Ngaira ka katoa na haku na mane ni hagaotonga. I na ara ni tangiana na 320 na mane ni hagaotonga ka hakuhaku ka hekarigi, vi manga i he kani ama ni viga hagakoroa nga na ogaha iata na enoni. 16I na ara ni harisi ngaira ka kasia tare na vere tage na mane, ki bêngenira suria ma na harisi gi tage ma ki marungigi na apanena hato i ruguhata. Ngaira hato ka tê viteana na mane ngekana. I mareha ngavê tani vige hengaria se vige obaera tanga.
Na suruheri henia i Roma
17Hoi, o Juta ki atererua o Upolemo mo Jasone. O Upolemo ki no karena o Joane ma o vesina o Ako. O Jasone ki no karena o Eleasare. O Juta ki hagatorangenirerua tanga i Roma, hanana vi garu katoa na suruheri ni hekomaniha ma ni panepaneha henira na ai ni Roma. 18Ngaia ki kato vikana, hanana i hagabarasira na ai ni Siria, vi siana ka ama ni hagamamasiagara nga na Siu, suria na ai ni Roma ka bani girara bâkoro, vi na ai ni Siria ka bani kato vikana noga tangara na Siu. 19Ngairerua karu râ karu tavoraha arihu era ma karu haku ata râ i Roma. Ngairerua karu banu igê na ruma ni heakarigiana iata na mane ni hagaotonga. Ngairerua karu tamasi vikê tangara, karu vi: 20“O hegoata o Juta Makabeo ma na Siu ka hagatorangenigamirua me ikê, hanana vi igia ka katoa na suruheri ni anumasiha ma ni hekomaniha.”
21Na ai ni Roma ka aganaria na tamasinga iaterua. 22Nga tahana nga na leta kani ikê akê ga taria so igê na bahitani na kapa ma ka kasia râ i Jerusaleme, ki oga tare igê, vi ngaia ka na girarana na suruheri ngekana.
23“Na ara ni marâ ke tavoraha bâkoro tare tangara na ai ni Roma ma na Siu igê na ani mavê na agua ga oga igê i bemu ma i asi. Ngaira ka purunguni renira na merongata ma na hearihatana tare ki bê ki arâ. 24Manga vi na hearihatana ma ki tarahura hagenago na ai ni Roma se vi na enoni ga pane henira, henaka vi i he, 25na Siu ka page agana ka tamanira, manga vi i tuguhira. 26Suria na suruheri henia i Roma, ki apu tangara na Siu vige votongenigi na ngêra, na tangaruha, na haga se vi na haka tangara na enoni ga meraheariha na ai ni Roma. Na Siu ka katogi purua nga na tarani ga tuguhira.
27I tagenana ma manga vi na hearihatana ma ki tarahura hagenago na Siu. Na ai ni Roma ka page agana ka tamanira manga vi i tuguhira. 28Suria na suruheri henira na Siu, ki apu tangara na ai ni Roma vige votongenigi na ngêra, na tangaruha, na haga se vi na haka tangara na enoni ga meraheariha na Siu. Na ai ni Roma ka katogi manaki nga na tarani ga tuguhira.
29Ngegana nga ka na tarani na suruheri na ai ni Roma ga katoa henira na Siu. 30Manga vi i hemuri ma na ai ni Roma ma na Siu ka page heaganari, hanana viga naka banu nikâ ta na marâ igê na suruheri, se viga kasia râ ta na marâ tenia, ngaia ki koro ma. Na marâ ga page nakagi banu se ga page kasigi râ, ngaigi ka page tâtâ re ramata tangara.
31Hoita, tanga o Temeterio na maneraha i hagamamasiagara na Siu, igami na ai ni Roma, kami sege vikê: ‘Tanu hega kanigo merongasira na Siu mi tage pane? 32Manga vi ngaira ma ka hagagege tangagami renigo hagetage kê nikâ, igami kami page tamanira ka nahunigi na tarani ga oto tangara ma igami kami page megoheariha i bemu ma i asi.’”
Currently Selected:
1 MAKABEO 8: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific